ಅವನಿಲ್ಲದಾಗ ಕಾಲ್ ಮಾಡು ನಾನು ನಿನ್ನ ಮನೆಗೆ ಬರುತ್ತೇನೆ – ಕಾಮುಕನಿಂದ ಗೃಹಿಣಿಗೆ ಕಾಟ

ಬೆಂಗಳೂರು: ಮದುವೆಯಾಗಿರುವ ಗೃಹಿಣಿಗೆ ಪ್ರೀತ್ಸೆ ಪ್ರೀತ್ಸೆ ಅಂತ ಕಾಟ ಕೊಡುತ್ತಿದ್ದ ವಿಚಿತ್ರ ಸೈಕೋ ಕಾಮುಕನೊಬ್ಬನನ್ನು ಪೊಲೀಸರು ಬಂಧಿಸಿದ್ದಾರೆ.

ಚನ್ನಮ್ಮನ ಕೆರೆ ಅಚ್ಚುಕಟ್ಟು ಠಾಣೆ ವ್ಯಾಪ್ತಿಯಲ್ಲಿ ಈ ಘಟನೆ ನಡೆದಿದೆ. ಮಂಜುನಾಥ ಕಾಲೋನಿಯ ಪ್ರಕಾಶ್ ಅಲಿಯಾಸ್ ಲಕ್ಕಿ, ಮಹಿಳೆಗೆ ಲೈಂಗಿಕ ಕಿರುಕುಳ ನೀಡುತ್ತಿದ್ದನು. ಸದ್ಯಕ್ಕೆ ಚನ್ನಮ್ಮನಕೆರೆ ಅಚ್ಚುಕಟ್ಟು ಪೊಲೀಸರು ಸೈಕೋ ಕಾಮುಕನನ್ನು ಬಂಧಿಸಿದ್ದಾರೆ.

ಏನಿದು ಪ್ರಕರಣ?
ಆರೋಪಿ ಲಕ್ಕಿ ಮದುವೆಯಾಗಿರುವ ಗೃಹಿಣಿಗೆ ತನ್ನನ್ನು ಪ್ರೀತಿಸುವಂತೆ ಕಾಟ ಕೊಡುತ್ತಿದ್ದನು. ಮಹಿಳೆ ರಸ್ತೆಯಲ್ಲಿ ಓಡಾಡಬೇಕಾದರೆ ಬಲವಂತವಾಗಿ ಹಿಂದೆ ಬಿದ್ದು ಮಾತನಾಡುತ್ತಿದ್ದನು. ಹೇ, ಹಾಯ್ ಇಲ್ನೋಡು ಅಂತ ಸ್ಮೈಲ್ ಮಾಡಿ ಸನ್ನೆ ಮಾಡುತ್ತಿದ್ದನು. ಮಹಿಳೆಗೆ ಮದುವೆಯಾಗಿ ನಾಲ್ಕು ವರ್ಷದ ಮಗುವಿದೆ ಅಂತ ಗೊತ್ತಿದ್ದರೂ ಕಾಮುಕ ಹಿಂದೆ ಬಿದ್ದು ಪೀಡಿಸುತ್ತಿದ್ದನು. ಸತತ ಐದು ತಿಂಗಳಿನಿಂದ ಮಹಿಳೆಗೆ ನಿರಂತರವಾಗಿ ಹೀಗೆ ಕಾಟ ಕೊಡುತ್ತಿದ್ದನು.

ಮಹಿಳೆಯ ಪತಿ ಜನಾರ್ದನ್ ಓಲಾ ಡ್ರೈವರ್ ಆಗಿ ಕೆಲಸ ಮಾಡುತ್ತಿದ್ದರು. ಬೆಳಗ್ಗೆ 10 ಗಂಟೆಗೆ ಕೆಲಸಕ್ಕೆ ಹೋದರೆ ರಾತ್ರಿ 10ಕ್ಕೆ ಮನೆಗೆ ವಾಪಸ್ ಬರುತ್ತಿದ್ದರು. ಇದನ್ನೇ ಸದುಪಯೋಗ ಪಡಿಸಿಕೊಂಡ ಸೈಕೋ, ಮನೆ ಮುಂದೆ ಬಂದು ನಿಲ್ಲುತ್ತಿದ್ದನು. ಅಷ್ಟೇ ಅಲ್ಲದೇ ನಿನ್ನ ಗಂಡ ಮನೆಯಲ್ಲಿ ಇರುವುದಿಲ್ಲ. ನನ್ನ ನಂಬರ್ ತಗೋ, ಅವನಿಲ್ಲದ ವೇಳೆ ನನಗೆ ಕಾಲ್ ಮಾಡು ನಾನು ನಿನ್ನ ಮನೆಗೆ ಬರುತ್ತೇನೆ ಎಂದು ಕಾಟ ಕೊಡುತ್ತಿದ್ದನು.

ಕಾಮುಕನ ಕಾಟದಿಂದ ನೊಂದು ಮಹಿಳೆ ಪತಿಗೆ ವಿಷಯ ತಿಳಿಸಿದ್ದಾರೆ. ಜನಾರ್ದನ್ ಕಳೆದ ಎರಡು ತಿಂಗಳ ಹಿಂದೆಯೇ ಲಕ್ಕಿಯನ್ನು ಕರೆಸಿ ವಾರ್ನ್ ಮಾಡಿದ್ದನು. ಆದರೆ ಆರೋಪಿ ಎಚ್ಚರಿಕೆ ನೀಡಿದ್ರೂ ಸುಮ್ಮನಾಗಲಿಲ್ಲ. ಕಳೆದ ಡಿಸೆಂಬರ್ 11 ರಂದು ಮಹಿಳೆ ಮನೆಮುಂದಿನ ರಸ್ತೆಯಲ್ಲಿ ತೆರಳುವಾಗ ಕೈ ಹಿಡಿದು ಎಳೆದಾಡಿದ್ದಾನೆ.

ಕೊನೆಗೆ ಯುವಕನ ಕಾಟಕ್ಕೆ ಬೇಸತ್ತ ಮಹಿಳೆ ಡಿ.12 ರಂದು ಜಿರಳೆ ಪೌಡರ್ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದರು. ಸದ್ಯಕ್ಕೆ ಮಹಿಳೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದಾರೆ. ನೊಂದ ಮಹಿಳೆ ಹಾಗೂ ಆತನ ಪತಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲು ಮಾಡಿದ್ದರು. ಈ ಸಂಬಂಧ ದೂರು ದಾಖಲಿಸಿಕೊಂಡಿದ್ದ ಪೊಲೀಸರು ಆರೋಪಿಯನ್ನ ಬಂಧಿಸಿದ್ದಾರೆ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್‍ಲೋಡ್ ಮಾಡಿ: play.google.com/publictv