ಬ್ರೇಕ್ ಫೇಲ್ ಆಗಿ ವಾಹನಕ್ಕೆ ಗುದ್ದಿದ ಕಾರು ಫ್ಲೈಓವರ್ ಡಿವೈಡರ್ ನಲ್ಲಿ ನಿಲ್ತು!

– 7 ವಾಹನಗಳ ನಡುವೆ ಸರಣಿ ಅಪಘಾತ

ನವದೆಹಲಿ: ಕಾರಿನ ಬ್ರೇಕ್ ಫೇಲ್ ಆದ ಪರಿಣಾಮ 7 ವಾಹನಗಳು ಪರಸ್ಪರ ಒಂದಕ್ಕೊಂದು ಡಿಕ್ಕಿ ಹೊಡೆದುಕೊಂಡಿರುವ ಘಟನೆ ನವದೆಹಲಿಯ ಬುರಾರಿ ಫ್ಲೈ ಓವರ್ ನಲ್ಲಿ ನಡೆದಿದೆ.

ಬುರಾರಿ ಫ್ಲೈ ಓವರ್ ಮೇಲೆ ವೇಗವಾಗಿ ಬರುತ್ತಿದ್ದ ಕಾರೊಂದು ಬ್ರೇಕ್ ಫೇಲ್ ಆದ ಪರಿಣಾಮ ಎದುರಿಗೆ ಹೋಗುತ್ತಿದ್ದ ವಾಹನಕ್ಕೆ ಡಿಕ್ಕಿಯಾಗಿದೆ. ಈ ವೇಳೆ ಹಿಂದೆ ಬರುತ್ತಿದ್ದ ವಾಹನಗಳು ಒಂದಕ್ಕೊಂದು ಡಿಕ್ಕಿಯಾಗಿ ಬರೋಬ್ಬರಿ 7 ವಾಹನಗಳು ಪರಸ್ಪರ ಡಿಕ್ಕಿ ಹೊಡೆದುಕೊಂಡಿವೆ.

ಈ ಅಪಘಾತದಲ್ಲಿ ಒಂದು ಕಾರ್ ಫ್ಲೈಓವರ್ ನ ಡಿವೈಡರ್ ನ ಮೇಲೆ ಹೋಗಿ ನಿಂತಿದೆ. ಒಂದು ಕಾರಿನ ಬ್ರೇಕ್ ವೈಫಲ್ಯ ಭಾರೀ ಪ್ರಮಾಣದ ಅವಾಂತರವನ್ನೇ ಬುರಾರಿ ಫ್ಲೈ ಓವರ್ ಮೇಲೆ ಉಂಟುಮಾಡಿತ್ತು.

ಈ ಅಪಘಾತದಲ್ಲಿ ನಾಲ್ವರು ಗಾಯಗೊಂಡಿದ್ದಾರೆ. ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಸಂಜೆಯ ವೇಳೆ ಈ ಅಪಘಾತ ಉಂಟಾಗಿರುವ ಕಾರಣದಿಂದ ಟ್ರಾಫಿಕ್ ಜಾಮ್ ಉಂಟಾಗಿತ್ತು. ಗಂಟೆಗಟ್ಟಲೇ ವಾಹನಗಳು ಸಾಲುಗಟ್ಟಿ ನಿಂತಿದ್ದವು.