ದುನಿಯಾ ವಿಜಿ ಅಭಿಮಾನಿ, ಪವರ್ ಲಿಫ್ಟರ್ ಗೆ ಒಲಿಂಪಿಕ್ಸ್ ನಲ್ಲಿ ಭಾಗವಹಿಸೋ ಆಸೆ- ಜಿಮ್ ಸಲಕರಣೆಗೆ ಬೇಕಿದೆ ಸಹಾಯ

ಬಳ್ಳಾರಿ: ಮನೆಯಲ್ಲಿ ಕಿತ್ತು ತಿನ್ನುವ ಬಡತನವಿದ್ರೂ ಇವರಿಗೆ ಏನಾನದ್ರೂ ಸಾಧಿಸಬೇಕೆಂಬ ಹಂಬಲ. ದುನಿಯಾ ವಿಜಿ ಅಭಿಮಾನಿಯಾಗಿರೋ ಈ ಪವರ್ ಲಿಫ್ಟರ್‍ ಗೆ ಒಲಿಪಿಂಕ್ಸ್ ನಲ್ಲಿ ಭಾಗವಹಿಸುವ ಆಸೆ. ಈಗಾಗಲೇ ದೇಶಕ್ಕಾಗಿ ಹತ್ತಾರು ಬಹುಮಾನ ಗೆದ್ದುಕೊಟ್ಟಿದ್ದಾರೆ.

ಜಿಲ್ಲೆಯ ಹೊಸಪೇಟೆ ತಾಲೂಕಿನ ಹೊಸಮಲಪನಗುಡಿ ಗ್ರಾಮದ ನಿವಾಸಿಯಾಗಿರೋ ವಲಿಭಾಷಾ ಜಿಮ್ ಸಲಕರಣೆಗಳಿಗಾಗಿ ಬೆಳಕು ಕಾರ್ಯಕ್ರಮಕ್ಕೆ ಬಂದಿದ್ದಾರೆ. ಅನಕ್ಷರಸ್ಥರಾಗಿರುವ ವಲಿಭಾಷಾ ಟಾಟಾ ಏಸ್ ವಾಹನದ ಡ್ರೈವರ್ ಆಗಿ ಕೆಲಸ ಮಾಡಿಕೊಂಡಿದ್ದಾರೆ. 33 ವರ್ಷದ ವಲೀಭಾಷಾರಿಗೆ ವೇಯ್ಟ್ ಲಿಫ್ಟಿಂಗ್ ನಲ್ಲಿ ಏನಾದ್ರೂ ಸಾಧಿಸಬೇಕೆಂಬ ಕನಸು ಇದೆ. ಆದ್ರೆ ಈ ಕನಸಿಗೆ ಬಡತನ ಅಡ್ಡಿಯಾಗಿದೆ.

ನಾಲ್ಕು ಮಕ್ಕಳ ತಂದೆಯಾಗಿರುವ ವಲೀಭಾಷಾರ ಮೇಲೆ ಮನೆಯ ಸಂಪೂರ್ಣ ಜವಬ್ದಾರಿಯಿದೆ. ಬರೋಬ್ಬರಿ 125 ಕೆಜಿ ತೂಕವನ್ನು ಸರಳವಾಗಿ ಎತ್ತೋ ವಲೀಭಾಷಾರಿಗೆ ಜಿಮ್ ಸಲಕರಣೆಗಳೊಂದಿಗೆ ಸೂಕ್ತ ತರಬೇತಿ ಬೇಕಾಗಿದೆ. ಇದೂವರೆಗೂ 6 ಬಾರಿ ರಾಷ್ಟ್ರಮಟ್ಟದ ಕ್ರೀಡಾಕೂಟ, 8 ಬಾರಿ ರಾಜ್ಯ ಮಟ್ಟದ ಕ್ರೀಡಾಕೂಟದಲ್ಲಿ ಭಾಗವಹಿಸಿ ಪವರ್ ಲಿಫ್ಟಿಂಗ್‍ ನಲ್ಲಿ ಹಲವಾರು ಬಹುಮಾನ ಸಹ ಗೆದ್ದಿದ್ದಾರೆ. ಅಲ್ಲದೇ ಕಳೆದ ತಿಂಗಳು ಥೈಲ್ಯಾಂಡ್‍ ನ ಪಟಾಯಂನಲ್ಲಿ ನಡೆದ ಇಂಡಿಯನ್ ಓಪನ್ ಇಂಟರ್ ನ್ಯಾಷನಲ್ ಬೆಂಚ್ ಪ್ರೇಸ್ ಕ್ರೀಡಾಕೂಟದಲ್ಲಿ 66 ಕೆಜಿ ವಿಭಾಗದಲ್ಲಿ ಬರೋಬ್ಬರಿ 125 ಕೆಜಿ ಪವರ್ ಲಿಫ್ಟ್ ಮಾಡೋ ಮೂಲಕ ಇತಿಹಾಸ ಸೃಷ್ಟಿಸಿದ್ದಾರೆ.

