ನಗೋಯಾ: ಐಚಿ-ನಗೋಯಾದಲ್ಲಿ ನಡೆಯುತ್ತಿರುವ ಏಷ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ (Asian Para Games) ಶೀತಲ್ ದೇವಿ (Sheetal Devi) ಅವರು ಮಹಿಳೆಯರ ವೈಯಕ್ತಿಕ ಕಾಂಪೌಂಡ್ ವಿಭಾಗದಲ್ಲಿ ಚಿನ್ನದ ಪದಕ ಗೆಲ್ಲುವ ಮೂಲಕ ತಮ್ಮ ಅದ್ಭುತ ಪ್ರದರ್ಶನವನ್ನು ಮುಂದುವರಿಸಿದ್ದಾರೆ. ರೋಚಕವಾಗಿ ಕಮ್‌ಬ್ಯಾಕ್ ಮಾಡಿದ ಅವರು, ಸಿಂಗಾಪುರದ ನೂರ್ ಸಯಾಹಿದಾ ಅಲಿಮ್ ಅವರನ್ನು 142-139 ಅಂತರದಿಂದ ಸೋಲಿಸಿದರು. ಈ ಗೆಲುವಿನೊಂದಿಗೆ ಅವರು ಈ ಕ್ರೀಡಾಕೂಟದಲ್ಲಿ ತಮ್ಮ ಮೂರನೇ ಪದಕವನ್ನು ಪಡೆದಂತಾಗಿದೆ.
ಇದಕ್ಕೂ ಮುನ್ನ ಅವರು ತೋಮನ್ ಕುಮಾರ್ ಅವರೊಂದಿಗೆ ಕಾಂಪೌಂಡ್ ಮಿಶ್ರ ತಂಡ ವಿಭಾಗದಲ್ಲಿ ಚಿನ್ನ (ಈ ಜೋಡಿ 1,402 ಅಂಕಗಳೊಂದಿಗೆ ವಿಶ್ವ ದಾಖಲೆ ನಿರ್ಮಿಸಿತ್ತು) ಹಾಗೂ ಮಹಿಳೆಯರ ಡಬಲ್ಸ್ ವಿಭಾಗದಲ್ಲಿ ಬೆಳ್ಳಿ ಪದಕವನ್ನು ಗೆದ್ದಿದ್ದರು. ಇದನ್ನೂ ಓದಿ: Asian Para Games: ಡಿಸ್ಕಸ್ ಎಸೆತದಲ್ಲಿ ಚಿನ್ನ ಗೆದ್ದ ಸುವರ್ಣ ರಾಜ್
ಮಹಿಳೆಯರ ಡಿಸ್ಕಸ್ ಥ್ರೋ (F54 ವಿಭಾಗ) ಸ್ಪರ್ಧೆಯಲ್ಲಿ ಸುವರ್ಣಾ ರಾಜ್ ಚಿನ್ನದ ಪದಕವನ್ನು ತಮ್ಮದಾಗಿಸಿಕೊಂಡರು. ಮತ್ತೊಂದೆಡೆ, ಮಹಿಳೆಯರ W1 ವಿಭಾಗದಲ್ಲಿ ಸ್ವಾತಿ ಚೌಧರಿ ಅವರು ಚೀನಾದ ಸೆನ್ ಮೆಂಗ್‌ಕಾನ್ ವಿರುದ್ಧ 4-6 ಅಂತರದಲ್ಲಿ ಪೈಪೋಟಿ ನಡೆಸಿ ಸೋತರೂ, ಭಾರತಕ್ಕೆ ಐತಿಹಾಸಿಕ ಬೆಳ್ಳಿ ಪದಕವನ್ನು ತಂದುಕೊಟ್ಟರು.
ಪ್ಯಾರಾ-ಅಥ್ಲೆಟಿಕ್ಸ್‌ನಲ್ಲಿ, ಪುರುಷರ ಹೈ ಜಂಪ್ (T63 ವಿಭಾಗ) ಫೈನಲ್‌ನಲ್ಲಿ ಶೈಲೇಶ್ ಕುಮಾರ್, ರಾಹುಲ್ ಮತ್ತು ವರುಣ್ ಭಾಟಿ ಸ್ಪರ್ಧಿಸುತ್ತಿದ್ದಾರೆ. ಮಹಿಳೆಯರ 400 ಮೀಟರ್ ಓಟದ (T47 ವಿಭಾಗ) ಫೈನಲ್‌ನಲ್ಲಿ ಅಂಜನಾಬೆನ್ ಬುಂಬಡಿಯಾ ಮತ್ತು ಜಯಂತಿ ಬೆಹೆರಾ ಕಣಕ್ಕಿಳಿದಿದ್ದಾರೆ. ಇದನ್ನೂ ಓದಿ: Asian Para Games: ಮತ್ತೊಂದು ಚಿನ್ನ ಗೆದ್ದ ಸಿಮ್ರಾನ್ ಶರ್ಮಾ
ಪುರುಷರ ಜಾವೆಲಿನ್ ಥ್ರೋ (F56/F57 ವಿಭಾಗ) ಫೈನಲ್‌ನಲ್ಲಿ ಪರ್ವೀನ್ ಕುಮಾರ್ ಭಾಗವಹಿಸುತ್ತಿದ್ದರೆ, ಪುರುಷರ ಲಾಂಗ್ ಜಂಪ್ (T44/T62/T64 ವಿಭಾಗ) ಫೈನಲ್‌ನಲ್ಲಿ ಸೋಲೈರಾಜ್ ಧರ್ಮರಾಜ್ ಸ್ಪರ್ಧಿಸುತ್ತಿದ್ದಾರೆ.
