ಚಿಕ್ಕಬಳ್ಳಾಪುರ: ಚುನಾವಣೆಗೂ ಮುನ್ನವೇ ಪ್ರತಿ ಯೂನಿಟ್ ಗೆ 30 ಪೈಸೆ ದರ ಏರಿಕೆ ಮಾಡಿ ಗ್ರಾಹಕರಿಗೆ ಶಾಕ್ ನೀಡಿದ್ದ ಬೆಸ್ಕಾಂ, ಈಗ ಮತ್ತೊಂದು ಶಾಕ್ ಕೊಟ್ಟಿದೆ.
ಹೌದು. ಪ್ರತಿ ವರ್ಷದಂತೆ ಈ ಬಾರಿಯೂ ವಾರ್ಷಿಕ ವಿದ್ಯುತ್ ಬಳಕೆಗೆ ಅನುಗುಣವಾಗಿ ಪ್ರತಿಯೊಬ್ಬ ಗ್ರಾಹಕರು ಹೆಚ್ಚುವರಿ ಯೂನಿಟ್ ಗಳ ಬಳಕೆ ಆಧಾರದ ಮೇಲೆ ಹೆಚ್ಚುವರಿ ಡಿಪಾಸಿಟ್ ಹಣ ಪಾವತಿ ಮಾಡುವಂತೆ ಗ್ರಾಹಕರಿಗೆ ಬೆಸ್ಕಾಂ ಡಿಮ್ಯಾಂಡ್ ನೋಟಿಸ್ ವಿತರಿಸುತ್ತಿದೆ.
ಜೂನ್ ತಿಂಗಳ ವಿದ್ಯುತ್ ಬಿಲ್ ಜೊತೆ ಜೊತೆಗೆ ಇಡೀ ವರ್ಷ ಬಳಸಿರುವ ಹೆಚ್ಚುವರಿ ಯೂನಿಟ್ ಗಳ ಆಧಾರದ ಮೇಲೆ ಇಂತಿಷ್ಟು ಅಂತ ಹೆಚ್ಚುವರಿ ಭದ್ರತಾ ಠೇವಣಿ ಪಾವತಿಸುವಂತೆ ಗ್ರಾಹಕರಿಗೆ ಬೆಸ್ಕಾಂ ನೋಟಿಸ್ ನೀಡಿದೆ. ವಿದ್ಯುತ್ ಬಿಲ್ ಜೊತೆಗೆ ಹೆಚ್ಚುವರಿ ಭದ್ರತಾ ಹಣದ ನೋಟಿಸ್ ನೋಡ್ತಿರೋ ಜನ ನಾವ್ಯಾಕೆ ಹೆಚ್ಚುವರಿ ಹಣ ಕಟ್ಟಬೇಕು ಅಂತ ಕಕ್ಕಾ ಬಿಕ್ಕಿಯಾಗಿ ಗೊಂದಲಕ್ಕೀಡಾಗುತ್ತಿದ್ದಾರೆ.
ಬೆಸ್ಕಾಂ ನ ನಿಯಮದಂತೆ ವಿದ್ಯುತ್ ಕನೆಕ್ಷನ್ ಪಡೆದು ಮೀಟರ್ ಆಳವಡಿಕೆ ವೇಳೆ ಇಂತಿಷ್ಟು ಯೂನಿಟ್ ಗಳ ಬಳಕೆಗೆ ಇಂತಿಷ್ಟು ಹಣ ಅಂತ ಭದ್ರತಾ ಠೇವಣಿ ಪಾವತಿಸಿರಲಾಗಿರುತ್ತೆ. ಆದ್ರೆ ಆ ಯೂನಿಟ್ ಗಳ ಬಳಕೆ ಮೀರಿ ಹೆಚ್ಚುವರಿ ಯೂನಿಟ್ ಬಳಕೆ ಮಾಡಿದ್ದಲ್ಲಿ, ಅದಕ್ಕೂ ಮಾಮೂಲಿ ನಿಗದಿತ ಯೂನಿಟ್ ದರದ ಹಣಕ್ಕಿಂತ ಹೆಚ್ಚುವರಿಯಾಗಿ ದರ ವಸೂಲಿ ಕೂಡ ಮಾಡುತ್ತೆ. ಅದಲ್ಲದೆ ವಾರ್ಷಿಕ ವಿದ್ಯುತ್ ಬಳಕೆಗೆ ಅನುಗುಣವಾಗಿ ಹೆಚ್ಚುವರಿ ಭದ್ರತಾ ಠೇವಣಿ ಕೂಡ ಪಾವತಿಸಿ ಅಂತ ಪ್ರತಿ ವರ್ಷ ಡಿಮ್ಯಾಂಡ್ ನೋಟಿಸ್ ನೀಡೋದು ಎಷ್ಟರ ಮಟ್ಟಿಗೆ ಸರಿ ಅನ್ನೋದು ಗ್ರಾಹಕರ ಪ್ರಶ್ನೆಯಾಗಿದೆ.
ಅಸಲಿಗೆ ಗ್ರಾಹಕರಿಂದ ಪಡೆಯುವ ಡಿಪಾಸಿಟ್ ಹಣವನ್ನು ವಿದ್ಯುತ್ ಕನೆಕ್ಷನ್ ಡಿಸ್ಕನೆಕ್ಟ್ ಮಾಡಿದ ಸಂದರ್ಭದಲ್ಲಿ ಬಡ್ಡಿ ಸಮೇತ ಹಣವನ್ನು ಬೆಸ್ಕಾಂ ವಾಪಾಸ್ ನೀಡುತ್ತೆ. ಆದ್ರೆ ಮೊದಲೇ ತಿಂಗಳ ಕರೆಂಟ್ ಬಿಲ್ ಕಟ್ಟೋಕೆ ಕಷ್ಟ ಪಡೋ ಹಲವು ಕುಟುಂಬಗಳಿಗೆ ಪ್ರತಿ ವರ್ಷವೂ ಈ ರೀತಿ ಡಿಪಾಸಿಟ್ ಏರಿಕೆ ಮಾಡ್ತಾ ಹೋದ್ರೇ ಕಟ್ಟೋದು ಹೇಗೆ ಅಂತ ಗ್ರಾಹಕರು ಚಿಂತಿತರಾಗಿದ್ದಾರೆ.