ದೇಶದ ಪರವಾಗಿ ಓಪನ್ ಇಂಟರ್ ನ್ಯಾಷನಲ್ ಕ್ರೀಡಾಕೂಟದಲ್ಲಿ ಭಾಗವಹಿಸಿ ಅತಿ ಹೆಚ್ಚು ತೂಕ ಎತ್ತೋ ಈ ಕ್ರೀಡಾಪಟುವಿಗೆ ಇದೂವರೆಗೂ ಕ್ರೀಡಾ ಇಲಾಖೆ ಸಹಾಯ ಮಾಡೋದಿರಲಿ ಸಣ್ಣ ಸನ್ಮಾನವನ್ನು ಸಹ ಮಾಡಿಲ್ಲ. ಹೀಗಾಗಿ ಒಲಿಪಿಂಕ್ಸ್ ನಲ್ಲಿ ದೇಶದ ಪರವಾಗಿ ಪವರ್ ಲಿಫ್ಟಿಂಗ್‍ ನಲ್ಲಿ ಪದಕ ಗೆಲ್ಲೋ ಆಸೆ ಹೊಂದಿರುವ ಈ ವಲಿಭಾಷಾಗೆ ಇದೀಗ ಜಮ್ ಸೌಲಭ್ಯದ ಸಲಕರಣೆಗಳು ಮತ್ತು ತರಬೇತಿಯ ಸಹಾಯದ ಅವಶ್ಯಕತೆ ಎದುರಾಗಿದೆ.

ವಲಿಭಾಷಾರ ಕ್ರೀಡಾ ಕನಸಿಗೆ ಇದೂವರೆಗೂ ಹೊಸಪೇಟೆಯ ಗುಡ್‍ ಲಕ್ ಜಿಮ್ ಉಚಿತವಾಗಿ ತರಬೇತಿ ನೀಡಿದ್ರೆ, ವೈದ್ಯ ಮಲ್ಲಿಕಾರ್ಜುನರು ತಮ್ಮ ಕೋಳಿ ಫಾರ್ಮ್‍ನಲ್ಲಿ ಕೆಲಸ ನೀಡುವ ಮೂಲಕ ಸಹಾಯ ಮಾಡುತ್ತಾ ಬಂದಿದ್ದಾರೆ. ಆದ್ರೆ ದುನಿಯಾ ವಿಜಿಯ ಕಟ್ಟಾ ಅಭಿಮಾನಿಯಾಗಿರುವ ವಲಿಭಾಷಾಗೆ ಇದೀಗ ಪವರ್ ಲಿಫ್ಟಿಂಗ್ ಮಾಡಲು ಬೇಕಾಗುವ ಜಿಮ್ ಸಾಮಾಗ್ರಿಗಳು ಮತ್ತು ಸೂಕ್ತವಾದ ಒಂದು ಉದ್ಯೋಗ ಬೇಕಾಗಿದೆ.

ಜಿಮ್ ಸಾಮಾಗ್ರಿಗಳು ಸಿಕ್ಕರೂ ಸಹ ಒಲಪಿಂಕ್ಸ್ ಗೇಮ್ಸ್ ಗೆ ಬೇಕಾಗೋ ತಯಾರಿ ಮಾಡಿಕೊಂಡು ಪವರ್ ಲಿಫ್ಟಿಂಗ್ ಮಾಡಿ ಚಿನ್ನದ ಪದಕ ಗೆಲ್ಲುವ ಕನಸು ಕಾಣುತ್ತಿರುವ ಈ ಕ್ರೀಡಾಪಟುವಿಗೆ ಸಹಾಯ ಮಾಡಲು ದಾನಿಗಳು ಮುಂದಾಗಬೇಕಿದೆ.