ಉಮ್ರಾ ಖರ್ಜೂರ ಕೊಟ್ಟ ಜಮೀರ್‌ಗೆ ಸಿಎಂ ಎಚ್‍ಡಿಕೆಯಿಂದ ಗಿಫ್ಟ್!

ಬೆಂಗಳೂರು: ಸಿದ್ದರಾಮಯ್ಯ ಬಳಸಿದ ಫಾರ್ಚೂನರ್ ಕಾರನ್ನೇ ನೀಡಬೇಕೆಂದು ಬೇಡಿಕೆ ಇಟ್ಟಿದ್ದ ಆಹಾರ ಮತ್ತು ನಾಗರಿಕ ಪೂರೈಕೆ ಸಚಿವ ಜಮೀರ್ ಅಹ್ಮದ್ ಆಸೆಯನ್ನು ಸಿಎಂ ಎಚ್ ಡಿ ಕುಮಾರಸ್ವಾಮಿ ಈಡೇರಿಸಿದ್ದಾರೆ.

ಈ ಹಿಂದೆ ಜಮೀರ್ ಅಹ್ಮದ್ ನನಗೆ ಮಾಜಿ ಸಿಎಂ ಸಿದ್ದರಾಮಯ್ಯ ಬಳಸಿದ ಕೆಎ 01, ಜಿ 5734 ನಂಬರಿನ ಫಾರ್ಚುನರ್ ಕಾರನ್ನೇ ನೀಡಬೇಕೆಂದು ಪಟ್ಟು ಹಿಡಿದಿದ್ದರು. ಆದರೆ ಜಮೀರ್ ಅಹ್ಮದ್ ಬೇಡಿಕೆಗೆ ಸಿಎಂ ಎಚ್‍ಡಿಕೆ ಮಾತ್ರ ಡೋಂಟ್ ಕೇರ್ ಎಂದಿದ್ದರು. ಆ ಕಾರನ್ನು ಯಾರಾದರೂ ಹಿರಿಯ ಮಂತ್ರಿಗಳಿಗ ನೀಡಿ ಎಂದು ಅಧಿಕಾರಿಗಳಿಗೆ ಸಿಎಂ ಕುಮಾರಸ್ವಾಮಿ ಸೂಚಿಸಿದ್ದರು. ಆದರೆ ಜಮೀರ್ ರ ಈ ಆಸೆಯನ್ನು ಎಚ್‍ಡಿಕೆ ತಿರಸ್ಕರಿಸಿದ್ದರಿಂದ ಸಿಎಂ ಮೇಲೆ ಬೇಸರಗೊಂಡಿದ್ದರು.

ಆದರೆ ಜಮೀರ್ ಅಹ್ಮದ್ ಮಾತ್ರ ತಮಗೆ ಸಿದ್ದರಾಮಯ್ಯ ಅಂದ್ರೆ ಇಷ್ಟ, ನನಗೆ ಅದೇ ಕಾರು ಬೇಕು. ಅದರಲ್ಲಿ ಪ್ರವಾಸ ಮಾಡೋಕೆ ಚೆನ್ನಾಗಿರುತ್ತೆ. ಅಂಥ ದೊಡ್ಡ ಗಾಡಿಯಲ್ಲಿ ಅಡ್ಡಾಡಿದರೆ ತಾನೇ ನಾನು ಮಂತ್ರಿ ಅನ್ನೋದು ಜನರಿಗೆ ಗೊತ್ತಾಗೊದು ಎಂದಿದ್ದರು. ಇದನ್ನು ಓದಿ: ಸಿದ್ದರಾಮಯ್ಯ ಕಾರು ನನಗ್ಯಾಕೆ ಬೇಕು: ಮಾಧ್ಯಮಗಳ ಮುಂದೆ ಕಾರಣ ಬಿಚ್ಚಿಟ್ಟ ಜಮೀರ್ ಅಹ್ಮದ್

ಈ ನಡುವೆ ಜಮೀರ್ ಅಹ್ಮದ್ ಅವರು ಕುಮಾರಸ್ವಾಮಿಯವರಿಗೆ ಉಮ್ರಾ ಖರ್ಜೂರ ನೀಡಿದ್ದರು. ಈ ಖರ್ಜುರ ನೀಡಿದ ಪರಿಣಾಮವೋ ಏನು ಗೊತ್ತಿಲ್ಲ ನಂತರ ಕುಮಾರಸ್ವಾಮಿ ಮತ್ತು ಜಮೀರ್ ಅಹ್ಮದ್ ಬಾಂಧವ್ಯ ಜಾಸ್ತಿಯಾಯಿತು. ಪರಿಣಾಮ ಈಗ ಕುಮಾರಸ್ವಾಮಿ ಅವರು ಸಿದ್ದರಾಮಯ್ಯ ಬಳಸುತ್ತಿದ್ದ ಫಾರ್ಚೂನರ್ ಕಾರನ್ನೇ ಜಮೀರ್ ಅವರಿಗೆ ಗಿಫ್ಟ್ ನೀಡಿದ್ದಾರೆ.