ಶುಭಾಗೆ ಸೋಮಾರಿ ಸುಬ್ಬಿ ಅಂದ ದೊಡ್ಮನೆ ಸ್ಪರ್ಧಿಗಳು

ಈ ವಾರ ದೊಡ್ಮನೆ ಮಂದಿಗೆ ಕಣ್ಮಣಿ ಅವಾರ್ಡ್ ನೀಡುವ ಕಾರ್ಯಕ್ರಮವನ್ನು ಆಯೋಜಿಸಿದ್ದು, ಮನೆಯ ಎಲ್ಲಾ ಸ್ಪರ್ಧಿಗಳಿಗೂ ಕಾಮಿಡಿ ಪ್ರಶ್ನೆಗಳನ್ನು ಕೇಳುವ ಮೂಲಕ ಎಲ್ಲರಿಗೂ ಅವಾರ್ಡ್ ನೀಡುತ್ತಾ ಬಂದಿದೆ.

ಸದ್ಯ ಕಣ್ಮಣಿ ಈ ಮನೆಯಲ್ಲಿ ಸೋಮಾರಿ ಸುಬ್ಬಿ ಯಾರು ಎಂಬ ಪ್ರಶ್ನೆ ಕೇಳಿದೆ. ಈ ವೇಳೆ ಶುಭಾ ಪೂಂಜಾ ಸ್ವತಃ ತಾವೇ ಎಂದು ಹೇಳುತ್ತಾ ಎರಡು ಕೈಗಳನ್ನು ಮೇಲಕ್ಕೆ ಎತ್ತುತ್ತಾರೆ. ಆಗ ಮನೆಯ ಸ್ಪರ್ಧಿಗಳು ಕೂಡ ಶುಭಾ ಕಡೆ ಬೆರಳು ಮಾಡಿದ್ದಾರೆ. ಇದರಲ್ಲಿ ಶುಭಾಗೆ ಕಾಂಪಿಟೇಷನ್ ನೀಡಲು ಯಾರಿಂದಲೂ ಸಾಧ್ಯವಿಲ್ಲ. ಸೋಮಾರಿ ಸುಬ್ಬಿ ಶುಭಾ. ಇದಕ್ಕೆ ವೋಟು ಇಲ್ಲ. ಅಭಿಪ್ರಾಯವಿಲ್ಲ, ಏನು ಇಲ್ಲ. ಒಂದೇ ಬಾರಿಗೆ ಸುಗ್ರಿವಾಜ್ಞೆ, ಶುಭಾಗೆ ಪ್ರತಿ ಸ್ಪರ್ಧಿಯೇ ಇಲ್ಲ ಎನ್ನುತ್ತಾರೆ.

ನಂತರ ರಘು ಕೂಡ, ಇವರೆಷ್ಟು ಸೋಮಾರಿ ಎಂದರೆ ಟ್ರೋಫಿನೂ ಯಾರಾದರೂ ಎತ್ತಿಕೊಂಡು ಬಂದು ಕೊಡಿ ಅಂದಾಗ ಯಾವುದೇ ಟಾಸ್ಕ್ ಕೊಟ್ಟರೂ ಇದು ಯಾಕೆ ಕೊಡಬೇಕಾಗಿತ್ತು. ಮೈಕ್ ಸರಿ ಮಾಡಿಕೊಳ್ಳಿ ಎಂದರೆ ಯಾಕೆ ಹಾಗೆ ಕೂಗಾಡುತ್ತೀರಾ ಬಿಗ್‍ಬಾಸ್, ಏನು ಗಂಟು ಹೋಗುತ್ತಾ ಎಂದು ಕೇಳುತ್ತಾರೆ. ಕೆಲಸದ ತಂಟೆಗೆ ಬರುವುದಿಲ್ಲ. ಅಡುಗೆ ಹೀಗೆ ಎಲ್ಲದರನ್ನು ನೆಗೆಲೆಟ್ ತೋರಿಸುತ್ತಾರೆ ಎಂದು ಮಂಜು ಹೇಳುತ್ತಾರೆ.

