ಬೆಂಗಳೂರು: ವೀಕೆಂಡ್ ಬಂತು ಅಂದರೆ ಸಾಕು ರಸ್ತೆಗಳಲ್ಲಿ ಖಾಸಗಿ ಬಸ್ ಗಳ ದರ್ಬಾರ್ ನಡೆಯುತ್ತದೆ. ಹೇಳೋರು ಕೇಳೋರು ಯಾರೂ ಇಲ್ಲದ ರೀತಿಯಲ್ಲಿ ಇವರದ್ದೇ ರಸ್ತೆಗಳಾಗಿರುತ್ತವೆ. ರೋಡ್ ನಲ್ಲಿ ಎಲ್ಲಿ ಬೇಕಾದ್ರೂ ಪಾರ್ಕಿಂಗ್ ಮಾಡಿಕೊಂಡು ಪ್ರಯಾಣಿಕರಿಗಾಗಿ ಕಾಯುತ್ತಾರೆ.
ಹೌದು. ಹೊಸ ಟ್ರಾಫಿಕ್ ಫೈನ್ ಬಂದ ಬಳಿಕ ವಾಹನ ಸವಾರರು ಹೈರಾಣಾಗಿ ಹೋಗಿದ್ದಾರೆ. ಟ್ರಾಫಿಕ್ ಪೊಲೀಸರು ಸಿಕ್ಕ-ಸಿಕ್ಕ ಕಡೆ ತಪಾಸಣೆ ಮಾಡುತ್ತಾ ಒಂದಲ್ಲೊಂದು ರೀತಿಯಲ್ಲಿ ಫೈನ್ ಹಾಕುತ್ತಾ ವಾಹನ ಸವಾರರಲ್ಲಿ ಭಯ ಉಂಟುಮಾಡಿದ್ದಾರೆ. ಆದರೆ ಈ ಪ್ರೈವೇಟ್ ಬಸ್ಸುಗಳ ದರ್ಬಾರ್ ಮಾತ್ರ ಸ್ವಲ್ಪವೂ ಕಡಿಮೆಯಾಗಿಲ್ಲ.
ಅದರಲ್ಲೂ ವೀಕೆಂಡ್ ಗಳಲ್ಲಿ ಅತಿಹೆಚ್ಚು ಸಂಖ್ಯೆಯಲ್ಲಿ ರಸ್ತೆಗಿಳಿಯುವ ಬಸ್ ಗಳಿಂದ ಟ್ರಾಫಿಕ್ ಜಾಮ್ ಹೆಚ್ಚಾಗುತ್ತಿದೆ. ರಾತ್ರಿ 8 ಗಂಟೆಯಿಂದ 12 ಗಂಟೆಯವರೆಗೆ ನಗರದ ನವರಂಗ್ ಹಾಗೂ ಗೋವರ್ಧನ್ ಜಂಕ್ಷನ್ ಗಳಲ್ಲಿ ಪ್ರಯಾಣಿಕರನ್ನು ಪಿಕ್ ಅಪ್ ಮಾಡುವ ಖಾಸಗಿ ಬಸ್ಸುಗಳಿಂದ ಭಾರೀ ಜಾಮ್ ಉಂಟಾಗುತ್ತಿದೆ. ರೋಡ್ ನಮ್ಮದೇ ಅನ್ನೋ ಹಾಗೆ ಪಾರ್ಕ್ ಮಾಡಿಕೊಂಡು ಬೇರೆ ವಾಹನಗಳಿಗೆ ತೊಂದರೆ ಕೊಡುತ್ತಿದ್ದಾರೆ.
ಇದು ನಿನ್ನೆ ಮೊನ್ನೆಯ ಕಥೆಯಲ್ಲ, ಪ್ರತಿವಾರದ ಕೊನೆಯಲ್ಲಿ ನವರಂಗ್ ಹಾಗೂ ಗೋವರ್ಧನ್ ಜಂಕ್ಷನ್ ನಲ್ಲಿ ಕಂಡುಬರೋ ಸಾಮಾನ್ಯ ದೃಶ್ಯವಾಗಿದೆ. ರಾಂಗ್ ಪಾರ್ಕಿಂಗ್ ಗೆ ನಿನ್ನೆವರೆಗೂ 1,000 ರೂಪಾಯಿ ಫೈನ್ ಇತ್ತು. ಆದರೂ ಯಾವ ಪೊಲೀಸರೂ ಇವರ ಮೇಲೆ ಫೈನ್ ಹಾಕಿಲ್ಲ. ನಿನ್ನೆಯಿಂದ ಫೈನ್ ರೇಟ್ ಕೂಡ ಕಡಿಮೆ ಮಾಡಿದ್ದಾರೆ. ಹೀಗಾಗಿ ರಸ್ತೆ ತುಂಬಾ ಪಾರ್ಕ್ ಮಾಡಿಕೊಂಡು ಬೇರೆ ವಾಹನಗಳಿಗೆ ತೊಂದರೆ ಕೊಡದಂತೆ ಎಚ್ಚರ ವಹಿಸುವ ಕೆಲಸ ಟ್ರಾಫಿಕ್ ಪೊಲೀಸರು ಮಾಡಬೇಕಾಗಿದೆ.