ಡೆಹ್ರಾಡೂನ್: ಭಾರತವು (India) 2047ರ ವೇಳೆಗೆ ʼಸೂಪರ್ ಪವರ್ʼ (Super Power) ಆಗಲಿದೆ. ಬಾಹ್ಯಾಕಾಶ ತಂತ್ರಜ್ಞಾನ ಮತ್ತು ಉತ್ಪಾದನೆಯಲ್ಲಿ ಜಗತ್ತಿಗೆ ಪೂರೈಕೆದಾರನಾಗಲಿದೆ ಎಂದು ಇಸ್ರೋದ ಮಾಜಿ ಅಧ್ಯಕ್ಷ ಎಸ್.ಸೋಮನಾಥ್ (Somnath) ಹೇಳಿದ್ದಾರೆ.
ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ (ಎಬಿವಿಪಿ)ನ 71 ನೇ ಸಮಾವೇಶದ ಉದ್ಘಾಟನಾ ಸಮಾರಂಭದಲ್ಲಿ ಸೋಮನಾಥ್ ಮಾತನಾಡಿದ್ದಾರೆ. ಇದನ್ನೂ ಓದಿ: ಪ್ರವಾಹ ಪೀಡಿತ ಶ್ರೀಲಂಕಾಗೆ ಭಾರತ ನೆರವು – ಆಪರೇಷನ್ ʻಸಾಗರ ಬಂಧುʼ ಕಾರ್ಯಾಚರಣೆ ಶುರು
ನಂಬಿಕೆ ಮತ್ತು ವಾಸ್ತವವು ಪರಸ್ಪರ ಪೂರಕವಾಗಿರುವಂತೆಯೇ ವಿಜ್ಞಾನ ಮತ್ತು ಆಧ್ಯಾತ್ಮಿಕತೆ ಸಹಬಾಳ್ವೆ ನಡೆಸಬಹುದು. ನಮ್ಮ ಋಷಿಗಳು ಮತ್ತು ಸಂತರು ಗಣಿತ, ಖಗೋಳಶಾಸ್ತ್ರ, ಲೋಹಶಾಸ್ತ್ರ, ವಾಸ್ತುಶಿಲ್ಪ ಮತ್ತು ವೈದ್ಯಕೀಯವನ್ನು ಅನ್ವೇಷಿಸಿದರು. ನಮ್ಮ ಆಧ್ಯಾತ್ಮಿಕತೆಯು ಆಧುನಿಕ ವಿಜ್ಞಾನದ ಒಳನೋಟಗಳನ್ನು ಸಾಕಾರಗೊಳಿಸುತ್ತದೆ ಎಂದು ತಿಳಿಸಿದ್ದಾರೆ.
ಭಾರತ ಪ್ರಗತಿ ಹೊಂದುತ್ತಿದೆ ಎಂಬುದು ಎಲ್ಲರಿಗೂ ತಿಳಿದಿದೆ. ಇದು ಜನರಲ್ಲಿ ಹೊಸ ವಿಶ್ವಾಸವನ್ನು ತುಂಬುತ್ತಿದೆ. ವಿಶ್ವದಲ್ಲಿ ಭಾರತವನ್ನು ವಿಭಿನ್ನವಾಗಿ ನೋಡುತ್ತಿರುವುದು ಇದೇ ಮೊದಲು. ನಾವು ಪ್ರಜಾಪ್ರಭುತ್ವ ಸ್ಥಿರತೆಯ ಆಧಾರಸ್ತಂಭಗಳಾಗಿರುವುದರಿಂದ ಇದು ಸಾಧ್ಯ ಎಂದು ಮಾತನಾಡಿದ್ದಾರೆ.
ಇಂದಿನ ಭಾರತವು ಯುವ ಭಾರತವಾಗಿದ್ದು, ಜನಸಂಖ್ಯೆಯ ಶೇ.25 ರಷ್ಟು ಯುವಕರಿದ್ದಾರೆ. ಇದು ಮುಂದಿನ 25 ವರ್ಷಗಳವರೆಗೆ ಹಾಗೆಯೇ ಇರುತ್ತದೆ. ಇದು ನಮಗೆ ಪ್ರಯೋಜನಕಾರಿಯಾಗಿದೆ ಎಂದು ಹೇಳಿದ್ದಾರೆ. ಇದನ್ನೂ ಓದಿ: `ದಿತ್ವಾಹ್’ ಎಫೆಕ್ಟ್ – ತಮಿಳುನಾಡಿನ ಶಾಲೆಗಳಿಗೆ ರಜೆ, 54 ವಿಮಾನಗಳ ಹಾರಾಟ ರದ್ದು
ಪ್ರಧಾನಿ ನರೇಂದ್ರ ಮೋದಿಯವರ ದೂರದೃಷ್ಟಿಯನ್ನು ಮಾಜಿ ಇಸ್ರೋ ಅಧ್ಯಕ್ಷ ಶ್ಲಾಘಿಸಿದರು. ಸರ್ಕಾರವು ಈಗ ಪರಮಾಣು ವಲಯದಲ್ಲಿ ಖಾಸಗಿ ಪಾಲುದಾರರಿಗೆ ಅವಕಾಶ ನೀಡಲಿದೆ. ಇದು ಯುವಕರಿಗೆ ಹೊಸ ಅವಕಾಶಗಳನ್ನು ಸೃಷ್ಟಿಸುತ್ತದೆ. ಈಗ ಯುವಜನರಿಗೂ ಹಸಿರು ತಂತ್ರಜ್ಞಾನದಲ್ಲಿ ಭಾಗವಹಿಸಲು ಅವಕಾಶ ಸಿಗಲಿದೆ ಎಂದಿದ್ದಾರೆ.
