ವಿಶ್ವಕಪ್ 2019: ಮಳೆಯಲ್ಲಿ ಕೊಚ್ಚಿ ಹೋದ ಇಂಡೋ-ಕಿವೀಸ್ ಪಂದ್ಯ

– ಐಸಿಸಿ ವಿರುದ್ಧ ಅಭಿಮಾನಿಗಳ ಬೇಸರ

ಲಂಡನ್: 2019ರ ವಿಶ್ವಕಪ್ ಕ್ರಿಕೆಟ್ ಟೂರ್ನಿಯಲ್ಲಿ ವರುಣನ ಆಟ ಹೆಚ್ಚಾಗಿದ್ದು, ನ್ಯೂಜಿಲೆಂಡ್ ಹಾಗೂ ಟೀಂ ಇಂಡಿಯಾ ನಡುವಿನ ಪಂದ್ಯವೂ ಕೂಡ ಮಳೆಗೆ ಆಹುತಿಯಾಗಿದೆ.

ಟೂರ್ನಿಯಲ್ಲಿ ಇದುವರೆಗೂ 4 ಪಂದ್ಯಗಳು ಮಳೆಯಿಂದ ರದ್ದಾಗಿದ್ದು, ಇಂಗ್ಲೆಂಡ್ ನಲ್ಲಿ ಮಳೆಗಾಲ ಇದ್ದರೂ ಕೂಡ ಟೂರ್ನಿ ಆಯೋಜಿಸಲು ಅವಕಾಶ ನೀಡಿದಕ್ಕೆ ಅಭಿಮಾನಿಗಳು ಆಕ್ರೋಶ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ನ್ಯೂಜಿಲೆಂಡ್ ವಿರುದ್ಧದ ಪಂದ್ಯಕ್ಕೂ ಮುನ್ನ ದಿನ ಆಟಗಾರರು ಅಭ್ಯಾಸ ನಡೆಸಲು ಕೂಡ ಮಳೆ ಹೆಚ್ಚಿನ ಅವಕಾಶ ನೀಡಿರಲಿಲ್ಲ. ಪರಿಣಾಮ ಆಟಗಾರರು ನಿಗದಿತ ಅವಧಿಗೂ ಮುನ್ನವೇ ಅಭ್ಯಾಸದಿಂದ ತೆರಳಿದ್ದರು. ಇಂದು ಕೂಡ ನಿರಂತರವಾಗಿ ಸುರಿದ ಮಳೆ ಪಂದ್ಯದ ಟಾಸ್ ನಡೆಯಲು ಅವಕಾಶ ನೀಡಿರಲಿಲ್ಲ. ಅಂಪೈರ್ ಗಳು ಪಂದ್ಯವನ್ನು ರದ್ದುಗೊಳಿಸಿದ್ದು, ಪರಿಣಾಮ ಇತ್ತಂಡಗಳು ತಲಾ 1 ಅಂಕವನ್ನು ಹಂಚಿಕೊಂಡಿದೆ. 3 ಪಂದ್ಯಗಳಿಂದ 5 ಅಂಕಗಳನ್ನು ಗಳಿಸಿರುವ ಭಾರತ ಅಂಕಪಟ್ಟಿಯಲ್ಲಿ 3ನೇ ಸ್ಥಾನ ಪಡೆದಿದೆ. ಇತ್ತ 4 ಪಂದ್ಯಗಳಿಂದ 7 ಅಂಕಗಳನ್ನು ಪಡೆದಿರುವ ನ್ಯೂಜಿಲೆಂಡ್ ನಂ.1 ಸ್ಥಾನದಲ್ಲಿ ಮುಂದುವರಿದಿದೆ.

India and New Zealand take home a point apiece.

The @BLACKCAPS continue to sit atop the #CWC19 standings table, and #ViratKohli and Co. move up one slot to No.3. pic.twitter.com/iTF4tHPqrQ

— ICC Cricket World Cup (@cricketworldcup) June 13, 2019

ಭಾರತ ಹಾಗೂ ನ್ಯೂಜಿಲೆಂಡ್ ಇತ್ತಂಡಗಳು ಕೂಡ ಬಲಿಷ್ಠವಾಗಿದ್ದು, ಇಂದು ಯಾವ ತಂಡ ಗೆಲ್ಲಲಿದೆ ಎಂಬುವುದರ ಮೇಲೆ ಭಾರೀ ನಿರೀಕ್ಷೆ ಇತ್ತು. ಆದರೆ ಪಂದ್ಯ ರದ್ದಾಗಿರುವುದರಿಂದ ಅಭಿಮಾನಿಗಳು ಸಾಕಷ್ಟು ನಿರಾಸೆ ಅನುಭವಿಸಿದ್ದಾರೆ. ಅಲ್ಲದೇ ಹಲವರು ಐಸಿಸಿ ವಿಶ್ವಕಪ್ ಟೂರ್ನಿಯ ಬಗ್ಗೆ ಮಿಮ್ಸ್ ಹಂಚಿಕೊಂಡಿದ್ದಾರೆ. ಈಗಾಗಲೇ ವಿಶ್ವಕಪ್ ಟೂರ್ನಿಯ ಲೋಗೋಗೆ ಕೊಡೆ ಹಿಡಿದಿರುವ ಫೋಟೋ ಸಾಕಷ್ಟು ವೈರಲ್ ಆಗಿದ್ದು, ಸದ್ಯ ನೀರಿನಲ್ಲೇ ಕ್ರಿಕೆಟ್ ಆಡುತ್ತಿರುವ ಯುವಕರ ಫೋಟೋವನ್ನು ಟ್ವೀಟ್ ಮಾಡಿ ನೆಟ್ಟಿಗರು ಐಸಿಸಿ ಕಾಲೆಳೆದಿದ್ದಾರೆ.

.@JadhavKedar asking Rain to shift to Maharashtra!🤣💛

Video Courtesy : @SakalMediaNews @ChennaiIPL #Teamindia #INDvNZ pic.twitter.com/H3UVID3QGc

— WhistlePodu Army ® – CSK Fan Club (@CSKFansOfficial) June 13, 2019

ಚೆನ್ನೈನ ಕ್ರೀಡಾಂಗಣ ಖಾಲಿ ಇದ್ದು, ಟೂರ್ನಿಯ ಎಲ್ಲಾ ಪಂದ್ಯಗಳನ್ನು ಇಲ್ಲಿಗೆ ಬದಲಾಯಿಸಿ ಎಂದು ಅಭಿಮಾನಿಯೊಬ್ಬರು ಐಸಿಸಿಗೆ ಮನವಿ ಮಾಡಿದ್ದಾರೆ. ಧೋನಿ ಧರಿಸುವ ಗ್ಲೌಸ್ ಬಗ್ಗೆ ಐಸಿಸಿಗೆ ಹೆಚ್ಚು ಆಸಕ್ತಿ ಇದ್ದು, ಆದರೆ ಟೂರ್ನಿಯನ್ನು ಆಯೋಜಿಸುವುದರಲ್ಲಿ ಎಡವಿದೆ ಎಂದು ಮತ್ತೊಬ್ಬರು ಬರೆದುಕೊಂಡಿದ್ದಾರೆ. ಈ ಸಂದರ್ಭದಲ್ಲಿ ಐಸಿಸಿ ವಿರುದ್ಧ ಟ್ರೋಲ್ ಗಳ ಸಂಖ್ಯೆ ಹೆಚ್ಚಿದೆ.