ಚೆನ್ನೈ: ಭಾರತದ ಐಪಿಎಲ್ ಮಾದರಿಯ ಬಿಗ್ ಬ್ಯಾಷ್ ಲೀಗ್ (BBL) ಟೂರ್ನಿಯ ಉದ್ಘಾಟನಾ ಪಂದ್ಯವನ್ನ ಭಾರತದಲ್ಲಿ (India) ನಡೆಸಲು ಆಸ್ಟ್ರೇಲಿಯಾ ಕ್ರಿಕೆಟ್ ಮಂಡಳಿ ಚಿಂತನೆ ನಡೆಸಿದೆ.
ಕ್ರಿಕೆಟ್ ಆಸ್ಟ್ರೇಲಿಯಾದ (Cricket Australia) ವ್ಯವಹಾರ ಕಾರ್ಯಾಚರಣೆಗಳ ಮುಖ್ಯಸ್ಥ ಫಿಲ್ ರಿಗ್ಬಿ, ಸ್ಟ್ರ್ಯಾಟಜಿ ಮುಖ್ಯಸ್ಥ ಮಾರ್ಗಾಟ್ ಹಾರ್ಲೆ ಇತ್ತೀಚೆಗೆ ಭಾರತಕ್ಕೆ ಭೇಟಿ ನೀಡಿದ್ದಾಗ, ಚೆನ್ನೈನಲ್ಲಿ ಬಿಬಿಎಲ್ ಆರಂಭಿಕ ಪಂದ್ಯ ಆಯೋಜಿಸುವ ಸಾಧ್ಯತೆಗಳನ್ನ ಪರಿಶೀಲಿಸಿದ್ದರು. ಹೀಗಾಗಿ ಭಾರತದಲ್ಲಿ ಬಿಬಿಎಲ್ ನಡೆಸಲು ಚಿಂತನೆ ನಡೆಯುತ್ತಿದೆ. ಇದರ ಮೊದಲ ಹಂತವಾಗಿ 2026 – 27ನೇ ಆವೃತ್ತಿಯ ಉದ್ಘಾಟನಾ ಪಂದ್ಯವನ್ನ ಚೆನ್ನೈನ ಚೆಪಾಕ್ ಕ್ರೀಡಾಂಗಣದಲ್ಲಿ ನಡೆಸಲು ಯೋಜನೆ ರೂಪಿಸಿದೆ.
ಭಾರತದತ್ತ ಚಿತ್ತ ಹರಿಸಿದ್ದು ಏಕೆ?
ಪ್ರಸಕ್ತ ವರ್ಷ ಭಾರತ ಮತ್ತು ಶ್ರೀಲಂಕಾದ ಜಂಟಿ ಆತಿಥ್ಯದಲ್ಲಿ ಟಿ0 ವಿಶ್ವಕಪ್ (T20 World Cup 2026) ಟೂರ್ನಿ ನಡೆಯುತ್ತಿದೆ. ಭಾರತದ ಮೈದಾನಗಳಲ್ಲಿ ನಡೆಯುತ್ತಿರುವ ಜಿಂಬಾಬ್ವೆ, ಕೆನಡಾ, ಯುಎಇ, ಆಸ್ಟ್ರೇಲಿಯಾ, ನ್ಯೂಜಿಲೆಂಡ್ ತಂಡಗಳ ಪಂದ್ಯ ವೀಕ್ಷಣೆಗೂ ಹೆಚ್ಚಿನ ಸಂಖ್ಯೆಯ ಪ್ರೇಕ್ಷಕರು ಸೇರುತ್ತಿದ್ದಾರೆ. ಹೀಗಾಗಿ ಆಸ್ಟ್ರೇಲಿಯಾ ಭಾರತದಲ್ಲಿ ಬಿಬಿಎಲ್ ಉದ್ಘಾಟನೆ ನೆರವೇರಿಸಲು ಚಿಂತಿಸಿದೆ.
ಈಗಾಗಲೇ ಆಸ್ಟ್ರೇಲಿಯಾದ ರಾಷ್ಟ್ರೀಯ ರಗ್ಬಿ ಲೀಗ್ (NRL) ಲಾಸ್ ವೇಗಾಸ್ನಲ್ಲಿ ನಡೆಯುತ್ತಿದೆ. 5 ವರ್ಷಗಳ ಕಾರ್ಯತಂತ್ರದ ಭಾಗವಾಗಿ 2028ರ ವರೆಗೆ ಪಂದ್ಯಗಳನ್ನ ಆಯೋಜಿಸುವ ಹಕ್ಕು ಪಡೆದುಕೊಂಡಿದೆ. ಇದು ಕ್ರೀಡಾ ಬೆಟ್ಟಿಂಗ್ ಮಾರುಕಟ್ಟೆ ಪ್ರವೇಶಿಸುವ ಜೊತೆಗೆ ಭವಿಷ್ಯದ ಅಂತಾರಾಷ್ಟ್ರೀಯ ಪ್ರಸಾರದ ಹಕ್ಕುಗಳನ್ನು ಪಡೆಯಲು ಅನುಕೂಲವಾಗಿದೆ. ಅದೇ ರೀತಿ ಆರಂಭದಲ್ಲಿ ದೇಶಿಯ ಪ್ರೇಕ್ಷಕರನ್ನೊಳಗೊಂಡು ಟೂರ್ನಿ ಆರಂಭಿಸಿದ ಆಸ್ಟ್ರೇಲಿಯಾ ಬಳಿಕ ಐಪಿಎಲ್ ಮಾದರಿಯಲ್ಲೇ ವಿದೇಶಿ ಆಟಗಾರರು ಪಾಲ್ಗೊಳ್ಳಲು ವಿಸ್ತರಿಸಿತು. ಇದೀಗ ದಕ್ಷಿಣ ಏಷ್ಯಾದ ಪ್ರೇಕ್ಷಕರನ್ನ ಸೆಳೆಯಲು ಭಾರತದಲ್ಲಿ ಬಿಬಿಎಲ್ ಆಯೋಜನೆಗೆ ಪ್ಲ್ಯಾನ್ ಮಾಡಿದೆ.
