ಕುಸಿದ ನಿರ್ಮಾಣ ಹಂತದ ಫ್ಲೈ ಓವರ್

-ಇಬ್ಬರಿಗೆ ಗಾಯ, ಆಸ್ಪತ್ರೆಗೆ ದಾಖಲು

ಗುರುಗ್ರಾಮ: ಹರ್ಯಾಣದ ಗುರುಗ್ರಾಮನಲ್ಲಿ ನಿರ್ಮಾಣ ಹಂತದ ಫ್ಲೈಓವರ್ ನ ಒಂದು ಭಾಗ ಶನಿವಾರ ಕುಸಿದಿದೆ. ಗುರುಗ್ರಾಮದ ವಿಪುಲ್ ಗ್ರೀನ್ಸ್ ಬಳಿ ಫ್ಲೈ ಓವರ್ ಕುಸಿದ ಪರಿಣಾಮ ಇಬ್ಬರು ಗಾಯಗೊಂಡಿದ್ದಾರೆ. ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗ್ತಿದೆ.

ಬಾದಶಾಪುರ ಎಲಿವೆಟಡ್ ಹೈವೇ ಈ ನಿರ್ಮಾಣ ಕಾರ್ಯದ ಒಂದು ಭಾಗ ಕುಸಿದಿದೆ. ಒಟ್ಟು 6 ಕಿಲೋ ಮೀಟರ್ ಉದ್ದದ ಫ್ಲೈಓವರ್ ನ ಒಂದು ಬ್ಲಾಕ್ ಶನಿವಾರ ರಾತ್ರಿ ಸುಮಾರು 9.30ಕ್ಕೆ ಕುಸಿದಿದೆ. ಎನ್‍ಹೆಚ್‍ಎಐ ಈ ಕಾಮಗಾರಿಯನ್ನು ನಡೆಸುತ್ತಿತ್ತು.

ಈ ಕುರಿತು ಪ್ರತಿಕ್ರಿಯಿಸಿರುವ ಆಪ್, ಸೊಹನಾ ರಸ್ತೆಯ ಬಳಿ ನಿರ್ಮಾಣ ಹಂತದಲ್ಲಿರುವ ಫ್ಲೈಓವರ್ ಕುಸಿದಿದೆ. ನಮ್ಮೆಲ್ಲರ ಸುರಕ್ಷತೆ ಗಮನದಲ್ಲಿಟ್ಟುಕೊಂಡು ಸರ್ಕಾರ ಮತ್ತು ನಿರ್ಮಾಣ ಕಂಪನಿಯೇ ಇದರ ಹೊಣೆಯನ್ನು ಹೊರಬೇಕು ಎಂದು ಹೇಳಿದೆ. ಇತ್ತ ಡಿಸಿಎಂ ದುಷ್ಯಂತ್ ಚೌಟೆಲಾ, ಘಟನೆಯಲ್ಲಿ ಗಾಯಗೊಂಡ ಇಬ್ಬರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ. ಘಟನಾ ಸ್ಥಳಕ್ಕೆ ಎನ್‍ಹೆಚ್‍ಇಐ ಮತ್ತು ಎಸ್‍ಡಿಎಂ ಅಧಿಕಾರಿಗಳ ತಂಡ ಭೇಟಿ ನೀಡಿ ಪರಿಶೀಲನೆ ನಡೆಸುತ್ತಿದೆ ಎಂದು ಹೇಳಿದ್ದಾರೆ.