ಕಲಬುರಗಿಯಲ್ಲಿ ಪೊಲೀಸಪ್ಪನ ಮಗನಿಂದ ಲವ್, ಸೆಕ್ಸ್- ಗರ್ಭಿಣಿ ಎಂದು ಗೊತ್ತಾಗಿ ಮರ್ಡರ್

ಕಲಬುರಗಿ: ಪೊಲೀಸ್ ಅಧಿಕಾರಿಯ ಮಗನೊಬ್ಬ ಯುವತಿಯನ್ನು ಪ್ರೀತಿಸಿ ಆಕೆಯ ಜೊತೆ ದೈಹಿಕ ಸಂಬಂಧ ಬೆಳೆಸಿ ಗರ್ಭಿಣಿ ಎಂದು ಗೊತ್ತಾಗುತ್ತಿದ್ದಂತೆ ಕೊಲೆ ಮಾಡಿದ ಘಟನೆ ಕಲಬುರಗಿಯಲ್ಲಿ ನಡೆದಿದೆ.

ರಾಜು ಪೂಜಾರಿ ಕೊಲೆ ಮಾಡಿದ ವ್ಯಕ್ತಿ. ರಾಜು ಪೂಜಾರಿ ಕಲಬುರಗಿಯ ರಾಜಾಪುರದ ನಿವಾಸಿಯಾಗಿದ್ದು, ಕಾಲೇಜು ಯುವತಿಯ ಹಿಂದೆ ಬಿದ್ದು ಲವ್ ಮಾಡಿ ಗರ್ಭಿಣಿ ಮಾಡಿದ್ದನು. ಯುವತಿ ಗರ್ಭಿಣಿ ಆಗಿರುವ ವಿಚಾರ ತಿಳಿದು ಬಲವಂತವಾಗಿ ಅಬಾರ್ಷನ್ ಮಾಡಿಸುವುದಕ್ಕೆ ಮುಂದಾಗಿದ್ದನು. ಅಲ್ಲದೆ ಇದೇ ತಿಂಗಳು 4ರಂದು ಕಾಲೇಜಿಗೆ ತೆರಳಿದ್ದ ಯುವತಿಯನ್ನು ಅಲ್ಲಿಂದ ಕರೆದುಕೊಂಡು ಬಂದು ಅಬಾರ್ಷನ್ ಮಾಡಿಸಿದ್ದನು. ಬಲವಂತವಾಗಿ ಅಬಾರ್ಷನ್ ಮಾಡಿಸುವ ಸಲುವಾಗಿ ಯುವತಿಗೆ ಹೇವಿ ಡೋಸ್ ಇಂಜೆಕ್ಷನ್ ಕೊಡಿಸಿದ್ದನು.

ಹೇವಿ ಡೋಸ್ ಇಂಜೆಕ್ಷನ್ ನೀಡಿದ್ದರಿಂದ ಗರ್ಭಪಾತದ ವೇಳೆ ಯುವತಿ ಮೃತಪಟ್ಟಿದ್ದಾಳೆ. ಬಳಿಕ ರಾಜು ಪೂಜಾರಿ ಯುವತಿಯ ಶವ ಕಾರಿನಲ್ಲಿಟ್ಟುಕೊಂಡು 48 ಗಂಟೆಗಳ ಕಾಲ ಸುತ್ತಾಡಿದ್ದಾನೆ. ಆದರೆ ಅಷ್ಟರಲ್ಲೇ ಯುವತಿಯ ಶವ ಡಿ ಕಂಪೋಸ್ ಆಗಿ ವಾಸನೆ ಬರುವುದಕ್ಕೆ ಆರಂಭವಾಗಿತ್ತು. ಶವದ ವಾಸನೆ ಬರುವುದಕ್ಕೆ ಶುರುವಾದಾಗ ರಾಜು ಕಾರಲ್ಲೇ ತೆಲಂಗಾಣದ ಕಡೆಗೆ ತೆಗೆದುಕೊಂಡು ಹೋಗಿದ್ದನು. ಬಳಿಕ ತೆಲಂಗಾಣದ ಜಹಿರಬಾದ್ ನ ಪರಗಿ ಪೊಲೀಸ್ ಠಾಣಾ ವ್ಯಾಪ್ತಿಯ ರಸ್ತೆ ಬದಿ ಗುಂಡಿ ತೋಡಿ ಪೆಟ್ರೋಲ್ ಹಾಕಿ ಯುವತಿಯನ್ನು ಸುಟ್ಟು ಹಾಕಿದ್ದಾನೆ.

