ಒಂದೇ ಹಾಸಿಗೆ ಮೇಲೆ ಇಬ್ಬರು ರೋಗಿಗಳು- ಸೀರಿಯಸ್ ಪೇಷಂಟ್‍ಗೂ ನೆಲದ ಮೇಲೆ ಚಿಕಿತ್ಸೆ

ಚಾಮರಾಜನಗರ: ನಾವು ಈ ಹಿಂದೆ ಶಿವಮೊಗ್ಗದ ಮೆಗ್ಗಾನ್ ಆಸ್ಪತ್ರೆಯಲ್ಲಿ ವೀಲ್ ಚೇರ್ ಇಲ್ಲವೆಂದು ರೋಗಿಯನ್ನು ಎಳೆದುಕೊಂಡು ಹೋಗುವ ದೃಶ್ಯವನ್ನು ನೋಡಿದ್ದೆವು. ಆದರೆ ಚಾಮರಾಜನಗರದ ಜಿಲ್ಲಾಸ್ಪತ್ರೆಯಲ್ಲಿ ಹಾಸಿಗೆಗಳ ಅಭಾವದಿಂದ ರೋಗಿಗಳು ನೆಲದ ಮೇಲೆ ಹಾಗೂ ಒಂದೇ ಹಾಸಿಗೆ ಮೇಲೆ ಇಬ್ಬರು ರೋಗಿಗಳು ಮಲಗುವ ಸ್ಥಿತಿ ಎದುರಾಗಿದೆ.

300 ಹಾಸಿಗೆಗಳ ಜಿಲ್ಲಾಸ್ಪತ್ರೆಯಲ್ಲಿ ಹಾಸಿಗೆಗಳ ಅಭಾವದಿಂದ ಒಂದೊಂದು ಹಾಸಿಗೆಯಲ್ಲಿ ಇಬ್ಬರು ರೋಗಿಗಳು ಮಲಗುವಂತ ಸ್ಥಿತಿ ನಿರ್ಮಾಣವಾಗಿದ್ರೆ, ಇನ್ನೂ ಕೆಲವು ರೋಗಿಗಳು ನೆಲದ ಮೇಲೆ ಮಲಗುವಂತಾಗಿದೆ. ಇದಕ್ಕೆ ಪ್ರಮುಖ ಕಾರಣ ಜಿಲ್ಲೆಯಲ್ಲಿ ಆವರಿಸಿರುವ ಡೆಂಗ್ಯೂ ಹಾಗೂ ವೈರಲ್ ಫೀವರ್.

ಪ್ರತಿ ನಿತ್ಯ 250 ಡೆಂಗ್ಯೂ ಲಕ್ಷಣಗಳಿರುವ ರೋಗಿಗಳು, 1500 ವೈರಲ್ ಫೀವರ್ ಇರುವ ರೋಗಿಗಳು ಹಾಗೂ ಇನ್ನಿತರ ರೋಗಗಳಿರುವ ನೂರಾರು ಮಂದಿ ರೋಗಿಗಳು ಆಸ್ಪತ್ರೆಗೆ ದಾಖಲಾಗುತ್ತಿದ್ದಾರೆ. ಹೀಗಾಗಿ ಆಸ್ಪತ್ರೆಯಲ್ಲಿ ಹಾಸಿಗೆಗಳ ಅಭಾವ ಎದುರಾಗಿದೆ. ಇದರಿಂದ ರೋಗಿಗಳು ಪರಿತಪಿಸುತ್ತಿದ್ದಾರೆ.