ಉಡುಪಿ: ಹೆಬ್ಬಾವೊಂದು ಮಂಗನನ್ನು ಕೊಂದು ತಿನ್ನಲು ಪ್ರಯತ್ನಿಸಿದ ಘಟನೆ ಜಿಲ್ಲೆಯ ಕಾರ್ಕಳ ತಾಲೂಕಿನ ಮಾಳದ ತೋಟವೊಂದರಲ್ಲಿ ನಡೆದಿದೆ.
ಹಸಿದ ಹೆಬ್ಬಾವು ಮಾಮೂಲಿಯಾಗಿ ನಾಯಿ, ಕೋಳಿಯನ್ನು ತಿಂದು ಹೊಟ್ಟೆ ತುಂಬಿಸಿಕೊಳ್ಳುತ್ತಿತ್ತು. ಆದರೆ ವಿಚಿತ್ರವೆಂಬಂತೆ ಹೆಬ್ಬಾವು ಕೋತಿಯನ್ನು ಕೊಂದು ನಂತರ ನುಂಗಲು ಯತ್ನಿಸಿದೆ. ಆದರೆ ದೊಡ್ಡ ಮಂಗ ಹೆಬ್ಬಾವಿನ ಹೊಟ್ಟೆ ಸೇರಲಿಲ್ಲ. ಹೀಗಾಗಿ ಉರುಳಾಡಿ ಸುಸ್ತಾದ ಹೆಬ್ಬಾವು ಮಂಗನನ್ನು ಬಿಟ್ಟು ಪೊದೆಸೇರಿಕೊಂಡಿದೆ.
ಹಸಿದ ಹೆಬ್ಬಾವುಗಳು ಸಿಕ್ಕ ಪ್ರಾಣಿಗಳನ್ನು ಕಬಳಿಸಿಬಿಡುವುದು ಸಾಮಾನ್ಯ. ಆದರೆ ಮಂಗನನ್ನು ನುಂಗಲು ಪ್ರಯತ್ನಿಸಿರುವುದು ವಿಶೇಷ ಎಂದು ಸ್ಥಳೀಯ ಉರಗತಜ್ಞ ಸಂದೇಶ್ ಆಜ್ರಿ ತಿಳಿಸಿದ್ದಾರೆ.
ರತ್ನಾಕರ ಎಂಬವರ ತೋಟದಲ್ಲಿ ನಡೆದ ಈ ದೃಶ್ಯ ಮೊಬೈಲ್ ನಲ್ಲಿ ಸೆರೆಯಾಗಿದ್ದು, ವಿಡಿಯೋ ವೈರಲ್ ಆಗಿದೆ.
