ದಾವಣಗೆರೆ: ವಿಧವೆ ಮಹಿಳೆಯನ್ನು ಯುವಕನೊಬ್ಬ ನಂಬಿಸಿ ನಿನ್ನನ್ನು ಮದುವೆಯಾಗುತ್ತೇನೆ. ನಿನ್ನ ಮಗುವಿಗೆ ತಂದೆ ಆಗುತ್ತೇನೆ ಎಂದು ಹೇಳಿ ಮೋಸ ಮಾಡಿದ ಘಟನೆ ದಾವಣಗೆರೆಯ ಚನ್ನಗಿರಿ ತಾಲೂಕಿನ ಸಾರಥಿ ಗ್ರಾಮದಲ್ಲಿ ನಡೆದಿದೆ.
ಮಧು ವಿಧವೆ ಮಹಿಳೆಯನ್ನು ಮೋಸ ಮಾಡಿದ ಯುವಕ. ರಿಷಿಕಾ (ಹೆಸರು ಬದಲಾಯಿಸಲಾಗಿದೆ) ನಾಲ್ಕು ವರ್ಷಗಳ ಹಿಂದೆ ತನ್ನ ಗಂಡನನ್ನು ಕಳೆದುಕೊಂಡಿದ್ದು, ಮಗುವನ್ನು ನೋಡಿಕೊಳ್ಳಲು ತನ್ನ ತಾಯಿ ಮನೆಯಲ್ಲಿ ಜೀವನ ಸಾಗಿಸುತ್ತಿದ್ದರು.
ತಾಯಿ ಮನೆಯ ಪಕ್ಕದಲ್ಲಿದ್ದ ಮಧು, ರಿಷಿಕಾಗೆ ಪರಿಚಯವಾಗಿ ನಿನ್ನನ್ನು ಮದುವೆಯಾಗುತ್ತೇನೆ. ನಿನ್ನ ಮಗುವಿಗೆ ತಂದೆಯಾಗುತ್ತೇನೆ. ಇಬ್ಬರು ಒಟ್ಟಿಗೆ ಇರೋಣ ಎಂದು ರಿಷಿಕಾಗೆ ಹೇಳಿದ್ದನು. ಆದರೆ ರಿಷಿಕಾ ವಿರೋಧ ವ್ಯಕ್ತಪಡಿಸಿದ್ರೂ ಸಹ ಬಣ್ಣದ ಮಾತುಗಳಿಂದ ಆಕೆಯನ್ನು ತನ್ನ ಬಲೆಗೆ ಬೀಳಿಸಿಕೊಂಡಿದ್ದನು. ಈಗ ಮದುವೆಯಾಗು ಎಂದರೆ ನಿನ್ನ ಜಾತಿ ಬೇರೆ ನನ್ನ ಜಾತಿ ಬೇರೆ ಹೋಗು ಎಂದು ಹೇಳಿ ರಿಷಿಕಾಗೆ ಮೋಸ ಮಾಡಿದ್ದಾನೆ.
ಮಧು ವಿರುದ್ಧ ದೂರು ನೀಡಿದ್ದರೂ ಪೊಲೀಸರು ರಿಷಿಕಾ ದೂರನ್ನು ಪರಿಗಣಿಸದೇ ನಿರ್ಲಕ್ಷ ವಹಿಸುತ್ತಿದ್ದಾರೆ. ಪೊಲೀಸ್ ಠಾಣೆಗೆ ಅಷ್ಟೇ ಅಲ್ಲ ರಾಜ್ಯ ಮಹಿಳಾ ಆಯೋಗಕ್ಕೂ ದೂರು ನೀಡಿದ್ದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ರಿಷಿಕಾ ತಿಳಿಸಿದ್ದಾರೆ.
ರಿಷಿಕಾ ಬೆಂಬಲಕ್ಕೆ ಯಾರಾದರೂ ಬಂದರೆ ಅವರ ಜೊತೆ ಅನೈತಿಕ ಸಂಬಂಧದ ಕಥೆಯನ್ನು ಕಟ್ಟಿ ಆಕೆಯನ್ನು ಮನೆಯಿಂದ ಹೊರ ಬಾರದ ರೀತಿ ಚಿತ್ರಹಿಂಸೆಯನ್ನು ಮಧು ಸಂಬಂಧಿಕರು ನೀಡುತ್ತಿದ್ದರು. ಇದರಿಂದ ತನಗಾದ ಆನ್ಯಾಯಕ್ಕೆ ನ್ಯಾಯ ನೀಡಬೇಕು ಎಂದು ಪಬ್ಲಿಕ್ ಟಿವಿಯ ಬಳಿ ನೊಂದ ಮಹಿಳೆ ರಿಷಿಕಾ ತನ್ನ ನೋವನ್ನು ಹೇಳಿಕೊಂಡಿದ್ದಾರೆ.
