ಸೆಕ್ಸ್‌ಗೆ ಸಹಕರಿಸಿದರೆ ಚಾನ್ಸ್ ಕೊಡಿಸುತ್ತೇನೆ ಎಂದ ಸಂಗೀತ ನಿರ್ದೇಶಕ ಅರೆಸ್ಟ್

– ನಗ್ನ ಚಿತ್ರ ಕಳಿಸಿ ಕಮೆಂಟ್ ಮಾಡು ಎಂದು ವಿಕೃತಿ
– ಚಿಟ್ಟೆ ಆಲ್ಬಂನಿಂದ ಫೇಮಸ್

ಬೆಂಗಳೂರು: ಸೆಕ್ಸ್‌ಗೆ ಸಹಕರಿಸಿದರೆ ಅವಕಾಶ ಕೊಡಿಸುತ್ತೇನೆ ಎಂದು ಮಹಿಳೆಗೆ ಮೆಸೇಜ್ ಕಳುಹಿಸಿದ್ದ ಸಂಗೀತ ನಿರ್ದೇಶಕನನ್ನು ಕುಮಾರಸ್ವಾಮಿ ಲೇಔಟ್ ಠಾಣೆಯ ಪೊಲೀಸರು ಬಂಧಿಸಿದ್ದಾರೆ.

ಮುರುಳೀಧರ್ ರಾವ್ ಬಂಧಿತ ಸಂಗೀತ ನಿರ್ದೇಶಕ(35). ರೇಖಾ(ಹೆಸರು ಬದಲಾಯಿಸಲಾಗಿದೆ) ಕುಮಾರಸ್ವಾಮಿ ಪೊಲೀಸ್ ಠಾಣೆಯ ಮೆಟ್ಟಿಲೇರಿ ಮುರುಳೀಧರ್ ರಾವ್ ವಿರುದ್ಧ ದೂರು ನೀಡಿದ್ದರು. ಐಪಿಸಿ ಸೆಕ್ಷನ್ 354(ಲೈಂಗಿಕ ಕಿರುಕುಳ) ಅಡಿ ಪ್ರಕರಣ ದಾಖಲಿಸಿದ ಪೊಲೀಸರು ಈಗ ಸಂಗೀತ ನಿರ್ದೇಶಕನನ್ನು ಬಂಧಿಸಿದ್ದಾರೆ.

ಸಿನಿಮಾಗಳು ಸೇರಿ ಹಲವು ಆಲ್ಬಂಗಳಿಗೆ ಮುರುಳೀಧರ್ ಸಂಗೀತ ನೀಡಿದ್ದಾನೆ. ಸಾಹಿತ್ಯದ ಜೊತೆಗೆ ಈತ ಮ್ಯೂಸಿಕ್ ಕಂಪೋಸಿಂಗ್ ಮಾಡುತ್ತಾನೆ. ಚಿಟ್ಟೆ ಆಲ್ಬಂನಿಂದಾಗಿ ಈತ ಫೇಮಸ್ ಆಗಿದ್ದು, ಹಲವು ಖ್ಯಾತ ಸಂಗೀತ ನಿರ್ದೇಶಕರ ಜೊತೆ ಕೆಲಸ ಮಾಡಿದ್ದಾನೆ. ಇತ್ತೀಚೆಗೆ ಕುಮಾರಸ್ವಾಮಿ ಲೇಔಟ್ ಬಳಿಯ ತನ್ನ ಮನೆಯಲ್ಲೇ ಮುರುಳೀಧರ್ ತನ್ನದೆ ಮ್ಯೂಸಿಕ್ ಸ್ಟುಡಿಯೋ ತೆರೆದಿದ್ದ.

ಫೇಸ್ ಬುಕ್ ಮೂಲಕ ಯುವತಿಯರ ನಂಬರ್ ಪಡೆದು ಮುರುಳೀಧರ್ ಧಾರಾವಾಹಿ ಹಾಗೂ ಸೀರೆಯ ಜಾಹೀರಾತಿನಲ್ಲಿ ನಟಿಸಲು ಅವಕಾಶ ಕೊಡಿಸುತ್ತೇನೆ ಎಂದು ಆಸೆ ಹುಟ್ಟಿಸಿ ಸ್ಟುಡಿಯೋಗೆ ಕರೆಸಿಕೊಂಡು ಕಿರುಕುಳ ನೀಡುತ್ತಿದ್ದ ಎನ್ನುವ ಆರೋಪ ಕೇಳಿ ಬಂದಿದೆ.

ದೂರಿನಲ್ಲಿ ಏನಿದೆ?
2017ರಲ್ಲಿ ಫೇಸ್‍ಬುಕ್ ಮೂಲಕ ಮುರಳೀಧರ್ ನನಗೆ ಪರಿಚಯವಾಗಿದ್ದ. ಈ ವರ್ಷದ ಜೂನ್ 14 ರಂದು ಮೆಸೆಂಜರ್‍ನಲ್ಲಿ ಸಂಪರ್ಕಿಸಿ, ಸೀರಿಯಲ್‍ನಲ್ಲಿ ನಟಿಸುವ ಆಸೆ ಇದೆಯೇ ಹಾಗೂ ಜಾಹೀರಾತಿನಲ್ಲಿ ನಟಿಸಲು ಇಷ್ಟ ಇದೆಯೇ ಎಂದು ಕೇಳಿದ್ದ ಅದಕ್ಕೆ ನಾನು ಒಪ್ಪಿಕೊಂಡಿದ್ದು, ನಂತರ ಆತನ ಮೊಬೈಲ್ ನಂಬರ್ ನೀಡಿದ್ದ. ಮುರಳೀಧರ್ ರಾವ್ ಜೊತೆ ವಾಟ್ಸಪ್‍ನಲ್ಲಿ ನಾನು ಚಾಟ್ ಮಾಡುತ್ತಿದ್ದೆ. ಮೆಸೇಜ್ ಮೂಲಕ ಪರಿಚಯವಾಗಿ ನಿಮ್ಮ ಜೊತೆ ಮಾತನಾಡಬೇಕಿದೆ. ಹೀಗಾಗಿ ಕುಮಾರಸ್ವಾಮಿ ಲೇಔಟ್‍ನಲ್ಲಿ ದಯಾನಂದ ಸಾಗರ ಕಾಲೇಜ್ ಬಳಿ ಇರುವ ನನ್ನ ಸ್ಟುಡಿಯೋಗೆ ಬನ್ನಿ ಎಂದು ಹೇಳಿದ್ದ.

ಭೇಟಿಯಾಗಲು ನಾನು ವಿಳಾಸ ಕೇಳಿದಾಗ ದಯಾನಂದ ಸಾಗರ ಕಾಲೇಜ್ ಹತ್ತಿರ ಬಂದು ಕರೆ ಮಾಡಿದಲ್ಲಿ ನಾನು ಬರುತ್ತೇನೆ ಎಂದು ತಿಳಿಸಿದ್ದ. ಮುರಳಿಧರ್ ರಾವ್ ಮೆಸೇಜ್ ಮಾಡುವ ಸಂದರ್ಭದಲ್ಲಿ ಅಸಭ್ಯವಾಗಿ ಮೆಸೇಜ್ ಮಾಡುತ್ತಿದ್ದ. ಅಲ್ಲದೇ ಆತ ಬೆತ್ತಲಾಗಿರುವ ಫೋಟೋಗಳನ್ನು ತನ್ನ ವಾಟ್ಸಪ್ ಸ್ಟೇಟಸ್‍ಗೆ ಹಾಕುತ್ತಿದ್ದ. ಇದರಿಂದ ನನಗೆ ಕಿರಿಕಿರಿಯಾಗಿ ನಾನು ಪ್ರಶ್ನೆ ಮಾಡಿದ್ದಕ್ಕೆ ಸೀರಿಯಲ್‍ನಲ್ಲಿ ನಟಿಸಬೇಕಾದರೆ ಕಿಸ್ ಮತ್ತು ಹಗ್ ಮಾಡಬೇಕು. ಅಷ್ಟೇ ಅಲ್ಲದೇ ಸೆಕ್ಸ್ ಮಾಡಬೇಕು ಎಂದು ಅಶ್ಲೀಲವಾಗಿ ಮೆಸೇಜ್ ಮಾಡಿದ್ದಾನೆ. ಅಷ್ಟೇ ಅಲ್ಲದೇ ಬೆತ್ತಲಾಗಿರುವ ಸುಮಾರು 7,8 ಫೋಟೋಗಳನ್ನು ನನ್ನ ವಾಟ್ಸಪ್‍ಗೆ ಕಳುಹಿಸಿ ಕಮೆಂಟ್ ಮಾಡು ಎಂದು ಹೇಳಿ ಲೈಂಗಿಕ ಕಿರುಕುಳ ನೀಡಿದ್ದಾನೆ. ಹೀಗಾಗಿ ಈತನ ವಿರುದ್ಧ ಕ್ರಮ ಕೈಗೊಳ್ಳಬೇಕು.