ಎಲ್ಲೆಡೆ ನವರಾತ್ರಿ ಹಬ್ಬದ ಸಂಭ್ರಮ ಮನೆಮಾಡಿದ್ದು, ನೈವೇದ್ಯಕ್ಕೆ ಹಾಗೂ ಹಬ್ಬದ ಸಿಹಿಗೆ ಏನೆಂದು ಯೋಚಿಸುತ್ತಿರುವ ಗೃಹಿಣಿಯರಿಗೆ ಇಲ್ಲೊಂದು ರುಚಿಕರವಾದ ರೆಸಿಪಿ ಇದೆ. ಮಾರುಕಟ್ಟೆಯಿಂದ ದುಬಾರಿ ಸಿಹಿ ತಿನಿಸುಗಳನ್ನು ತರುವ ಬದಲು, ಮನೆಯಲ್ಲೇ ಇರುವ ಕೇವಲ ಒಂದು ಕಪ್ ಅವಲಕ್ಕಿಯನ್ನು ಬಳಸಿ ಅತಿ ಕಡಿಮೆ ಸಮಯದಲ್ಲಿ ಅತ್ಯಂತ ರುಚಿಕರವಾದ ಸಾಂಪ್ರದಾಯಿಕ ಸಿಹಿಯನ್ನು ತಯಾರಿಸಬಹುದು. ಬಾಯಲ್ಲಿ ಇಟ್ಟರೆ ಬೆಣ್ಣೆಯಂತೆ ಕರಗುವ ಈ ಸ್ವೀಟ್ ಮಾಡುವುದು ಹೇಗೆ ಎಂಬುದರ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಬೇಕಾಗುವ ಪದಾರ್ಥಗಳು:
ಅವಲಕ್ಕಿ
ತುಪ್ಪ
ಹಾಲಿನ ಪುಡಿ
ಸಕ್ಕರೆ
ಹಾಲು
ಏಲಕ್ಕಿ ಪುಡಿ
ಗೋಡಂಬಿ
ಬಾದಾಮಿ ಚೂರುಗಳು
ಮಾಡುವ ವಿಧಾನ:
ಮೊದಲು ಒಂದು ಬಾಣಲೆಯಲ್ಲಿ ಒಂದು ಚಮಚ ತುಪ್ಪ ಹಾಕಿ, ಅದರಲ್ಲಿ ಅವಲಕ್ಕಿಯನ್ನು ಸಣ್ಣ ಉರಿಯಲ್ಲಿ ಗರಿಗರಿಯಾಗುವವರೆಗೆ ಚೆನ್ನಾಗಿ ಹುರಿದುಕೊಳ್ಳಿ. ನಂತರ ಅದನ್ನು ತಣ್ಣಗಾಗಲು ಬಿಟ್ಟು, ಮಿಕ್ಸಿ ಜಾರ್‌ನಲ್ಲಿ ಪುಡಿಯಾಗಿ ಹಿಟ್ಟಿನಂತೆ ರುಬ್ಬಿಕೊಳ್ಳಿ. ನಂತರ ಒಂದು ಬೌಲ್‌ನಲ್ಲಿ ಹಾಲಿನ ಪುಡಿ ಮತ್ತು ಹಾಲನ್ನು ಹಾಕಿ ಗಂಟುಗಳಿಲ್ಲದಂತೆ ಚೆನ್ನಾಗಿ ಕಲಸಿಟ್ಟುಕೊಳ್ಳಿ.
ಮತ್ತೊಂದು ಪಾತ್ರೆಯಲ್ಲಿ ಸಕ್ಕರೆ ಮತ್ತು ಅರ್ಧ ಕಪ್ ನೀರು ಹಾಕಿ ಸಕ್ಕರೆ ಕರಗಿಸಿ. ಈ ಸಕ್ಕರೆ ಪಾಕಕ್ಕೆ ಈಗಾಗಲೇ ಕಲಸಿಟ್ಟ ಹಾಲಿನ ಮಿಶ್ರಣವನ್ನು ಸೇರಿಸಿ, ಸಣ್ಣ ಉರಿಯಲ್ಲಿ ಕೈಯಾಡಿಸಿ. ನಂತರ ರುಬ್ಬಿಕೊಂಡ ಅವಲಕ್ಕಿ ಪುಡಿಯನ್ನು ಸ್ವಲ್ಪ-ಸ್ವಲ್ಪವಾಗಿ ಹಾಕುತ್ತಾ ಗಂಟು ಆಗದಂತೆ ತಿರುಗಿಸಿ. ಮಿಶ್ರಣವು ಗಟ್ಟಿಯಾಗುತ್ತಾ ಬರುವಾಗ ಉಳಿದ ತುಪ್ಪವನ್ನು ಆಗಾಗ ಸೇರಿಸಿ. ಮಿಶ್ರಣವು ಬಾಣಲೆ ಬಿಟ್ಟು ಒಂದೇ ಉಂಡೆಯಾಗಿ ಬರುವವರೆಗೆ ಚೆನ್ನಾಗಿ ಕೈಯಾಡಿಸಿ. ಕೊನೆಯಲ್ಲಿ ಏಲಕ್ಕಿ ಪುಡಿ ಮತ್ತು ಗೋಡಂಬಿ ಚೂರುಗಳನ್ನು ಹಾಕಿ
ಒಂದು ತಟ್ಟೆಗೆ ಅಥವಾ ಕೇಕ್ ಟ್ರೇಗೆ ತುಪ್ಪ ಸವರಿ, ಈ ಮಿಶ್ರಣವನ್ನು ಅದರಲ್ಲಿ ಸಮವಾಗಿ ಹರಡಿ. ಇದು ಸಂಪೂರ್ಣವಾಗಿ ತಣ್ಣಗಾದ ಬಳಿಕ ನಿಮ್ಮಿಷ್ಟದ ಆಕಾರದಲ್ಲಿ (ಬರ್ಫಿ ಅಥವಾ ಚೌಕಾಕಾರದಲ್ಲಿ) ಕತ್ತರಿಸಿ.
ಈ ಸಿಹಿಯನ್ನು ತಯಾರಿಸುವಾಗ ಹಾಲಿನ ಪುಡಿಯನ್ನು ಸೇರಿಸುವುದರಿಂದ ಇದು ಖೋವಾ (Khova) ಅಥವಾ ಪೇಡಾದಂತಹ ರುಚಿಯನ್ನು ನೀಡುತ್ತದೆ. ಈ ನವರಾತ್ರಿಗೆ ನೀವು ಕೂಡ ಇದನ್ನು ಪ್ರಯತ್ನಿಸಿ ದೇವರಿಗೆ ನೈವೇದ್ಯ ಮಾಡಿ, ಕುಟುಂಬದವರೊಂದಿಗೆ ಹಬ್ಬವನ್ನು ಆನಂದಿಸಿ!
