ರಾಯಚೂರಿನಲ್ಲಿ ಹೃದಯ ವಿದ್ರಾವಕ ಘಟನೆ- ನಾಯಿಗಳ ದಾಳಿಗೆ 35 ಕುರಿಮರಿಗಳ ಸಾವು

ರಾಯಚೂರು: ನಾಯಿಗಳ ದಾಳಿಯಿಂದ 35 ಕುರಿಮರಿಗಳು ಸಾವನ್ನಪ್ಪಿರುವ ಹೃದಯವಿದ್ರಾವಕ ಘಟನೆ ರಾಯಚೂರು ತಾಲೂಕಿನ ಐಜಾಪುರ ಗ್ರಾಮದಲ್ಲಿ ನಡೆದಿದೆ.

ಹೊಲದ ದೊಡ್ಡಿಯಲ್ಲಿದ್ದ ಕುರಿ ಮರಿಗಳ ಮೇಲೆ ಐದು ನಾಯಿಗಳು ದಾಳಿ ಮಾಡಿ ಕಚ್ಚಿ ಸಾಯಿಸಿವೆ. ರಾಮಪ್ಪ ಎಂಬವರಿಗೆ ಸೇರಿದ ಕುರಿಗಳು ಸಾವನ್ನಪ್ಪಿದ್ದು, ಇವು ಒಂದು ಲಕ್ಷ ರೂಪಾಯಿ ಬೆಲೆ ಬಾಳುತ್ತಿದ್ದವು ಎನ್ನಲಾಗಿದೆ.

ಕುರಿಗಳನ್ನು ಮೇಯಿಸಲು ಹೋದಾಗ ಮರಿಗಳನ್ನು ದೊಡ್ಡಿಯಲ್ಲೇ ಬಿಡಲಾಗಿತ್ತು. ಕುರಿಗಾರನ ನಾಯಿಗಳು ಸಹ ಸ್ಥಳದಲ್ಲಿ ಇಲ್ಲದ ವೇಳೆ ದಾಳಿ ನಡೆದಿದೆ. ಇನ್ನೂ ಎಂಟು ಕುರಿಮರಿಗಳಿಗೆ ಗಂಭೀರ ಗಾಯಗಳಾಗಿದ್ದು ಸಾವು ಬದುಕಿನ ಮಧ್ಯೆ ಹೋರಾಡುತ್ತಿವೆ.