ಟೋಕಿಯೊ: ಕೇವಲ 6 ಗಂಟೆಗಳಲ್ಲಿ 3ಡಿ-ಪ್ರಿಂಟ್ ತಂತ್ರಜ್ಞಾನ ಬಳಸಿ ರೈಲು ನಿಲ್ದಾಣವನ್ನು ಜಪಾನ್ ನಿರ್ಮಿಸಿದೆ. ವಿಶ್ವದಲ್ಲೇ ಮೊದಲ ಬಾರಿಗೆ ಹೊಸ ಸಾಹಸವನ್ನು ಜಪಾನ್ (Japan) ಮಾಡಿದೆ.
ರೈಲು ಮೂಲಸೌಕರ್ಯ ನಾವೀನ್ಯತೆಯಲ್ಲಿ ಮಹತ್ವದ ಹೆಜ್ಜೆ ಇದಾಗಿದೆ. 1948 ರ ಹಿಂದಿನ ಹಳೆಯ ಮರದ ರಚನೆಯನ್ನು ಬದಲಾಯಿಸಿ, ಹೊಸ ಹಟ್ಸುಶಿಮಾ ನಿಲ್ದಾಣ ನಿರ್ಮಿಸಲಾಯಿತು. 2018 ರಿಂದಲೂ ಈ ನಿಲ್ದಾಣವು ಪ್ರತಿದಿನ ಸುಮಾರು 530 ಪ್ರಯಾಣಿಕರಿಗೆ ಸೇವೆ ಸಲ್ಲಿಸುತ್ತಿದೆ.
ಐತಿಹಾಸಿಕ ನಿರ್ಮಾಣವನ್ನು ವೀಕ್ಷಿಸಲು ನೂರಾರು ಸಂಖ್ಯೆಯಲ್ಲಿ ಸ್ಥಳೀಯರು ಜಮಾಯಿಸಿದ್ದರು. ಅಂತಿಮ ರೈಲು ರಾತ್ರಿ 11:57 ಕ್ಕೆ ಹೊರಟ ನಂತರ ಕಾರ್ಮಿಕರು ನಿರ್ಮಾಣ ಕೆಲಸ ಆರಂಭಿಸಿದರು. ಕೆಲವೇ ಗಂಟೆಗಳಲ್ಲಿ ನಿರ್ಮಾಣ ಕಾರ್ಯ ಮುಗಿಸಿದರು. 100 ಚದರ ಅಡಿಗಳಿಗಿಂತ ಸ್ವಲ್ಪ ಹೆಚ್ಚು ಅಳತೆಯ ಮುಖ್ಯ ರಚನೆಯನ್ನು ಮರುದಿನ ಬೆಳಗ್ಗೆ 5:45 ಕ್ಕೆ ಮೊದಲ ರೈಲು ಬರುವ ಮುನ್ನ ಪೂರ್ಣಗೊಳಿಸಿದರು.
ಕಟ್ಟಡ ಪೂರ್ಣವಾಗಿ ನಿರ್ಮಾಣವಾಗಿದೆ. ಐಸಿ ಕಾರ್ಡ್ ರೀಡರ್‌ ಅಳವಡಿಕೆಯ ಸಣ್ಣಪುಟ್ಟ ಕೆಲಸಗಳಿವೆ. ನಿಲ್ದಾಣವು ಜುಲೈನಲ್ಲಿ ಪ್ರಯಾಣಿಕರಿಗೆ ಮುಕ್ತವಾಗುವ ನಿರೀಕ್ಷೆಯಿದೆ.
