ದೇಹ ವ್ಯಾಪಾರಕ್ಕೆ ಕರೆ ತಂದಿದ್ದ 21 ಬಾಲಕಿಯರ ರಕ್ಷಣೆ

– ಗ್ರಾಮದಲ್ಲಿ ಕೂಡಿಟ್ಟು ದಂಧೆಯ ಟ್ರೈನಿಂಗ್

ಜೈಪುರ: ದೇಹ ವ್ಯಾಪಾರಕ್ಕಾಗಿ ಕರೆ ತಂದು ಗ್ರಾಮದಲ್ಲಿ ಬಂಧಿಸಿದ್ದ 21 ಅಪ್ರಾಪ್ತೆಯರನ್ನ ರಾಜಸ್ಥಾನ ಪೊಲೀಸರು ಮಿಂಚಿನ ಕಾರ್ಯಚರಣೆ ನಡೆಸಿ ರಕ್ಷಿಸಿದ್ದಾರೆ. ರಾಜಸ್ಥಾನದ ದೋಲ್ಪುರ ಜಿಲ್ಲೆಯ ಧೀಮರಿ ಗ್ರಾಮದಲ್ಲಿ ಬಾಲಕಿಯರನ್ನ ಇರಿಸಲಾಗಿತ್ತು.

ಸ್ಥಳೀಯ ಎಸ್‍ಪಿ ಸೋಮವಾರ ಜಿಲ್ಲೆಯಲ್ಲಿ ಮಹಿಳಾ ಜಾಗೃತಿ ಕಾರ್ಯಕ್ರಮ ಹಮ್ಮಿಕೊಂಡಿದ್ದರು. ಈ ಸಂಬಂಧ ಮಹಿಳಾ ಪೊಲೀಸ್ ಸಿಬ್ಬಂದಿ ಮಾರುವೇಷದಲ್ಲಿ ಗ್ರಾಮದ ಜನರೊಂದಿಗೆ ಮಾತನಾಡಿ ಹಲವು ಮಾಹಿತಿ ಪಡೆದುಕೊಳ್ಳುತ್ತಿರುವಾಗ ಸೆಕ್ಸ್ ದಂಧೆಯ ವಿಷಯ ಬಯಲಾಗಿತ್ತು. ಮಹಿಳಾ ಸಿಬ್ಬಂದಿ ಕೂಡಲೇ ಎಸ್.ಪಿ. ಕೇಸರ್ ಸಿಂಗ್ ಅವರಿಗೆ ತಿಳಿಸಿದ್ದರು.

ಖಚಿತ ಮಾಹಿತಿ ಬೆನ್ನಲ್ಲೇ ಎಚ್ಚೆತ್ತ ಎಸ್.ಪಿ. ತಮ್ಮ ತಂಡದೊಂದಿಗೆ ದಾಳಿ ನಡೆಸಿ 21 ಅಪ್ರಾಪ್ತೆಯರನ್ನ ರಕ್ಷಿಸಿದ್ದಾರೆ. ಎಲ್ಲರನ್ನು ರಿಮ್ಯಾಂಡ್ ಹೋಮ್ ನಲ್ಲಿ ಇರಿಸಲಾಗಿದ್ದು, ಸೋಮವಾರ ಬಾಲಕಿಯರನ್ನ ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಲಾಗುವುದು ಎಂದು ಕೇಸರ್ ಸಿಂಗ್ ಹೇಳಿದ್ದಾರೆ.

ಕೆಲ ಬಾಲಕಿಯರು ಏನನ್ನೂ ಮಾತನಾಡದೇ ಮೌನಕ್ಕೆ ಶರಣಾಗಿದ್ದರೆ, ಕೆಲವರು ಸ್ವ ಇಚ್ಛೆಯಿಂದ ವೇಶ್ಯಾವಾಟಿಕೆಗೆ ಬಂದಿರೋದಾಗಿ ಹೇಳಿಕೊಂಡಿದ್ದಾರೆ. ಮನೆಯಲ್ಲಿ ಬಡತನ, ಪುಟ್ಟ ತಮ್ಮ ಮತ್ತು ತಂಗಿ ಇದ್ದಾರೆ. ಹಾಗಾಗಿ ಅನಿವಾರ್ಯವಾಗಿ ಇವರ ಜೊತೆ ಬಂದಿರೋದಾಗಿ ತಮ್ಮ ಕಷ್ಟಗಳನ್ನ ಪೊಲೀಸರಿಗೆ ಹೇಳಿದ್ದಾರೆ. ಇತ್ತ ವಿಷಯ ತಿಳಿದು ಸ್ಥಳಕ್ಕಾಗಮಿಸಿರುವ ಬಾಲ ಕಲ್ಯಾಣ ಸಮಿತಿ ಸದಸ್ಯರು ಬಾಲಕಿಯರ ಆರೋಗ್ಯz ಮತ್ತು ಕುಟುಂಬದ ಮಾಹಿತಿ ಕಲೆ ಹಾಕುತ್ತಿದ್ದಾರೆ.