ಬಸಣ್ಣಿ ಬೆಡಗಿಯ ಇನ್‍ಸ್ಟಾ ಅಕೌಂಟ್ ಹ್ಯಾಕ್

ಬೆಂಗಳೂರು: ಇತ್ತೀಚೆಗೆ ಹ್ಯಾಕಿಂಗ್ ಸುದ್ದಿ ಸದ್ದು ಮಾಡುತ್ತಿದ್ದು, ಈ ಹಿಂದೆ ಆಶಿಕಾ ರಂಗನಾಥ್, ವಶಿಷ್ಠ ಸಿಂಹ ಇನ್‍ಸ್ಟಾ ಕೌಂಟ್ ಹ್ಯಾಕ್ ಆಗಿತ್ತು. ಇದೀಗ ಬಸಣ್ಣಿ ಬೆಡಗಿ ತಾನ್ಯಾ ಹೋಪ್ ಇನ್‍ಸ್ಟಾ ಖಾತೆ ಹ್ಯಾಕ್ ಆಗಿದೆ.

ಯಜಮಾನ ಸಿನಿಮಾದ ಬಸಣ್ಣಿ ಬಾ ಹಾಡಿಗೆ ಹೆಜ್ಜೆ ಹಾಕುವ ಮೂಲಕ ಕನ್ನಡಿಗರ ಮನೆ ಮಾತಾಗಿರುವ ತಾನ್ಯಾ ಹೋಪ್, ಬಳಿಕ ಅಭಿಷೇಕ್ ಅಂಬರೀಶ್ ಅಭಿನಯದ ಅಮರ್ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಮಾತ್ರವಲ್ಲದೆ ತೆಲುಗು, ತಮಿಳು ಸಿನಿಮಾಗಳಲ್ಲಿ ಸಹ ತಾನ್ಯಾ ನಟಿಸಿದ್ದಾರೆ. ಹೀಗಿರುವಾಗಲೇ ಇದೀಗ ಇದ್ದಕ್ಕಿದ್ದಂತೆ ಅವರ ಇನ್‍ಸ್ಟಾ ಖಾತೆ ಹ್ಯಾಕ್ ಆಗಿರುವ ಬಗ್ಗೆ ಸುಳಿವು ಸಿಕ್ಕಿದೆ.

ಬಹುತೇಕ ನಟ, ನಟಿಯರು ತಮ್ಮ ವೃತ್ತಿ ಜೀವನ ಹಾಗೂ ವೈಯಕ್ತಿಕ ಜೀವನದ ಬಗ್ಗೆ ಇನ್‍ಸ್ಟಾಗ್ರಾಮ್ ಮೂಲಕವೇ ಅಪ್‍ಡೇಟ್ ನೀಡುತ್ತಾರೆ. ಅದೇ ರೀತಿ ತಾನ್ಯಾ ಸಹ ಸಖತ್ ಆಕ್ಟಿವ್ ಆಗಿದ್ದರು. ತಮ್ಮ ಗ್ಲಾಮರಸ್ ಫೋಟೊ, ವರ್ಕೌಟ್, ಡ್ಯಾನ್ಸ್ ವಿಡಿಯೋಗಳನ್ನು ತಮ್ಮ ಅಭಿಮಾನಿಗಳೊಂದಿಗೆ ಹಂಚಿಕೊಳ್ಳುತ್ತಿರುತ್ತಾರೆ. ಆದರೆ ಇದೀಗ ಅವರ ಅಕೌಂಟ್ ಹ್ಯಾಕ್ ಆಗಿದೆ ಎನ್ನಲಾಗಿದೆ.

