ಅಬುಧಾಬಿ: ಯುಎಇಯಲ್ಲಿ (UAE) ಇರಾನ್ ದಾಳಿಯ (Iran Israel War) ವೀಡಿಯೋ ಮಾಡಿದವರನ್ನು ಪೊಲೀಸರು ಬಂಧಿಸುತ್ತಿದ್ದಾರೆ. ಇಲ್ಲಿಯವರೆಗೂ ಸುಮಾರು 45 ಮಂದಿಯನ್ನು ಅಬುಧಾಬಿ ಪೊಲೀಸರು ಬಂಧಿಸಿದ್ದಾರೆ.
ಇರಾನ್ ನಡೆಸಿದ ದಾಳಿಯನ್ನು ವೀಡಿಯೋ ಮಾಡಿ ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ಪೋಸ್ಟ್ ಮಾಡಿದ್ದಕ್ಕಾಗಿ ವಿವಿಧ ಭಾಗದ 45 ಜನರನ್ನು ಬಂಧಿಸಲಾಗಿದೆ. ದಾಳಿಯ ವೀಡಿಯೋ ಹಂಚಿಕೊಳ್ಳುವುದು ಸಾರ್ವಜನಿಕ ಅಭಿಪ್ರಾಯವನ್ನು ಪ್ರಚೋದಿಸುವ ಮತ್ತು ಸಮುದಾಯದಲ್ಲಿ ವದಂತಿಗಳನ್ನು ಹರಡಿ ದಾರಿತಪ್ಪಿಸುವ ಕೃತ್ಯವಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ. ಇದನ್ನೂ ಓದಿ: ರಷ್ಯಾದಿಂದ ಕಚ್ಚಾ ತೈಲ ಖರೀದಿಸುವಂತೆ ಅಮೆರಿಕ ಭಾರತದ ಜೊತೆ ಬೇಡಿಕೊಂಡಿದೆ: ಇರಾನ್
ಇದು ಪತ್ರಿಕೋದ್ಯಮ ಅಥವಾ ಎಲ್ಲಾ ರೆಕಾರ್ಡಿಂಗ್ನ ನಿಷೇಧವಲ್ಲ. ನೇರ ಭದ್ರತಾ ಬಿಕ್ಕಟ್ಟಿನ ಸಂದರ್ಭದಲ್ಲಿ ಸೂಕ್ಷ್ಮ ಅಥವಾ ಪರಿಶೀಲಿಸದ ವೀಡಿಯೋ, ಮಾಹಿತಿ ಹಂಚಿಕೊಳ್ಳುವುದರ ವಿರುದ್ಧದ ಕ್ರಮವಾಗಿದೆ.
ಈ ಬಗ್ಗೆ ಮೊದಲೇ ಎಚ್ಚರಿಕೆ ನೀಡಿದ್ದ ಅಧಿಕಾರಿಗಳು
ಮಾರ್ಚ್ ಮೊದಲ ವಾರ ಯುಎಇ ಅಟಾರ್ನಿ ಜನರಲ್ ಡಾ. ಹಮದ್ ಸೈಫ್ ಅಲ್ ಶಮ್ಸಿ ಅವರು ಈ ಬಗ್ಗೆ ಎಚ್ಚರಿಕೆ ನೀಡಿದ್ದರು. ದಾಳಿ ನಡೆದ ಸ್ಥಳಗಳ ಫೋಟೋ ತೆಗೆಯುವುದು, ಪ್ರಕಟಿಸುವುದು ಅಥವಾ ಪ್ರಸಾರ ಮಾಡುವುದು, ತಪ್ಪಾದ ಮಾಹಿತಿ ಹಂಚಿಕೊಳ್ಳುವುದು ಸಾರ್ವಜನಿಕರಲ್ಲಿ ಭಯವನ್ನು ಉಂಟುಮಾಡಬಹುದು. ದೇಶದ ನೈಜ ಪರಿಸ್ಥಿತಿಯ ಬಗ್ಗೆ ತಪ್ಪು ಅಭಿಪ್ರಾಯವನ್ನು ಉಂಟುಮಾಡಬಹುದು ಎಂದು ಎಚ್ಚರಿಸಿದ್ದರು.
ದುಬೈನಲ್ಲಿ ಬ್ರಿಟಿಷ್ ಪ್ರವಾಸಿಗನ ಬಂಧನ
ಯುಎಇ ಕಾನೂನಿನ ಅಡಿಯಲ್ಲಿ ದುಬೈನಲ್ಲಿ (Dubai) ಒಬ್ಬ ಬ್ರಿಟಿಷ್ ವ್ಯಕ್ತಿಯನ್ನು ಬಂಧಿಸಲಾಗಿದೆ. ಬಂಧನವನ್ನು ಯುಕೆ ವಿದೇಶಾಂಗ ಕಚೇರಿ ದೃಢೀಕರಿಸಿದೆ. ಯುಎಇಯಲ್ಲಿ ಬ್ರಿಟಿಷ್ ವ್ಯಕ್ತಿಯನ್ನು ಬಂಧಿಸಿದ ನಂತರ ಕೆ ವಿದೇಶಾಂಗ ಕಚೇರಿಯ ಅಧಿಕಾರಿಗಳು ಸ್ಥಳೀಯ ಅಧಿಕಾರಿಗಳ ಜೊತೆ ಸಂಪರ್ಕದಲ್ಲಿದ್ದಾರೆ ಎಂದು ಮಾಹಿತಿ ಹಂಚಿಕೊಡಿದೆ.