ಏನಿದು ಬಿಗ್ ಬ್ಯಾಷ್ ಲೀಗ್?
ಇಂಡಿಯನ್ ಪ್ರೀಮಿಯರ್ ಲೀಗ್ನಂತೆ ಬಿಗ್ ಬ್ಯಾಷ್ ಲೀಗ್ (BBL) ಕೂಡ ಆಸ್ಟ್ರೇಲಿಯಾದ ಪ್ರಮುಖ ವೃತ್ತಿಪರ ಟಿ20 (T20) ಕ್ರಿಕೆಟ್ ಟೂರ್ನಿಯಾಗಿದೆ. 2011 ರಲ್ಲಿ ಕ್ರಿಕೆಟ್ ಆಸ್ಟ್ರೇಲಿಯಾದಿಂದ ಸ್ಥಾಪಿತವಾದ ಈ ಲೀಗ್, ಪ್ರತಿವರ್ಷ ಡಿಸೆಂಬರ್-ಫೆಬ್ರವರಿ ನಡುವೆ ನಡೆಯುತ್ತದೆ. ಎಂಟು ಫ್ರಾಂಚೈಸಿಗಳು ಇದರಲ್ಲಿ ಭಾಗವಹಿಸುತ್ತವೆ. ಇದು ವಿಶ್ವದ ಜನಪ್ರಿಯ ಟಿ20 ಲೀಗ್ಗಳಲ್ಲಿ ಒಂದಾಗಿದೆ. ಆಕ್ರಮಣಕಾರಿ ಬ್ಯಾಟಿಂಗ್ ಮತ್ತು ಮನರಂಜನೆಗೆ ಹೆಸರುವಾಸಿಯಾದ ಟೂರ್ನಿಯಾಗಿದೆ.
ಬಿಬಿಎಲ್ನ ಫ್ರ್ಯಾಂಚೈಸಿಗಳು ಯಾವುದು?
ಮೆಲ್ಬೋರ್ನ್ ಸ್ಟಾರ್ಸ್, ಮೆಲ್ಬೋರ್ನ್ ರೆನೆಗೇಡ್ಸ್, ಸಿಡ್ನಿ ಸಿಕ್ಸರ್ಸ್, ಸಿಡ್ನಿ ಥಂಡರ್, ಪರ್ತ್ ಸ್ಕಾರ್ಚರ್ಸ್, ಅಡಿಲೇಡ್ ಸ್ಟ್ರೈಕರ್ಸ್, ಬ್ರಿಸ್ಬೇನ್ ಹೀಟ್ ಮತ್ತು ಹೋಬರ್ಟ್ ಹರಿಕೇನ್ಸ್.
ಪಾಕ್ ಆಟಗಾರರು ಭಾರತಕ್ಕೆ ಬರ್ತಾರಾ?
ಸದ್ಯ ಬಿಬಿಎಲ್ನಲ್ಲಿ ಆಸ್ಟ್ರೇಲಿಯಾ, ಇಂಗ್ಲೆಂಡ್, ದಕ್ಷಿಣ ಆಫ್ರಿಕಾ ಹಾಗೂ ಪಾಕಿಸ್ತಾನ ಆಟಗಾರರು ಹೆಚ್ಚಾಗಿ ಪಾಲ್ಗೊಳ್ಳುತ್ತಿದ್ದಾರೆ. ಎಸ್ಎ ಟಿ20 ಲೀಗ್ನಲ್ಲಿ ಕೆಲ ಭಾರತೀಯ ಆಟಗಾರರು ಪಾಲ್ಗೊಳ್ಳುತ್ತಿದ್ದಾರೆ. ಒಂದು ವೇಳೆ ಭಾರತದಲ್ಲಿ ಉದ್ಘಾಟನಾ ಪಂದ್ಯ ನಡೆದ್ರೆ, ಪಾಕ್ ಆಟಗಾರರು ಭಾರತಕ್ಕೆ ಬರ್ತಾರಾ ಎಂಬುದನ್ನು ಕಾದುನೋಡಬೇಕಿದೆ.
