ಬೆಂಗಳೂರು: ಮಂಗಳವಾರ ಹೊಸ ವರ್ಷವನ್ನ ರಾಜಧಾನಿಯ ಜನ ಅದ್ಧೂರಿಯಾಗಿ ಸ್ವಾಗತಿಸಿದರು. ಈ ನಡುವೆ ನಗರದ ಎಂಜಿ ರೋಡ್‍ನಲ್ಲಿ ನ್ಯೂ ಇಯರ್ ಜೋಶ್‍ನಲ್ಲಿ ಕುಡಿದ ಮತ್ತಿನಲ್ಲಿದ್ದ ಯುವಕನೊಬ್ಬ ಬಹುಮಡಿ ಕಟ್ಟಡವೇರಿ ಸೆಲ್ಫಿ ತೆಗೆದುಕೊಂಡು ಕೆಲಕಾಲ ಆತಂಕದ ವಾತವರಣ ಸೃಷ್ಟಿಸಿದ್ದನು.
ಈ ಕುಡುಕನ ಅವಾಂತರ ಕಂಡ ಜನರು ಗಾಬರಿಗೊಂಡಿದ್ದರು. ಕೆಳಗಿಳಿಯುವಂತೆ ಜನ ಎಷ್ಟೇ ಕೂಗಾಡಿದರೂ ಕುಡಿತದ ನಶೆಯಲ್ಲಿದ್ದ ಅಸಾಮಿ ಮಾತ್ರ ಕ್ಯಾರೇ ಎಂದಿಲ್ಲ. ಈ ವೇಳೆ ಯುವಕ ಏರಿದ ಕಟ್ಟಡದ ಮುಂದೆ ಜನ ದೊಡ್ಡ ಮಟ್ಟದಲ್ಲಿ ಜಮಾಯಿಸಿದ್ದರು. ಕೆಳಗಿಳಿದು ಬನ್ನಿ ಎಂದು ಜೋರಾಗಿ ಜನರು ಕೂಗಾಡಲು ಪ್ರಾರಂಭಿಸಿದರು.
ಜನ ಸೇರಿದ್ದನ್ನ ಗಮನಿಸಿ ಪೊಲೀಸರು ಕೂಡ ಸ್ಥಳಕ್ಕೆ ಬಂದರು. ಆದರೆ ಅಷ್ಟರೊಳಗೆ ಆ ಯುವಕ ತನ್ನ ಪಾಡಿಗೆ ತಾನು ಸೆಲ್ಫಿ ಕ್ಲಿಕ್ಕಿಸಿಕೊಂಡು ಅಲ್ಲಿಂದ ಕಾಲ್ಕಿತ್ತಿದ್ದನು.
