ಈರುಳ್ಳಿ, ಶುಂಠಿ ಜೊತೆ ಅನ್ನ ಸೇವಿಸಿದ ಸೆಕ್ಯೂರಿಟಿ ಗಾರ್ಡ್- ಮನಕಲಕುವ ಫೋಟೋ ವೈರಲ್

ಕೌಲಾಲಂಪುರ್: ಸೆಕ್ಯೂರಿಟಿ ಗಾರ್ಡ್ ಒಬ್ಬರು ಕೇವಲ ಈರುಳ್ಳಿ ಹಾಗೂ ಶುಂಠಿ ಜೊತೆ ಅನ್ನ ಸೇವಿಸುತ್ತಿರುವ ಫೋಟೋವೊಂದು ಇದೀಗ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದು, ಇದು ನೆಟ್ಟಿಗರ ಮನಕಲಕುವಂತೆ ಮಾಡಿದೆ. ಮಾಲೇಷ್ಯಾದ ಸೆಕ್ಯೂರಿಟಿ ಗಾರ್ಡ್ ನ ಈ ಫೋಟೋವನ್ನು ಆತನ ಸ್ನೇಹಿತ ಅಪಿತ್ ಲಿಡ್ ಎಂಬಾತ ಫೇಸ್‍ಬುಕ್‍ನಲ್ಲಿ ಶೇರ್ ಮಾಡಿದ್ದಾರೆ.

ಫೋಟೋದಲ್ಲಿ ಸೆಕ್ಯೂರಿಟಿ ಗಾರ್ಡ್ ಡ್ಯೂಟಿಯಲ್ಲಿರುವ ವೇಳೆ ಪ್ರೀತಿಯಿಂದ ಆಹಾರ ಸೇವಿಸುತ್ತಿರುವುದನ್ನು ಕಾಣಬಹುದಾಗಿದೆ. ಅಲ್ಲದೇ ಅಪಿತ್ ಲಿಡ್ ಶೇರ್ ಮಾಡಿರುವ ಮತ್ತೊಂದು ಫೋಟೋದಲ್ಲಿ ಟಿಫನ್ ಬಾಕ್ಸ್‍ನ ಒಳಗೆ ಬೇಯಿಸಿದ್ದ ಅನ್ನ, ಈರುಳ್ಳಿ ಹಾಗೂ ಶುಂಠಿ ಇರುವುದನ್ನು ಕಾಣಬಹುದಾಗಿದೆ.

ಫೋಟೋ ಜೊತೆ ಅಪಿತ್ ಲಿಡ್, ನನ್ನ ಸ್ನೇಹಿತ ಕಷ್ಟಪಟ್ಟು ಕೆಲಸ ಮಾಡುತ್ತಾನೆ. ಅವನು ತನಗೆ ಬರುವ ಸಂಬಳದಲ್ಲಿ ಬಹಳಷ್ಟು ಭಾಗ ಕುಟುಂಬಕ್ಕಾಗಿ ಮನೆಗೆ ಕಳುಹಿಸಿಕೊಡುತ್ತಾನೆ ಮತ್ತು ಸ್ವಲ್ಪ ಹಣವನ್ನು ತನ್ನ ಊಟದ ಖರ್ಚಿಗಾಗಿ ಇಟ್ಟುಕೊಳ್ಳುತ್ತಾನೆ ಎಂದು ಕ್ಯಾಪ್ಷನ್ ಹಾಕಿದ್ದಾರೆ. ಜೊತೆಗೆ ಅಪಿತ್ ಸಹ ಕೆಲವೊಮ್ಮೆ ತನ್ನ ಸ್ನೇಹಿತನನ್ನು ನೋಡಿಕೊಳ್ಳುವುದಾಗಿ ಹೇಳಿಕೊಂಡಿದ್ದಾರೆ.

ಸೋಶಿಯಲ್ ಮೀಡಿಯಾದಲ್ಲಿ ಈ ಫೋಟೋ ವೈರಲ್ ಆಗುತ್ತಿದ್ದಂತೆಯೇ 6 ಸಾವಿರಕ್ಕೂ ಅಧಿಕ ಮಂದಿ ಶೇರ್ ಮಾಡಿಕೊಂಡಿದ್ದು, ನೆಟ್ಟಿಗರು ಭಾವನಾತ್ಮಕವಾಗಿ ಕಮೆಂಟ್ ಮಾಡುತ್ತಿದ್ದಾರೆ. ಮತ್ತೆ ಕೆಲವರು ಸೆಕ್ಯೂರಿಟಿ ಗಾರ್ಡ್‍ನ ವರ್ತನೆ ಕುರಿತಂತೆ ಶುಭ ಹಾರೈಸಿ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.