ಅಕೌಂಟ್ ಹ್ಯಾಕ್ ಆಗಿದ್ದನ್ನು ಕಂಡು ಅವರ ಅಭಿಮಾನಿಗಳು ಗಾಬರಿಯಾಗಿದ್ದು, ಪ್ರೋಫೈಲ್ ಪಿಕ್ಚರ್ ರಿಮೂವ್ ಆಗಿತ್ತು. ಆದರೆ ಹೆಸರು ಮಾತ್ರ ಹೋಪ್ ತಾನ್ಯಾ ಎಂದಿತ್ತು. ಹೀಗೆ ಬದಲಾಗಿರುವುದನ್ನು ಸಹ ಗಮನಿಸಿದ್ದಾರೆ. ವಿಷಾದದ ಸಂಗತಿ ಎಂದರೆ ಹ್ಯಾಕ್ ಬಗ್ಗೆ ನಟಿಗೆ ಸುಳಿವು ಸಹ ಸಿಕ್ಕಿಲ್ಲ. ಸ್ಯಾಂಡಲ್‍ವುಡ್‍ನಲ್ಲಿ ಈಗಾಗಲೇ ಅನೇಕರು ಹ್ಯಾಕರ್ ಗಳಿಗೆ ಬಲಿಯಾಗಿದ್ದಾರೆ.

ಆಶಿಕಾ ರಂಗನಾಥ್, ಮನ್ವಿತಾ ಕಾಮತ್ ಹಾಗೂ ವಶಿಷ್ಠ ಸಿಂಹ ಅವರ ಇನ್‍ಸ್ಟಾ ಖಾತೆಗಳು ಸಹ ಹ್ಯಾಕ್ ಆಗಿದ್ದವು. ಕಾಪಿರೈಟ್ ಉಲ್ಲಂಘನೆ ಎಂದು ಹೇಳಿಕೊಳ್ಳುವ ಕ್ಲಿಕ್ ಬೈಟ್ ಲಿಂಕ್ ಬಂದಿದ್ದು, ಇದಕ್ಕೆ ಪ್ರತಿಕ್ರಿಯಿಸಿದ್ದರಿಂದ ತಾತ್ಕಾಲಿಕವಾಗಿ ಅವರ ಇನ್‍ಸ್ಟಾಗ್ರಾಮ್ ಖಾತೆಗಳು ಹ್ಯಾಕ್ ಆಗಿದ್ದವು. ಈ ಮೂಲಕ ತಾತ್ಕಾಲಿಕವಾಗಿ ತಮ್ಮ ಇನ್‍ಸ್ಟಾಗ್ರಾಮ್ ಖಾತೆಯ ಮೇಲಿನ ಹಿಡಿತವನ್ನು ಕಳೆದುಕೊಂಡಿದ್ದರು.

ಲ್ಯಾಂಡಿಂಗ್ ಪೇಜ್‍ನಲ್ಲಿ ಮನ್ವಿತಾ ಹಾಗೂ ಆಶಿಕಾ ಟರ್ಕಿಶ್ ಮೂಲದವರಂತೆ ಕಾಣುವ ಸಂದೇಶ ಕಾಣಿಸುತ್ತಿತ್ತು. ಆದರೆ ವಶಿಷ್ಠ ಸಿಂಹ ಅವರ ಖಾತೆಯನ್ನು ಮುಳಬಾಗಿಲಿನವರು ಹ್ಯಾಕ್ ಮಾಡಿದ್ದರು. ಅಭಿಮಾನಿಗಳೊಂದಿಗೆ ನಟ ಚಾಟ್ ಮಾಡುವ ರೀತಿ ಹ್ಯಾಕರ್ ಗಳು ವರ್ತಿಸಿದ್ದರು.

ಇದೀಗ ತಾನ್ಯಾ ಹೋಪ್ ಖಾತೆ ಹ್ಯಾಕ್ ಆಗಿರುವುದರಿಂದ ಅಭಿಮಾನಿಗಳು ಬೇಸರಗೊಂಡಿದ್ದು, ಮತ್ತೆ ಯಾವಾಗ ಮರುಳುತ್ತಾರೆ ಎಂದು ಪ್ರಶ್ನಿಸುತ್ತಿದ್ದಾರೆ. ಅಲ್ಲದೆ ತಮ್ಮ ಖಾತೆ ಹ್ಯಾಕ್ ಆಗಿರುವ ಬಗ್ಗೆ ತಾನ್ಯಾ ಯಾವುದೇ ರೀತಿಯ ಸುಳಿವು ನೀಡಿಲ್ಲ. ಹೀಗಾಗಿ ತಮ್ಮ ನೆಚ್ಚಿನ ನಟಿ ಮರಳುವುದನ್ನು ಫ್ಯಾನ್ಸ್ ಕಾತರದಿಂದ ಕಾಯುತ್ತಿದ್ದಾರೆ.