ತಲೆಇಲ್ಲದ ಮೃತ ದೇಹ ಚರಂಡಿಯಲ್ಲಿ ಪತ್ತೆ- ಗ್ರಾಮಸ್ಥರಲ್ಲಿ ಆತಂಕ

ಲಕ್ನೋ: ತಲೆ ಇಲ್ಲದ ಯುವಕನ ಮೃತ ದೇಹ ಚರಂಡಿಯಲ್ಲಿ ಪತ್ತೆಯಾಗಿರುವ ಘಟನೆ ಫಿರೋಜಾಬಾದ್‍ನಲ್ಲಿ ನಡೆದಿದೆ.

ಉತ್ತರ ಪ್ರದೇಶದ ಫಿರೋಜಾಬಾದ್ ಜಿಲ್ಲೆಯ ಪೊಲೀಸ್ ಠಾಣಾ ಪ್ರದೇಶವಾದ ಶಿಕೋಹಾಬಾದ್‍ನ ರಾಮ್‍ನಗರ ಗ್ರಾಮದಲ್ಲಿ ವಿಕೃತವಾಗಿ ಕೊಲೆಯಾದ ತಲೆ ಇಲ್ಲದ ದೇಹ ಪತ್ತೆಯಾಗಿದ್ದು, ಗ್ರಾಮದಲ್ಲಿ ಆತಂಕ ಉಂಟುಮಾಡಿದೆ.

ರಾಮ್‍ನಗರ ಗ್ರಾಮದ ರೈತರು ಪ್ರತಿದಿನ ತಮ್ಮ ಹೊಲಗಳಿಗೆ ಬೆಳೆ ನೋಡಲು ಹೋಗುತ್ತಿದ್ದರು. ಈ ವೇಳೆ ಹೊಲದ ಬಳಿ ದುರ್ವಾಸನೆ ಬರುತ್ತಿರುವುದನ್ನು ಗಮನಿಸಿದ್ದಾರೆ. ಏನಿರಬಹುದು ಎಂದು ಸುತ್ತಾಮುತ್ತ ಹುಡುಕಿದ್ದಾರೆ. ಆಗ ತಲೆ ಇಲ್ಲದೆ ಬಿದ್ದಿದ್ದ ವ್ಯಕ್ತಿಯ ಮೃತ ದೇಹವನ್ನು ಕಂಡು ಗ್ರಾಮಸ್ಥರು ಗುಂಪು ಸೇರಿದ್ದಾರೆ. ತಕ್ಷಣ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

ಮೃತ ಯುವಕನ ವಯಸ್ಸನ್ನು ಸುಮಾರು 25 ರಿಂದ 30 ವರ್ಷಗಳು ಎಂದು ಹೇಳಲಾಗುತ್ತಿದೆ. ಆದರೆ ಈ ಅಪರಿಚಿತ ವ್ಯಕ್ತಿ ಯಾರು? ಮತ್ತು ಯಾವ ಕಾರಣಕ್ಕಾಗಿ ಕೊಲೆಯಾಗಿದ್ದಾನೆ ಎಂಬುದು ಪೊಲೀಸರ ತನಿಖೆಯಿಂದ ತಿಳಿದು ಬರಬೇಕಿದೆ. ಸದ್ಯ ಪೊಲೀಸರು ಸ್ಥಳಕ್ಕೆ ಬಂದು ತನಿಖೆ ಆರಂಭಿಸಿದ್ದಾರೆ. ಪೊಲೀಸ್ ವರಿಷ್ಠಾಧಿಕಾರಿ ರಾಜೇಶ್ ಕುಮಾರ್ ಸ್ಥಳದಲ್ಲಿ ಪರಿಶೀಲನೆ ನಡೆಸುತ್ತಿದ್ದಾರೆ.

ತಲೆ ಇಲ್ಲದ ದೇಹ ಮೈನ್‍ಪುರಿ ರಸ್ತೆಯ ಮೈನಿ ಗ್ರಾಮದ ಬಳಿ ಪತ್ತೆಯಾಗಿದೆ. ಈ ಪ್ರದೇಶದಲ್ಲಿ ಹೆಚ್ಚಾಗಿ ಹುಲ್ಲುಗಾವಲು ಇದೆ. ಚರಂಡಿಯಲ್ಲಿ ತಲೆ ಕತ್ತರಿಸಿದ ಶವ ಪತ್ತೆಯಾಗಿರುವ ಹಿನ್ನೆಲೆ ತನಿಖೆ ನಡೆಸುತ್ತಿದ್ದೇವೆ. ಕೊಲೆಯಾಗಿ ಇಲ್ಲಿ ಎಸೆಯಲ್ಪಟ್ಟ ವ್ಯಕ್ತಿ ಯಾರು ಎಂದು ತಿಳಿದುಬರಬೇಕು. ಸದ್ಯ ದೇಹದಿಂದ ಬೆರ್ಪಟ್ಟ ತಲೆಗಾಗಿ ಹುಡುಕಾಟ ನಡೆಸುತ್ತಿದ್ದೇವೆ ಎಂದು ಪೊಲೀಸ್ ವರಿಷ್ಠಾಧಿಕಾರಿ ರಾಜೇಶ್ ಕುಮಾರ್ ತಿಳಿಸಿದ್ದಾರೆ.