ಕಾಂತಾರ ನಟಿ ರುಕ್ಮಿಣಿ ವಸಂತ್ಗೆ ಸೈಬರ್ ಕಾಟ ವಿಚಾರ ಬೆಳಕಿಗೆ ಬಂದ ಬೆನ್ನಲ್ಲೇ ನಟಸಾರ್ವಭೌಮ ಚಿತ್ರದಲ್ಲಿ ನಟಿಸಿದ್ದ ಮಲಯಾಳಂ ಮೂಲದ ನಟಿ ಅನುಪಮಾ ಪರಮೇಶ್ವರನ್ ಸೈಬರ್ ಕಿರುಕುಳಕ್ಕೆ ಒಳಗಾದ ಘಟನೆಯನ್ನ ಬಿಚ್ಚಿಟ್ಟಿದ್ದಾರೆ. ಸಾಮಾಜಿಕ ಮಾಧ್ಯಮದಿಂದ ನಟಿಯ ಕುರಿತಾಗಿ ಅನುಚಿತ ವರ್ತನೆ, ಮಾರ್ಫಿಂಗ್ ಚಿತ್ರಗಳನ್ನ ಮಾಡಿ ಪೋಸ್ಟ್ ಮಾಡುತ್ತಿದ್ದ ಸೈಬರ್ ಕಿರುಕುಳದ ವಿಚಾರವನ್ನ ಸೋಶಿಯಲ್ ಮೀಡಿಯಾದಲ್ಲಿ ಬಹಿರಂಗಪಡಿಸಿದ್ದಾರೆ. ವಿಶೇಷ ಅಂದ್ರೆ ಈ ಅಪರಾಧ ಎಸಗಿದ್ದು ತಮಿಳುನಾಡಿನ 20 ವರ್ಷ ವಯಸ್ಸಿನ ಯುವತಿ ಎನ್ನುವುದಾಗಿದೆ.
ಹಲವು ದಿನಗಳಿಂದ ಸೋಶಿಯಲ್ ಮೀಡಿಯಾದಲ್ಲಿ ನಕಲಿ ಖಾತೆಯಿಂದ ಮಾರ್ಫಿಂಗ್ ಮಾಡಲಾದ ಫೋಟೋಗಳು ಹಾಗೂ ಅನುಚಿತ ವಿಷಯವನ್ನೊಳಗೊಂಡ ಫೋಟೋಗಳನ್ನ ಪೋಸ್ಟ್ ಮಾಡಲಾಗುತ್ತಿದ್ದ ವಿಚಾರ ಅನುಪಮ ಗಮನಕ್ಕೆ ಬಂದಿದೆ. ಈ ವಿಚಾರ ತಿಳಿದ ಕೂಡಲೇ ಸೈಬರ್ ಅಪರಾಧ ವಿಭಾಗಕ್ಕೆ ದೂರು ಕೊಡುತ್ತಾರೆ ಅನುಪಮ. ಹೀಗೆ ಅನುಪಮಾ ಆನ್ಲೈನ್ನಲ್ಲಿ ಕಿರುಕುಳ ಕೊಡುತ್ತಿದ್ದ ವ್ಯಕ್ತಿಯ ಪತ್ತೆಯಾದ ಬಳಿಕ ಅಚ್ಚರಿಗೊಂಡಿದ್ದಾರೆ. ಬಂಧಿಸಿ ಕರೆತಂದಾಗ ಆಕೆ 20 ವರ್ಷದ ಯುವತಿ ಅನ್ನುವುದು ಗೊತ್ತಾಗಿದೆ. ಆಕೆ ಪರಿಪರಿಯಾಗಿ ಬೇಡಿಕೊಂಡ ಪರಿಣಾಮ ಆಕೆಯ ಗುರುತು, ವಿಳಾಸ ಬಹಿರಂಗಪಡಿಸದಿರಲು ಅನುಪಮಾ ನಿರ್ಧರಿಸಿದ್ದಾರಂತೆ.
ಮಾರ್ಫಿಂಗ್ ಪೋಸ್ಟ್ಗಳನ್ನು ಹಾಕುತ್ತಿದ್ದ ಆರೋಪಿತೆ, ಅನುಪಮಾ ಸೇರಿದಂತೆ ಆಕೆಯ ಕುಟುಂಬ, ಸ್ನೇಹಿತರು ಮತ್ತು ಸಹ-ನಟರಿಗೆ ಟ್ಯಾಗ್ ಮಾಡುತ್ತಿದ್ದಳಂತೆ. ಹೀಗಾಗಿ ಆನ್ಲೈನ್ನಲ್ಲಿ ಇಂತಹ ಉದ್ದೇಶಿತ ಕಿರುಕುಳವನ್ನು ನೋಡುವುದು ತುಂಬಾ ದುಃಖಕರವಾಗಿದೆ ಎಂದಿದ್ದಾರೆ.
ಸೈಬರ್ ಕಿರುಕುಳ ಮುಖೇಡಿಗಳಿಗೆ ಖಡಕ್ ಸಂದೇಶ ಕೊಟ್ಟಿರುವ ಅನುಪಮಾ ಸ್ಮಾರ್ಟ್ಫೋನ್ ಬಳಸುವುದು, ಸೋಶಿಯಲ್ ಮೀಡಿಯಾ ಬಳಸುವುದು ಕಿರುಕುಳ ನೀಡೋದಕ್ಕೋ, ಮಾನಹಾನಿ ಮಾಡುವುದಕ್ಕೋ ಅಥವಾ ದ್ವೇಷವನ್ನು ಹರಡೋದಕ್ಕಲ್ಲ. ನಟಿ ಅಥವಾ ಸಾರ್ವಜನಿಕ ವ್ಯಕ್ತಿಯಾಗಿರುವವರಿಗೆ ಮೂಲಭೂತ ಹಕ್ಕುಗಳನ್ನು ಇಲ್ಲವೆಂದೇನಲ್ಲ. ಸೈಬರ್ಬುಲ್ಲಿಂಗ್ ಶಿಕ್ಷಾರ್ಹ ಅಪರಾಧ ಎಂದಿದ್ದಾರೆ.
