ಹೆಲಿಕಾಪ್ಟರ್ ಮೂಲಕ ವರ ಗ್ರ್ಯಾಂಡ್ ಎಂಟ್ರಿ – ವಿಶೇಷ ಮದ್ವೆಗೆ ಸಾಕ್ಷಿಯಾದ ಬೆಂಗ್ಳೂರು

ಆನೇಕಲ್: ಮದುವೆ ಮಂಟಪಕ್ಕೆ ವಧು-ವರ ಅಲಂಕಾರಗೊಂಡಿದ್ದ ಕಾರು ಅಥವಾ ಇನ್ನಿತರ ವಾಹನಗಳಲ್ಲಿ ಬರುವುದು ಸಾಮಾನ್ಯ. ಆದರೆ ಸಿಲಿಕಾನ್ ಸಿಟಿಯಲ್ಲಿ ಇಂದು ನಡೆಯುತ್ತಿರುವ ಮದುವೆಗೆ ವರನೊಬ್ಬ ಗ್ರ್ಯಾಂಡ್ ಎಂಟ್ರಿ ಕೊಟ್ಟು ಅಚ್ಚರಿಗೆ ಕಾರಣವಾಗಿದ್ದಾನೆ. ಈ ಮೂಲಕ ವಿಶೇಷವಾದ ಮದುವೆಗೆ ಸಿಲಿಕಾನ್ ಸಿಟಿ ಬೆಂಗಳೂರು ಸಾಕ್ಷಿಯಾಗಿದೆ.

ಹೌದು. ಬೆಂಗಳೂರಿನಲ್ಲೊಂದು ವಿಶೇಷವಾದ ಮದುವೆ ಸಮಾರಂಭ ನಡೆದಿದೆ. ತುಮಕೂರಿನ ವರ ನಿರೂಪ್, ಬೆಂಗಳೂರಿನ ವಧು ಐಶ್ವರ್ಯಾ ಜೊತೆ ಇಂದು ದಾಂಪತ್ಯ ಜೀವನಕ್ಕೆ ಕಾಲಿಡುತ್ತಿದ್ದಾರೆ. ಆದರೆ ವಿಶೇಷ ಅಂದ್ರೆ ತುಮಕೂರಿನ ವರ ನಿರೂಪ್ ಹೆಲಿಕಾಪ್ಟರ್ ಮೂಲಕ ಚೌಟ್ರಿಗೆ ಬಂದಿದ್ದಾರೆ. ಮದುವೆ ಮಂಟಪಕ್ಕೆ ಗ್ರ್ಯಾಂಡ್ ಎಂಟ್ರಿ ಕೊಡುವ ಮೂಲಕ ನೆರೆದಿದ್ದವರ ಹುಬ್ಬೇರಿಸುವಂತೆ ಮಾಡಿದ್ದಾರೆ.

ವೃತ್ತಿಯಲ್ಲಿ ರೈಸ್ ಮಿಲ್ ಜೊತೆ ಉದ್ಯಮಿಯಾಗಿರುವ ನಿರೂಪ್ ಬಲರಾಮ್ ಶೆಟ್ಟಿ ಮತ್ತು ರಮಾದೇವಿ ದಂಪತಿ ಪುತ್ರ. ಇನ್ನು ಮೂಲತಃ ಬೆಂಗಳೂರು ನಿವಾಸಿಯಾಗಿರುವ ವಧು ಐಶ್ವರ್ಯಾ ಮಾದವಿ ಮತ್ತು ಕಿಶೋರ್ ದಂಪತಿ ಪುತ್ರಿಯಾಗಿದ್ದಾರೆ. ಈ ಕಾರ್ಯಕ್ರಮ ಬೆಂಗಳೂರಿನ ತಲಘಟ್ಟಪುರದಲ್ಲಿರುವ ಬಿಆರ್ ಎಸ್ ಗ್ರಾಂಡ್ಯುರ್ ನಲ್ಲಿ ನಡೆಯುತ್ತಿದೆ. ಒಟ್ಟಿನಲ್ಲಿ ತುಮಕೂರಿನಿಂದ ಹೆಲಿಕಾಪ್ಟರ್ ನಲ್ಲಿ ಕಲ್ಯಾಣಮಂಟಪಕ್ಕೆ ವರನ ಎಂಟ್ರಿ ಕೊಟ್ಟಿರುವುದು ಅಚ್ಚರಿ ಹಾಗೂ ವಿಶೇಷವಾಗಿದೆ.