ಬೆಂಗಳೂರು: ನನ್ನ ಒಂದು ವಯಸ್ಸಿನಲ್ಲಿ ಅಪ್ಪ-ಅಮ್ಮನಿಗೆ ತುಂಬಾ ಕಷ್ಟ ಕೊಟ್ಟಿದ್ದೀನಿ. ಅವರು ಸ್ವಲ್ಪ ತಲೆ ತಗ್ಗಿಸುವಂತಹ ಕೆಲಸಗಳನ್ನೂ ಮಾಡಿದ್ದೇನೆ. ಇಷ್ಟೆಲ್ಲಾ ಮಾಡಿದ ಮೇಲೂ ತಂದೆ-ತಾಯಿ ಆ ಕ್ಷಮಿಸುವ ಗುಣ ಇದೆಯಲ್ವಾ ಅದು ದೇವರಿಗೆ ಸಮಾನ ಅಂತ ರಾಕಿಂಗ್ ಸ್ಟಾರ್ ಯಶ್ ಹೇಳಿದ್ದರು.
ಈ ಹಿಂದೆ ಖಾಸಗಿ ಚಾನೆಲೊಂದರಲ್ಲಿ ಅತಿಥಿಯಾಗಿ ಆಗಮಿಸಿ ಮಾತನಾಡಿದ ಅವರು, ನಾನು ಎಷ್ಟೇ ತೊಂದರೆ ಕೊಟ್ಟರೂ ನನ್ನನ್ನ ಮಗನಾಗಿ ಓದಿಸಿ ಒಳ್ಳೆಯ ದಾರಿಗೆ ತಂದಿದ್ದಾರೆ. ಇವತ್ತು ನನ್ನ ಈ ಯಶಸ್ಸಿಗೆ ಅವರೇ ಕಾರಣರಾಗಿದ್ದಾರೆ. ಹೀಗಾಗಿ ಮೊದಲು ಅಪ್ಪ-ಅಮ್ಮನಲ್ಲಿ ಸಾರಿ ಕೇಳಲು ಇಷ್ಟ ಪಡುತ್ತೇನೆ ಅಂದ್ರು.
ಒಂದು ಪುಟ್ಟ ಊರಲ್ಲಿ ಒಂದು ಸಣ್ಣ ಜಗಲಿ ಮೇಲೆ ಕನಸು ಕಾಣುತ್ತಿದ್ದ ಹುಡುಗನ ಎಲ್ಲಾ ಕನಸು ನನಸು ಮಾಡಿದ್ದೀರಿ. ಜಾತಿ-ಮತ-ಅಂತಸ್ತು ಇದ್ಯಾವುದನ್ನು ನೋಡದೆ ಬರೀ ಪ್ರತಿಭೆ ನೋಡಿ ಬೆನ್ನು ತಟ್ಟುವ ಮೂಲಕ ಇಂದು ನನ್ನ ಈ ಮಟ್ಟಕ್ಕೆ ಬೆಳೆಸಿದ್ದೀರಿ. ಹೀಗಾಗಿ ನಿಮಗೆ ನಾನು ಎಷ್ಟು ಧನ್ಯವಾದಗಳನ್ನು ತಿಳಿಸಿದ್ರೂ ಸಾಲದು. ಆದ್ದರಿಂದ ನೀವೆಲ್ಲರೂ ಪ್ರತಿ ಹಂತದಲ್ಲೂ ನನ್ನ ಹೃದಯದಲ್ಲಿರುತ್ತೀರಿ. ನಿಮ್ಮ ಬಗ್ಗೆ ನನಗೆ ಗೌರವ ಇದ್ದೇ ಇರುತ್ತದೆ. ಇಂದು ನಾನು ಏನೇ ಆಗಿದ್ರೂ ನನ್ನ ತಂದೆ-ತಾಯಿಯಷ್ಟೇ ನೀವೂ ಕೂಡ ಕಾರಣರಾಗಿದ್ದೀರಿ. ಇದೇ ರೀತಿ ನಿಮ್ಮ ಆಶೀರ್ವಾದ ನನ್ನ ಮೇಲಿರಲಿ ಅಂತ ಅಭಿಮಾನಿಗಳಿಗೆ ಯಶ್ ಹೇಳಿದ್ದರು.
ನಾನು ಯಾವತ್ತೂ ಜನಗಳಿಗೆ ನಮ್ಮ ಕಷ್ಟಗಳನ್ನು ಹೇಳಲ್ಲ. ಯಾಕಂದ್ರೆ ಹೇಳಿಕೊಂಡರೆ ಇವನೇನೋ ಸಿಂಪತಿಗೋಸ್ಕರ ಹೇಳಿಕೊಳ್ಳುತ್ತಾನೆ ಅಂತ ಅಂದುಕೊಳ್ಳುತ್ತಾರೆ. ಇಂದು ಈ ಹಂತಕ್ಕೆ ಬಂದ ಮೇಲೆ ತುಂಬಾ ಜನ ಹೇಳುತ್ತಾರೆ ಯಶ್ ಸಡನ್ ಗ್ರೋತ್ (ಚಿತ್ರರಂಗದಲ್ಲಿ ತುಂಬಾ ಬೇಗನೆ ಬೆಳೆದುಬಿಟ್ಟ) ಅಂತೆಲ್ಲ ಹೇಳುತ್ತಾರೆ. ಆದ್ರೆ ನಾನು ಕಷ್ಟಪಟ್ಟಿರುವುದು ಕೂಡ ಇಂದು ಈ ನನ್ನ ಯಶಸ್ಸಿಗೆ ಕಾರಣ ಅಂತ ಅವರು ತಿಳಿಸಿದ್ದರು. ಇದನ್ನೂ ಓದಿ: ಕೊಟ್ಟ ಮಾತಿನಂತೆ ಛಲ ಬಿಡದೆ ಗುರಿ ಸೇರಿದ್ರು ಯಶ್
ತನ್ನ ಮಾತಿನಂತೆ ಛಲಬಿಡದೇ ಯಶ್ ಇಂದು ಯಶಸ್ಸಿನ ಗುರಿ ಸೇರಿಯೇ ಬಿಟ್ಟಿದ್ದಾರೆ. ತನ್ನ ಅಭಿನಯದ ಕೆಜಿಎಫ್ ಚಿತ್ರ ದೇಶ-ವಿದೇಶಗಲ್ಲೂ ಇಂದು ಭಾರೀ ಸದ್ದು ಮಾಡುತ್ತಿದೆ.
ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv, ಪಬ್ಲಿಕ್ ಟಿವಿ ಆ್ಯಪ್ ಡೌನ್‍ಲೋಡ್ ಮಾಡಿ: play.google.com/publictv
