ಅನೂಪ್ ಭಂಡಾರಿ ಮುಂದಿನ ಸಿನಿಮಾ ‘ಬಿಲ್ಲ ರಂಗಾ ಬಾಷಾ’ ಫಿಕ್ಸ್: ಸುದೀಪ್ ಹೀರೋ

ವಿಕ್ರಾಂತ್ ರೋಣ ಸಿನಿಮಾದ ನಂತರ ನಿರ್ದೇಶಕ ಅನೂಪ್ ಭಂಡಾರಿ (Anoop Bhandari) ಯಾವ ಸಿನಿಮಾವನ್ನು ಕೈಗೆತ್ತಿಕೊಳ್ಳಲಿದ್ದಾರೆ ಎನ್ನುವ ಕುತೂಹಲ ಎಲ್ಲರಲ್ಲೂ ಇದೆ. ಅದರಲ್ಲೂ ಅನೂಪ್ ಮತ್ತು ಸುದೀಪ್ (Sudeep) ಮತ್ತೆ ಒಂದಾಗಿ ಸಿನಿಮಾ ಮಾಡಲಿದ್ದಾರೆ ಎನ್ನುವ ಸುದ್ದಿಯೂ ಇದೆ. ಈ ಹಿಂದೆ ಮಾಡಬೇಕಿದ್ದ ಬಿಲ್ಲ ರಂಗಾ ಬಾಷಾ ರಂಗಾ ಬಾಷಾ (Billa Ranga Basha) ಸಿನಿಮಾವನ್ನು ಮತ್ತೆ ಅವರು ಶುರು ಮಾಡಲಿದ್ದಾರೆ ಎನ್ನುವ ಚರ್ಚೆ ಕೂಡ ನಡೆದಿದೆ. ಈ ಎಲ್ಲದಕ್ಕೂ ಉತ್ತರ ನೀಡುವಂತೆ ಅನೂಪ್ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ವೊಂದನ್ನು ಹಾಕಿದ್ದಾರೆ.

ಕಿಚ್ಚ ಸುದೀಪ್ ಮತ್ತು ಅನೂಪ್ ಭಂಡಾರಿ ಕಾಂಬಿನೇಷನ್ ನ ‘ವಿಕ್ರಾಂತ್ ರೋಣ’ ದೊಡ್ಡ ಮಟ್ಟದಲ್ಲೇ ಹಿಟ್ ಆಗಲಿದೆ ಎಂದು ಸಿನಿಪಂಡಿತರ ಲೆಕ್ಕಾಚಾರವಾಗಿತ್ತು. ಬಾಕ್ಸ್ ಆಫೀಸಿಗೆ 500 ಕೋಟಿ ಹರಿದು ಬರಲಿದೆ ಎಂದು ಅಂದಾಜಿಸಲಾಗಿತ್ತು. ಆದರೆ, ಅದು ಸಾಧ್ಯವಾಗಲಿಲ್ಲ. ಹಾಗಂತ ಸಿನಿಮಾ ಸೋಲಲಿಲ್ಲ. ನಿರೀಕ್ಷಿತ ಮಟ್ಟಕ್ಕೆ ಗೆಲ್ಲಲಿಲ್ಲವಷ್ಟೇ. ಹಾಗಾಗಿ ಹಿಂದಿನ ಎಲ್ಲ ನೋವನ್ನು ಹೊಸ ಸಿನಿಮಾದ ಮೂಲಕ ನಿವಾರಿಸಿಕೊಳ್ಳಲು ಅನೂಪ್ ಸಿದ್ಧವಾದಂತೆ ಕಾಣುತ್ತಿದೆ. ಇದನ್ನೂ ಓದಿ ಸ್ವೀಟ್‌ ಹಾರ್ಟ್‌ಗೆ ವಿಶ್‌ ಮಾಡಿದ ರಿಷಬ್ ಶೆಟ್ಟಿ

ವಿಕ್ರಾಂತ್ ರೋಣ ಸಿನಿಮಾಗೂ ಮುನ್ನ ಅನೂಪ್ ‘ಬಿಲ್ಲ ರಂಗ ಬಾಷಾ’ ಚಿತ್ರವನ್ನು ಮಾಡಬೇಕಿತ್ತು. ಪೋಸ್ಟರ್ ಕೂಡ ರಿಲೀಸ್ ಆಗಿತ್ತು. ಆದರೆ, ಅದನ್ನು ಪಕ್ಕಕ್ಕಿಟ್ಟು ‘ವಿಕ್ರಾಂತ್ ರೋಣ’ ಚಿತ್ರ ಮಾಡಿದರು. ಕಿಚ್ಚನ ಪಾತ್ರದ ಆಯ್ಕೆಯ ಬಗ್ಗೆ ಮೆಚ್ಚುಗೆ ವ್ಯಕ್ತವಾಯಿತು. ಸಾಕಷ್ಟು ಸದ್ದು ಕೂಡ ಮಾಡಿತು. ಕನ್ನಡ ಸಿನಿಮಾವೊಂದು ದುಬೈನಲ್ಲಿ ಭಾರತದ ಬಾವುಟವನ್ನು ಹಾರಿಸುವ ಮೂಲಕ ದಾಖಲೆ ಮಾಡಿತು. ಈಗ ಈ ಜೋಡಿಯ ಮತ್ತೊಂದು ಸಿನಿಮಾದ ಸುಳಿವನ್ನು ಸ್ವತಃ ನಿರ್ದೇಶಕರೇ ನೀಡಿದ್ದಾರೆ.

ಅನೂಪ್ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ವೊಂದನ್ನು ಮಾಡಿದ್ದು, ‘ಬಿ’ ಗಿಯಾಗ್ ಕೂತ್ಕೋಳಿ, ‘ರಂ’ ಪಾಟ ಶುರುವಾಗೋಕ್ ಸ್ವಲ್ಪ ಸಮಯ ಬೇಕು. ‘ಬಾ’ ಡೂಟದ್ ಜೊತೆ ಬರ್ತೀವಿ. ಅಲ್ಲಿವರ್ಗೂ ಎಂದಿನ ಹಾಗೆ ತಾಳ್ಮೆ ಇರ್ಲಿ’ ಎಂದು ಬರೆದುಕೊಂಡಿದ್ದಾರೆ. ಕೆಲವು ಅಕ್ಷರಗಳಿಗೆ ಗ್ಯಾಪ್ ನೀಡುವ ಮೂಲಕ ತಮ್ಮ ಮುಂದಿನ ಸಿನಿಮಾ ಯಾವುದು ಎನ್ನುವುದರ ಸುಳಿವು ಬಿಟ್ಟು ಕೊಟ್ಟಿದ್ದಾರೆ.