ಪ್ರಶಾಂತ್ ಕೂಡ ಬೆಳಗ್ಗೆ ಎದ್ದು ಕುಳಿತುಕೊಂಡ ನಂತರ ಟೀ ಮಾಡಿಕೊಳ್ಳುವುದರಿಂದ ಹಿಡಿದು, ಟೀ ಕಪ್ ಕೊಡುವವರೆಗೂ ಹುಡುಕಿಕೊಂಡು ಹೋಗಿ ಕೊಡಬೇಕು. ಒಳ್ಳೆ ರಾಣಿ ತರಹ ಇರುತ್ತಾರೆ, ಅವರದು ಹೊರಗಡೆಯೂ ರಾಣಿ ಜೀವನ, ಬಿಗ್‍ಬಾಸ್ ಮನೆಯಲ್ಲಿಯೂ ರಾಣಿ ಜೀವನ ಎಂದು ಹಾಸ್ಯ ಮಾಡುತ್ತಾರೆ.

ಈ ವೇಳೆ ನಿಧಿ ಸುಬ್ಬಯ್ಯ ಕೂಡ ಶುಭಾ ಹಾಗೂ ನಾನು ಇಬ್ಬರು ಒಂದು ವೇಳೆ ಬಾತ್ ರೂಮ್ ಡಿಪಾರ್ಟ್‍ಮೆಂಟ್‍ನಲ್ಲಿ ಒಟ್ಟಿಗೆ ಇದ್ದರೆ, ನಾನು ಇವತ್ತು ಬಾತ್ ರೂಮ್ ಕ್ಲೀನ್ ಮಾಡುತ್ತೇನೆ ಎಂದು ನಾಲ್ಕು ಜನರನ್ನು ಕರೆದುಕೊಂಡು ಬಂದು ತೋರಿಸುತ್ತಾರೆ. ಕ್ಲೀನ್ ಮಾಡಿದ ನಂತರ ಹೇಗಿದೆ ಕ್ಲೀನಿಂಗ್ ಎಂದು ಕೇಳಿ ಹೋದ ಬಳಿಕ, ನಾನು ಮತ್ತೊಮ್ಮೆ ಬಾತ್ ರೂಮ್ ಕ್ಲೀನ್ ಮಾಡುತ್ತೇನೆ. ಅಡುಗೆ ಮನೆಯಲ್ಲಿಯೂ ಹಾಗೆ ಗಲೀಜು ಮಾಡುತ್ತಾಳೆ. ಅವಳ ಬೆಡ್ ಹಾಗೂ ಬಟ್ಟೆ ಕ್ಲೀನ್ ಮಾಡಿಕೊಳ್ಳಲು ಹೇಳಿದರೂ ನಿನಗೇನು ಪ್ರಾಬ್ಲಂ ನಿನ್ನ ಬೆಡ್ ಸೈಡ್ ಕ್ಲೀನ್ ಇದ್ಯಾಲ್ಲಾ ಹೋಗಿ ಮಲಗಿಕೋ ಅಂತಾಳೆ ಎಂದು ರೇಗಿಸುತ್ತಾರೆ.

ಇಂದು ಬೆಳಗ್ಗೆ ಎದ್ದು ಬ್ರಶ್ ಮಾಡುವಾಗ ಕೂಡ ಶುಭಾ ಸೋಫಾ ಮೇಲೆ ಕುಳಿತುಕೊಂಡು ಮಾಡುತ್ತಿದ್ದರು ಎಂದು ಅರವಿಂದ್ ಹೇಳುತ್ತಾ, ಮಿಮಕ್ರಿ ಮಾಡುತ್ತಾ ತೋರಿಸುತ್ತಾರೆ. ಅದನ್ನು ನೋಡಿ ಮನೆ ಮಂದಿಯೆಲ್ಲಾ ಜೋರಾಗಿ ನಗುತ್ತಾರೆ.