ಬೆಂಗಳೂರು: ನನಗಿಂತ ನಮ್ಮ ಅಮ್ಮ ತುಂಬಾ ಫೇಮಸ್ ಆಗಿದ್ದಾರೆ ಎಂದು ‘ಬಿಗ್‍ಬಾಸ್ ಸೀಸನ್ 7’ ರ ವಿನ್ನರ್ ಶೈನ್ ಶೆಟ್ಟಿ ಹೇಳಿದ್ದಾರೆ.
ಮೊದಲಿಗೆ ಸಂದರ್ಶನದಲ್ಲಿ ಮಾತನಾಡುವಾಗ, ಈ ಕ್ಷಣ ನಾನು ಖುಷಿಯಲ್ಲಿ ತೇಲಾಡುತ್ತಿದ್ದೇನೆ. ನನ್ನ ಇಷ್ಟು ವರ್ಷ ಶ್ರಮಕ್ಕೆ ಹಾಗೂ ಪ್ರಯತ್ನಕ್ಕೆ ಫಲ ಸಿಕ್ಕಿದೆ. ದೇವರು ಕೊಡಬೇಕಾದರೆ ಎಲ್ಲವನ್ನು ಒಂದೇ ಬಾರಿ ಕೊಡುತ್ತಾರೆ ಎನ್ನುವಂತ ಫೀಲಿಂಗ್‍ನಲ್ಲಿ ನಾನಿದ್ದೇನೆ ಎಂದು ಗೆಲುವಿನ ಅನುಭವವನ್ನು ಶೈನ್ ಹಂಚಿಕೊಂಡಿದ್ದಾರೆ.
ಬಳಿಕ ಅಮ್ಮನ ಬಗ್ಗೆ ಮಾತನಾಡಿದ ಶೈನ್, ನಾನು ಬಿಗ್‍ಬಾಸ್ ಮನೆಯೊಳಗೆ ಇದ್ದಾಗ ಮಾಧ್ಯಮದವರು ನಮ್ಮ ಅಮ್ಮನನ್ನು ಸಂದರ್ಶನ ಮಾಡಿದ್ದಾರೆ. ಅಲ್ಲದೆ ಏನೋ ಉದ್ಘಾಟನೆ ಮಾಡಲು ಹೋಗಿದ್ದರಂತೆ. ನಾನು ಬಿಗ್‍ಬಾಸ್ ಮನೆಯಿಂದ ಹೊರಗಡೆ ಬಂದ ಮೇಲೆ ನನಗೆ ಗೊತ್ತಾಗಿದೆ ಎಂದರು.
ನನಗಿಂತ ನಮ್ಮ ಅಮ್ಮ ತುಂಬಾ ಫೇಮಸ್ ಆಗಿಬಿಟ್ಟಿದ್ದಾರೆ. ಇದೇ ಫೇಮ್ ಮುಂಚಿತವಾಗಿ ಸಿಕ್ಕಿದಿದ್ದರೆ ನನ್ನ ಪೇಜ್‍ಗೆ ತುಂಬಾ ಫಾಲೋವರ್ಸ್ ಇರುತ್ತಿದ್ದರು. ನಿಜಕ್ಕೂ ಅಮ್ಮ ತುಂಬಾ ಸಂತೋಷದಿಂದ ಇದ್ದಾರೆ. ನಾನು ಹೊರಗಡೆ ಬಂದ ತಕ್ಷಣ ಅಮ್ಮ ತಬ್ಬಿಕೊಂಡರು. ಬೇರೆ ಏನು ಮಾತನಾಡಿಲ್ಲ ಎಂದರು.
ನನ್ನ ಎಲ್ಲಾ ಅಭಿಮಾನಿಗಳಿಗೆ ನಾನು ತುಂಬು ಹೃದಯದ ಧನ್ಯವಾದ ಹೇಳಲು ಇಷ್ಟಪಡುತ್ತೇನೆ. ಇಷ್ಟು ವರ್ಷದ ಪ್ರಯತ್ನಕ್ಕೆ, ಇಷ್ಟು ವರ್ಷದ ಛಲ ಇಟ್ಟುಕೊಂಡು ಮುಂದೆ ಬಂದಿದ್ದಕ್ಕೆ ಒಂದು ಸಾರ್ಥಕತೆಯನ್ನು ನೀವು ವೋಟ್ ಮಾಡುವ ಮೂಲಕ ನನಗೆ ನೀಡಿದ್ದೀರಿ. ದೇವರು ತುಂಬಾನೇ ಕಷ್ಟ, ನೋವು ಕೊಡುತ್ತಾನಂತೆ. ಆ ಕಷ್ಟಗಳನ್ನು ತಡೆದುಕೊಂಡು ಮುಂದೆ ಹೋದರೆ ನಮಗೆ ಗೆಲುವು ಸಿಗುತ್ತೆ ಎಂದು ಹೇಳುತ್ತಾರೆ. ಆ ಗೆಲುವು ನನಗೆ ಅಭಿಮಾನಿಗಳ ವೋಟ್‍ಗಳಿಂದ ಸಿಕ್ಕಿದೆ. ನನಗೆ ವೋಟ್ ಮಾಡಿದ ಎಲ್ಲರಿಗೂ ಧನ್ಯವಾದಗಳು ಎಂದು ಶೈನ್ ತಿಳಿಸಿದ್ದಾರೆ.
