ಬೆಂಗಳೂರು: ಆಸ್ಪತ್ರೆಗಳಲ್ಲಿ ರೋಗಿಗಳಿಗೆ ಇನ್ಪೆಕ್ಷನ್ ಆಗಬಾರದು ಎನ್ನುವ ನಿಟ್ಟಿನಲ್ಲಿ ಐಸಿಯುಗೆ ಹೋಗುವಾಗ ವೈದ್ಯರಿಂದ ಹಿಡಿದು ರೋಗಿಯ ಎಟೆಂಡರ್ ವರೆಗೂ ಚಪ್ಪಲಿ, ಶೂಗಳನ್ನು ಬಿಟ್ಟು ಹೋಗಬೇಕು.
ಇದನ್ನೇ ಬಂಡವಾಳ ಮಾಡಿಕೊಂಡ ಖತರ್ನಾಕ್ ಕಳ್ಳನೊಬ್ಬ ಆಸ್ಪತ್ರೆಯಲ್ಲಿ ಚಪ್ಪಲಿ, ಶೂಗಳನ್ನು ಕಳ್ಳತನ ಮಾಡಲು ಶುರುಮಾಡಿಕೊಂಡಿದ್ದನು. ಕದ್ದ ಮಾಲನ್ನು ಆಸ್ಪತ್ರೆಯ ಕೂಗಳತೆಯಲ್ಲಿರೋ ನೈಟ್ ಬಾಟ ಎಂದೇ ಫೇಮಸ್ ಆಗಿರೋ ಸೆಕೆಂಡ್ ಹ್ಯಾಂಡ್ ಚಪ್ಪಲಿ, ಶೂಗಳನ್ನು ಮಾರಾಟ ಮಾಡೋ ಫುಟ್ ಪಾತ್ ವ್ಯಾಪಾರಿಗಳಿಗೆ ಮಾರಾಟ ಮಾಡುತ್ತಿದ್ದನು.
ಕಳೆದ ಎರಡು ತಿಂಗಳಿಂದ ಆಸ್ಪತ್ರೆಯ ಸಿಬ್ಬಂದಿಗೆ ಇದು ದೊಡ್ಡ ತಲೆ ನೋವಾಗಿತ್ತು. ವೈದ್ಯರ ಕಾಸ್ಟ್ಲೀ ಶೂಗಳು, ರೋಗಿಯನ್ನು ನೋಡಲು ಬರುವವರ ಚಪ್ಪಲಿ, ಶೂಗಳು ಪ್ರತಿನಿತ್ಯ ಮಾಯವಾಗುತ್ತಿತ್ತು. ಹೇಗಾದರೂ ಮಾಡಿ ಆ ಕಳ್ಳನನ್ನು ಹಿಡಿಯಲೇಬೇಕು ಎಂದು ಆಸ್ಪತ್ರೆಯ ಸೆಕ್ಯುರಿಟಿಗಳು ನಿರ್ಧರಿಸಿದ್ದರು.
ಆದರೆ ಗುರುವಾರ ಆ ಕಳ್ಳನ ನಸೀಬು ಕೈ ಕೊಟ್ಟಿತ್ತು. ರೋಗಿಯ ಸಂಬಂಧಿಕರ ರೀತಿ ಆಸ್ಪತ್ರೆಗೆ ಬರಿಗಾಲಲ್ಲಿ ಬಂದು ಒಳ್ಳೆಯ ಚಪ್ಪಲಿಯನ್ನು ಹಾಕಿಕೊಂಡು ಎಸ್ಕೇಪ್ ಆಗುತ್ತಿದ್ದ ವೇಳೆ ಆಸ್ಪತ್ರೆಯ ಸಿಬ್ಬಂದಿ ಹಿಡಿದು ಜಾಡಿಸಿ ಪೊಲೀಸರಿಗೆ ಒಪ್ಪಿಸಿದ್ದಾರೆ. ಅಂದಹಾಗೆ ಈ ಚಪ್ಪಲಿ, ಶೂಗಳು ಕಳ್ಳತನ ಆಗುತ್ತಿದ್ದದ್ದು ಬೆಂಗಳೂರಿನ ಪ್ರತಿಷ್ಠಿತ ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ.
ನೇಪ್ರೊ ನ್ಯೂರಾಲಜಿ ಬ್ಲಾಕ್ ನಲ್ಲಿ ಐಸಿಯುವಿಗೆ ಹೋಗೋ ಡಾಕ್ಟರ್ ಗಳು, ರೋಗಿಯ ಕಡೆಯವರು ಚಪ್ಪಲಿ, ಶೂಗಳನ್ನು ಶೂ ಸ್ಟಾಂಡ್ ನಲ್ಲಿ ಬಿಟ್ಟು ಹೋಗುತ್ತಾರೆ. ಕಳೆದ 2 ತಿಂಗಳಿಂದ ಪ್ರತಿನಿತ್ಯ ಎರಡು ಜೊತೆ ಚಪ್ಪಲಿ ಅಥವಾ ಶೂಗಳ ಕಳ್ಳತನ ಮಾಡುತ್ತಿದ್ದ ಈತ ಇಂದು ಪೊಲೀಸರ ಅಥಿತಿಯಾಗಿದ್ದಾನೆ.
