ಮನೆಯ ಗಾಜಿನ ಬೌಲ್‍ನ್ನು ಒಡೆದಿದಕ್ಕೆ ವೈಷ್ಣವಿಗೆ ಸಿಕ್ಕ ಶಿಕ್ಷೆ ಏನು ಗೊತ್ತಾ?

ಬೆಂಗಳೂರು: ಬಿಗ್‍ಮನೆಯಲ್ಲಿ ಟಾಸ್ಕ್, ಹರಟೆ, ಮಾತು, ಕವನ ಹೀಗೆ ಸಂತೋಷದಿಂದ ಇರುವ ಸ್ಪರ್ಧಿಗಳು ಸ್ಪರ್ಧೆಯಲ್ಲಿ ಸೋತಾಗ ಅಥವಾ ಏನಾದರು ತಪ್ಪು ಮಾಡಿದರೆ ಅವರಿಗೆ ಬಿಗ್‍ಬಾಸ್ ಶಿಕ್ಷೆ ಕೂಡ ಕೊಡುತ್ತಾರೆ. ಬಿಗ್ ಮನೆಯಲ್ಲಿದ್ದ ಗಾಜಿನ ಬೌಲ್‍ನ್ನು ಒಡೆದು ಹಾಕಿದ್ದ ಮನೆಯ ಸದಸ್ಯೆ ವೈಷ್ಣವಿ ಇದೀಗ ಬಿಗ್ ಕೆಂಗಣ್ಣಿಗೆ ಗುರಿಯಾಗಿ ಶಿಕ್ಷೆ ಅನುಭವಿಸಲು ತಯಾರಾಗಿದ್ದಾರೆ.

ಬಿಗ್ ಮನೆಯಲ್ಲಿ ತುಂಬಾ ಲವಲವಿಕೆಯಿಂದ ಓಡಾಡಿಕೊಂಡು ಸ್ಪರ್ಧೆಯಲ್ಲಿ ಉತ್ತಮವಾಗಿ ತಮ್ಮ ಸಾಮರ್ಥ್ಯ ವನ್ನು ತೋರಿಸುತ್ತಿರುವ ವೈಷ್ಣವಿ ಮನೆಯ ಗಾಜಿನ ಬೌಲ್‍ನ್ನು ಒಡೆದು ಹಾಕಿದ್ದರು. ಇದರಿಂದ ಕೆರಳಿರುವ ಬಿಗ್‍ಬಾಸ್ ಇದೀಗ ಶಿಕ್ಷೆಯ ಆಜ್ಞೆ ಪತ್ರವನ್ನು ಬಿಗ್ ಮನೆಗೆ ತಲುಪಿಸಿದ್ದಾರೆ. ಈ ಪತ್ರದಲ್ಲಿರುವ ಶಿಕ್ಷೆಯ ಸವಿವರವನ್ನು ಪ್ರಶಾಂತ್ ವೈಷ್ಣವಿಗೆ ಓದಿ ತಿಳಿಸಿದ್ದಾರೆ.

ಬಿಗ್‍ಬಾಸ್, ವೈಷ್ಣವಿ ಕುರಿತು ಪತ್ರದಲ್ಲಿ ನೀವು ಚೆನ್ನಾಗಿ ನೃತ್ಯ ಮಾಡುತ್ತೀರಿ ಎಂದು ಗೊತ್ತಿದೆ. ಹಾಗಾಗಿ ಇನ್ನು ಮುಂದೆ ನಿಮಗೆ ನೀರು ಕುಡಿಯಬೇಕು ಎಂದಾಗ ಮನೆಯ ಸದಸ್ಯರೊಬ್ಬರಿಗೆ ಒಂದು ಡ್ಯಾನ್ಸ್ ಸ್ಟೆಪ್ ಹೇಳಿಕೊಡಬೇಕು. ಅದೊಂದು ಸಂಪೂರ್ಣ ಸ್ಟೆಪ್ ಆಗಿರಬೇಕು. ಈ ಸ್ಟೆಪ್‍ನ್ನು ಅವರು ಕಲಿತು ನಿಮಗೆ ತೋರಿಸಬೇಕು. ಅದು ಸರಿಯಾಗಿದ್ದರೆ ಮಾತ್ರ ಅವರು ನಿಮಗೆ ನೀರು ಕುಡಿಸಬೇಕು. ನೀವಾಗಿ ಲೋಟವನ್ನು ಮುಟ್ಟುವಂತಿಲ್ಲ ಅವರೇ ನಿಮಗೆ ನೀರು ಕುಡಿಸಬೇಕು ಇದು ಮನೆಯ ಗಾಜಿನ ಬೌಲ್‍ನ್ನು ಒಡೆದು ಹಾಕಿದ್ದಕ್ಕಾಗಿ ಈ ಶಿಕ್ಷೆ. ಬಿಗ್‍ಬಾಸ್ ಮುಂದಿನ ಆದೇಶದವರೆಗೆ ಈ ಶಿಕ್ಷೆ ಮುಂದುವರಿಯುತ್ತದೆ ಎಂದು ಬರೆದುಕೊಂಡು ಶಿಕ್ಷೆಯನ್ನು ತಿಳಿಸಿದ್ದಾರೆ.

ಶಿಕ್ಷೆಯ ಆದೇಶ ಪತ್ರವನ್ನು ತಿಳಿದುಕೊಂಡ ಬಳಿಕ ವೈಷ್ಣವಿ ಬಿಗ್‍ಬಾಸ್ ಕ್ಯಾಮೆರಾದ ಮುಂದೆ ನಿಂತು ನಿಮ್ಮ ಶಿಕ್ಷೆಯನ್ನು ಸ್ವೀಕರಿಸಿದ್ದೇನೆ ಇನ್ನು ಮುಂದೆ ಯಾವತ್ತು ಆ ರೀತಿ ತಪ್ಪು ಮಾಡುವುದಿಲ್ಲ ಎಂದು ಮನವಿ ಮಾಡಿಕೊಂಡರು.