ಯುಎಇ ಕಾನೂನಿನಡಿ ಏನು ಶಿಕ್ಷೆ?
ಸೈಬರ್ ಅಪರಾಧದ ಕಾನೂನುಗಳನ್ನು ಉಲ್ಲಂಘಿಸುವ, ಸುಳ್ಳು ಸುದ್ದಿಗಳನ್ನು ಪ್ರಕಟಿಸುವ ಅಥವಾ ಮರುಪ್ರಕಟಿಸುವ, ದಾರಿತಪ್ಪಿಸುವ ವರದಿಗಳು ಅಥವಾ ಅಧಿಕೃತವಾಗಿ ಘೋಷಿಸಲಾದ ಮಾಹಿತಿಗೆ ವಿರುದ್ಧವಾಗಿ ವದಂತಿಗಳನ್ನು ಆನ್ಲೈನ್ನಲ್ಲಿ ಪ್ರಕಟಿಸುವ ಯಾರಿಗಾದರೂ ಕನಿಷ್ಠ ಒಂದು ವರ್ಷ ಜೈಲು ಶಿಕ್ಷೆ ಮತ್ತು ಕನಿಷ್ಠ AED 100,000 ದಂಡ ವಿಧಿಸಲಾಗುತ್ತೆದೆ.
ಬಿಕ್ಕಟ್ಟಿನ ಸಮಯದಲ್ಲಿ ಸಾರ್ವಜನಿಕರಲ್ಲಿ ಭಯವನ್ನು ಉಂಟುಮಾಡುವ ಅಥವಾ ಸಾರ್ವಜನಿಕ ಭದ್ರತೆಗೆ ಹಾನಿ ಮಾಡುವ, ಯುಎಇಯ ಯಾವುದೇ ಅಧಿಕಾರಿಗಳ ವಿರುದ್ಧ ಸಾರ್ವಜನಿಕ ಅಭಿಪ್ರಾಯವನ್ನು ಕೆರಳಿಸುವ ಗಂಭೀರ ಪ್ರಕರಣಗಳಲ್ಲಿ, ಕನಿಷ್ಠ ಎರಡು ವರ್ಷಗಳ ಜೈಲು ಶಿಕ್ಷೆ ಮತ್ತು ಕನಿಷ್ಠ AED 200,000 (ಸುಮಾರು $54,000) ದಂಡವನ್ನು ವಿಧಿಸಬಹುದಾಗಿದೆ.
ಸುಳ್ಳು ಮಾಹಿತಿಯಿಂದ ಯುಎಇಗೆ ಆಗೋ ನಷ್ಟ ಏನು?
ಯುಎಇ ಆರ್ಥಿಕ ಸಚಿವಾಲಯದ ಪ್ರಕಾರ, ಪ್ರವಾಸೋದ್ಯಮ, ಹಣಕಾಸು, ವಾಯುಯಾನ, ಲಾಜಿಸ್ಟಿಕ್ಸ್ ಮತ್ತು ರಿಯಲ್ ಎಸ್ಟೇಟ್ನಂತಹ ಕ್ಷೇತ್ರಗಳು ದೇಶದ ತೈಲೇತರ ಜಿಡಿಪಿಯ ದೊಡ್ಡ ಭಾಗವಾಗಿದೆ. ಇದು ದುಬೈ ಮತ್ತು ಅಬುಧಾಬಿಯಂತಹ ನಗರಗಳು ಬಹುರಾಷ್ಟ್ರೀಯ ಕಂಪನಿಗಳು ಮತ್ತು ಹೂಡಿಕೆದಾರರನ್ನು ಆಕರ್ಷಿಸುತ್ತವೆ. ಅಸ್ಥಿರತೆ ಅಥವಾ ಭದ್ರತಾ ಬೆದರಿಕೆ ಪ್ರವಾಸೋದ್ಯಮ, ಹೂಡಿಕೆ ಮತ್ತು ಅಂತರರಾಷ್ಟ್ರೀಯ ವ್ಯಾಪಾರದ ಮೇಲೆ ನೇರವಾಗಿ ಪರಿಣಾಮ ಬೀರುತ್ತದೆ. ಇದನ್ನೂ ಓದಿ: ಮಧ್ಯಪ್ರಾಚ್ಯದ ಇತಿಹಾಸದಲ್ಲಿ ಭೀಕರ ದಾಳಿ – ಇರಾನಿನ ಕಿರೀಟ ಖಾರ್ಗ್ ದ್ವೀಪಕ್ಕೆ ಬಾಂಬ್