ಯುವತಿ ಶಿಬಾರಾಣಿ, ಕಲಬುರಗಿ ಫೈನ್ ಆರ್ಟ್ ಕಾಲೇಜಿನಲ್ಲಿ ಎರಡನೇ ವರ್ಷದಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದಳು. ಕಾಲೇಜು ಹೋದ ಯುವತಿ ಸಂಜೆಯಾದರೂ ಮನೆಗೆ ಬಾರದೆ ಹೋದಾಗ ಪೋಷಕರು ಹುಡುಕಾಟ ಶುರು ಮಾಡಿದ್ದಾರೆ. ಎರಡು ದಿನಗಳ ಕಾಲ ಪೋಷಕರು ಹುಡುಕಾಟ ನಡೆಸಿ ಬಳಿಕ ಇದೇ ತಿಂಗಳು 6ರ ರಂದು ಬ್ರಹ್ಮಪುರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಶಿಬಾರಾಣಿ ನಾಪತ್ತೆ ಹಿಂದೆ ರಾಜು ಪೂಜಾರಿಯ ಕೈವಾಡದ ಶಂಕೆಯಿರುವ ಹಿನ್ನೆಲೆಯಲ್ಲಿ ದೂರು ದಾಖಲಿಸಿದ್ದಾರೆ.

ಸದ್ಯ ದೂರು ದಾಖಲಿಸಿಕೊಂಡ ಪೊಲೀಸರು ಆರೋಪಿ ರಾಜು ಪೂಜಾರಿಯನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದಾರೆ. ಈ ವೇಳೆ ರಾಜು ಯುವತಿಯನ್ನು ಕೊಲೆ ಮಾಡಿ ಸುಟ್ಟು ಹಾಕಿರುವುದಾಗಿ ಬಾಯಿಬಿಟ್ಟಿದ್ದಾನೆ. ಹಂತಕನ ಮಾಹಿತಿ ಮೇರೆಗೆ ಪೊಲೀಸರು ತೆಲಂಗಾಣದ ಜಹೀರಾಬಾದ್ ಗೆ ತೆರಳಿದ್ದಾರೆ. ಶಿಬಾರಾಣಿ ಕೊಲೆ ಮಾಡಿ ಸುಟ್ಟು ಹಾಕಿದ್ದ ಜಾಗದಲ್ಲಿ ಯುವತಿಯ ಸುಟ್ಟು ಕರಕಲಾದ ಶವದ ಪತ್ತೆ ಆಗಿದೆ. ಪೊಲೀಸರು ಕೊಲೆ ಆರೋಪಿಯನ್ನು ವಶಕ್ಕೆ ಪಡೆದು ವಿಚಾರಣೆ ಮುಂದುವರಿಸಿದ್ದಾರೆ.

ಈ ಕೊಲೆ ಪ್ರಕರಣದಲ್ಲಿ ಖಾಸಗಿ ಆಸ್ಪತ್ರೆಯ ವೈದ್ಯರು ಸಹಕಾರ ನೀಡಿದ ಹಿನ್ನೆಲೆಯಲ್ಲಿ ಪೊಲೀಸರು ವೈದ್ಯರನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸುತ್ತಿದ್ದಾರೆ. ಗರ್ಭಪಾತ ಮಾಡಿದ ಆರೋಪದ ಮೇಲೆ ಪೊಲೀಸರು ವೈದ್ಯರನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ.