ಭೋಪಾಲ್: ನವವಿವಾಹಿತೆಯೊಬ್ಬಳು ಮದುವೆಯಾದ ಮರುದಿನವೇ ತನ್ನ ತವರು ಮನೆಗೆ ಹೋಗಿ ಪ್ರಿಯಕರನೊಂದಿಗೆ 2ನೇ ಮದುವೆಯಾದ ಘಟನೆ ಮಧ್ಯಪ್ರದೇಶದ ಭೋಪಾಲ್‍ನ ಸಾರನಿಯಲ್ಲಿ ನಡೆದಿದೆ.
ಸಂಜನಾ ಕಾತ್ಕರ್ ಪ್ರಿಯಕರನೊಂದಿಗೆ 2ನೇ ಮದುವೆಯಾದ ವಧು. ಫೆಬ್ರವರಿ 28 ರಂದು ಸಂಜನಾ, ನಿತೇಶ್ ನಾಗಲೇ ಎಂಬವರ ಜೊತೆ ವಿವಾಹವಾಗಿದ್ದಳು. ಅದ್ರೆ ಸಂಜನಾಗೆ ಈ ಮದುವೆ ಇಷ್ಟವಿರಲಿಲ್ಲ. ತನ್ನ ಕುಟುಂಬದ ಒತ್ತಾಯಕ್ಕಾಗಿ ನಿತೇಶ್ ಜೊತೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಳು.
ಸಂಪ್ರದಾಯದ ಪ್ರಕಾರ ಮದುವೆಯ ಮರುದಿನ ವಧು ತನ್ನ ತವರು ಮನೆಗೆ ಹೋಗಬೇಕು. ಹಾಗೆಯೇ ಸಂಜನಾ ತನ್ನ ತವರುಮನೆಗೆ ಹೋಗಿ ನಂತರ ಅಲ್ಲಿ ತನ್ನ ಪ್ರಿಯಕರನೊಂದಿಗೆ ಎರಡನೇ ಮದುವೆಯಾಗಿದ್ದಾಳೆ. ನಂತರ ಸಂಜನಾ ತನ್ನ ಪ್ರಿಯಕರನೊಂದಿಗೆ ಮದುವೆಯಾದ ಫೋಟೋವನ್ನು ತನ್ನ ಮೊದಲ ಪತಿ ನಿತೇಶ್ ಹಾಗೂ ಸಂಬಂಧಿಕರೆಲ್ಲರಿಗೂ ವಾಟ್ಸಪ್‍ನಲ್ಲಿ ಕಳುಹಿಸಿದ್ದು, ಆ ಫೋಟೋ ನೋಡುತ್ತಿದ್ದಂತೆ ನಿತೇಶ್ ದಂಗಾಗಿದ್ದಾರೆ.
ಸಂಜನಾ ತನ್ನ ಪ್ರಿಯಕರನೊಂದಿಗೆ ಮದುವೆಯಾದ ಫೋಟೋವನ್ನು ನೋಡುತ್ತಿದ್ದಂತೆ ನಿತೇಶ್ ಕುಟುಂಬದವರು ಆಕೆಯ ವಿರುದ್ಧ ಚಿನ್ನಾಭರಣ ಹಾಗೂ ಹಣ ಕಳ್ಳತನದ ದೂರು ನೀಡಿದ್ದಾರೆ. ಅಷ್ಟೇ ಅಲ್ಲದೇ ಮದುವೆಯ ಖರ್ಚು ನೀಡುವಂತೆ ಸಂಜನಾ ಮನೆಯವರಿಗೆ ಒತ್ತಾಯ ಮಾಡುತ್ತಿದ್ದಾರೆ.
ನಿತೇಶ್ ಕುಟುಂಬದವರು ಸಂಜನಾ ವಿರುದ್ಧ ಕಳ್ಳತನದ ದೂರು ದಾಖಲಿಸಿದ್ದು, ಎಸ್‍ಡಿಒಪಿ ಪಂಕಜ್ ದಿಕ್ಷೀತ್ ಅವರನ್ನು ಭೇಟಿ ಮಾಡಿ ಘಟನೆ ಬಗ್ಗೆ ವಿವರಿಸಿ ಸಂಜನಾ ಕುಟುಂಬದವರು ಮದುವೆಯ ಖರ್ಚು ನೀಡುವಂತೆ ಆಗ್ರಹಿಸಿದ್ದಾರೆ.
