ಬೋಳು ತಲೆ ಇರೋದು ಮುಚ್ಚಿಟ್ಟು ಮದ್ವೆಯಾದ ಪತಿಯ ವಿರುದ್ಧ ದೂರು

– ಮದ್ವೆಯಾದ ತಿಂಗಳಿಗೆ ಬಯಲಾಯ್ತು ಪತಿಯ ರಹಸ್ಯ

ಮುಂಬೈ: ತಾನು ಮದುವೆಯಾದ ಯುವಕನಿಗೆ ಬೋಳು ತಲೆ ಇದೆ ಎಂದು ತಿಳಿದುಕೊಂಡ ಯುವತಿ ಪತಿಯ ವಿರುದ್ಧ ಪೊಲೀಸ್ ಠಾಣೆಯಲ್ಲಿ ದೂರು ಸಲ್ಲಿಸುವ ಘಟನೆ ಮುಂಬೈ ನಗರದಲ್ಲಿ ನಡೆದಿದೆ.

27 ವರ್ಷದ ಯುವತಿ ಚಾರ್ಟರ್ಡ್ ಅಕೌಂಟೆಂಟ್ ಆಗಿ ಕೆಲಸ ಮಾಡುತ್ತಿದ್ದಳು. ಕಳೆದ ಒಂದು ತಿಂಗಳ ಹಿಂದೆ ಕುಟುಂಬಸ್ಥರು ನಿರ್ಧರಿಸಿದ್ದ ಮುಂಬೈನ ಮೀರಾ ರಸ್ತೆಯ ನಿವಾಸಿಯಾಗಿದ್ದ ಯುವಕನೊಂದಿಗೆ ಮದುವೆ ನಡೆದಿತ್ತು. ಆದರೆ ಮದುವೆಯಾಗುವ ಯುವಕ ತನಗೆ ಬೋಳು ತಲೆ ಇದೆ ಎಂಬುದನ್ನು ಮರೆಮಾಚಿ ಮದುವೆಯಾಗಿದ್ದ. ಇದನ್ನು ತಿಳಿದ ಯುವತಿ ಪತಿ ಹಾಗೂ ಅವರ ಕುಟುಂಬಸ್ಥರನ್ನು ಪ್ರಶ್ನೆ ಮಾಡಿದ್ದಳು, ಇದಕ್ಕೆ ಉತ್ತರಿಸಿದ್ದ ಅವರು ‘ಇಂದಿನ ಕಾಲದಲ್ಲಿ ಇದು ಸಾಮಾನ್ಯ ಸಂಗತಿ’ ಎಂದು ಹೇಳಿ ಸುಮ್ಮನಾಗಿದ್ದರು.

ತನ್ನ ಭವಿಷ್ಯದ ಕನಸಗಳೊಂದಿಗೆ ಮದುವೆಯಾಗಿದ್ದ ಯುವತಿಗೆ ಇದು ಶಾಕ್ ನೀಡಿತ್ತು. ತನಗೆ ಸುಳ್ಳು ಹೇಳಿ ಮದುವೆಯಾದ ಪತಿಯ ವಿರುದ್ಧ ಸದ್ಯ ಆಕೆ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದು, ನಯಾ ನಗರ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾಳೆ.

29 ವರ್ಷದ ಯುವಕ ಮುಂಬೈನ ಖಾಸಗಿ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದು, ವಿಗ್ ಧರಿಸಿ ಯುವತಿಗೆ ವಂಚಿಸಿ ಮದುವೆಯಾಗಿದ್ದ. ಸದ್ಯ ಆತ ಥಾಣೆ ಕೋರ್ಟಿನಲ್ಲಿ ನಿರೀಕ್ಷಣಾ ಜಾಮೀನು ಪಡೆಯಲು ಅರ್ಜಿ ಸಲ್ಲಿಸಿದ್ದಾನೆ. ಇತ್ತ ಯುವತಿ ನೀಡಿರುವ ದೂರಿನಲ್ಲಿ, ತಾನು ಪತಿ ವಿಗ್ ಧರಿಸಿರುವುದನ್ನು ತಿಳಿದು ಅಘಾತಕ್ಕೊಳಗಾಗಿದ್ದೆ. ಇದನ್ನು ಮದುವೆ ಮುನ್ನ ತಿಳಿಸಿರಲಿಲ್ಲ. ಒಂದೊಮ್ಮೆ ಆತ ತನಗೆ ಬೋಳು ತಲೆ ಇರೋ ವಿಚಾರ ತಿಳಿಸಿದ್ದರೆ ನಾನು ಮದುವೆಯಾಗುತ್ತಿರಲಿಲ್ಲ. ಮದುವೆಯ ಪ್ರಸ್ತಾಪವನ್ನೇ ತಿರಸ್ಕರಿಸುತ್ತಿದ್ದೆ ಎಂದು ವಿವರಿಸಿದ್ದಾಳೆ.