ಕೋಲ್ಕತ್ತಾದಲ್ಲಿ 150 ವರ್ಷಗಳಷ್ಟು ಹಳೆಯದಾದ ಟ್ರಾಮ್ ಸೇವೆಯನ್ನು (Tram Service) ರಾಜ್ಯ ಸರ್ಕಾರ ಸ್ಥಗಿತಗೊಳಿಸಲು ನಿರ್ಧರಿಸಿರುವುದರಿಂದ ಶೀಘ್ರದಲ್ಲೇ ಈ ಸೇವೆ ಕೊನೆಗೊಳ್ಳಲಿದೆ ಎಂದು ಸಾರಿಗೆ ಸಚಿವ ಸ್ನೇಹಸಿಸ್ ಚಕ್ರವರ್ತಿ ಹೇಳಿದ್ದಾರೆ. ಭಾರತದಲ್ಲಿ ಕೊಲ್ಕತ್ತಾ (Kolkata) ಟ್ರಾಮ್‌ಗಳನ್ನು ನಿರ್ವಹಿಸುವ ಏಕೈಕ ನಗರವಾಗಿತ್ತು. ಇದೀಗ ಕೋಲ್ಕತ್ತಾ ಸರ್ಕಾರ ಟ್ರಾಮ್ ಸೇವೆಯನ್ನು ಸ್ಥಗಿತಗೊಳಿಸುವ ಕುರಿತು ಚಿಂತನೆ ನಡೆಸಿದೆ. ಇದಕ್ಕೆ ನಗರದ ಟ್ರಾಮ್ ಪ್ರೇಮಿಗಳು ವಿರೋಧ ವ್ಯಕ್ತಪಡಿಸಿದ್ದಾರೆ. ಹಾಗಾದ್ರೆ ಕೋಲ್ಕತ್ತಾದಲ್ಲಿ ಟ್ರಾಮ್ ಸೇವೆ ಯಾವಾಗಿಂದ ಚಾಲ್ತಿಯಲ್ಲಿತ್ತು? ಈ ಸೇವೆಯನ್ನು ಸ್ಥಗಿತಗೊಳಿಸುವ ನಿರ್ಧಾರ ತೆಗೆದುಕೊಂಡಿದ್ದೇಕೆ? ಟ್ರಾಮ್ ರೈಲಿನ ಇತಿಹಾಸವೇನು ಎಂಬುದರ ಕುರಿತು ಇಲ್ಲಿ ವಿವರಿಸಲಾಗಿದೆ.
ಟ್ರಾಮ್ ಸೇವೆ ಸ್ಥಗಿತ ಯಾಕೆ?
ಮೈದಾನ್‌ನಿಂದ ಎಸ್ಪ್ಲೇನೇಡ್ ವರೆಗಿನ ಒಂದು ಸಣ್ಣ ಮಾರ್ಗವನ್ನು ಹೊರತುಪಡಿಸಿ, ಇತರ ಎಲ್ಲಾ ಕಡೆ ಟ್ರಾಮ್ ಸೇವೆ ಸ್ಥಗಿತಗೊಳಿಸಲಾಗುವುದು ಎಂದು ಪಶ್ಚಿಮ ಬಂಗಾಳ ಸಾರಿಗೆ ಸಚಿವ ಸ್ನೇಹಸಿಸ್ ಚಕ್ರವರ್ತಿ ಅವರು ತಿಳಿಸಿದ್ದಾರೆ.
Advertisement
Advertisement
ಪಶ್ಚಿಮ ಬಂಗಾಳ ಸರ್ಕಾರದ ಈ ನಿರ್ಧಾರವನ್ನು ವಿರೋಧಿಸಿ ಟ್ರಾಮ್ ಪ್ರೇಮಿಗಳು ಬೀದಿಗಿಳಿದು ಪ್ರತಿಭಟಿಸಲು ನಿರ್ಧರಿಸಿದ್ದಾರೆ. ಟ್ರಾಮ್‌ಗಳು ಕಾರ್ಯನಿರ್ವಹಿಸುತ್ತಿರುವ ದೇಶದ ಏಕೈಕ ನಗರ ಕೋಲ್ಕತ್ತಾ ಆಗಿದೆ. ಆದರೆ ನಿಧಾನವಾಗಿ ಚಲಿಸುವ ಟ್ರಾಮ್‌ಗಳು, ಪೀಕ್ ಅವರ್‌ಗಳಲ್ಲಿ ರಸ್ತೆಗಳ ಉದ್ದಕ್ಕೂ ಟ್ರಾಫಿಕ್ ಜಾಮ್‌ ಗೆ ಕಾರಣವಾಗುತ್ತಿದೆ. ಪ್ರಸ್ತುತ ಪರಿಸ್ಥಿತಿಯಲ್ಲಿ ಪ್ರಯಾಣಿಕರಿಗೆ ವೇಗದ ಸಾರಿಗೆ ವಿಧಾನಗಳ ಅಗತ್ಯವಿರುವುದರಿಂದ ಟ್ರಾಮ್ ಸೇವೆ ಮುಂದುವರೆಸಲು ಸಾಧ್ಯವಿಲ್ಲ ಎಂದು ಚಕ್ರವರ್ತಿ ಹೇಳಿದ್ದಾರೆ.
Advertisement
ಟ್ರಾಮ್ ನಿಸ್ಸಂದೇಹವಾಗಿಯೂ ಕೋಲ್ಕತ್ತಾದ ಪರಂಪರೆಯ ಭಾಗವಾಗಿದೆ ಮತ್ತು ಹಿಂದಿನ ಶತಮಾನದಲ್ಲಿ ಸಾರಿಗೆಯಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸಿದೆ. ಆದರೆ ಈಗ ವಾಹನ ದಟ್ಟಣೆ ಹೆಚ್ಚಾಗಿರುವುದರಿಂದ ಟ್ರಾಮ್‌ಗಳೂ ಅದೇ ಮಾರ್ಗದಲ್ಲಿ ಅದೇ ಸಮಯದಲ್ಲಿ ರಸ್ತೆಗಳಲ್ಲಿ ಸಂಚರಿಸಲು ಸಾಧ್ಯವಿಲ್ಲ ಎಂದು ನಾವು ಗಮನಿಸಿದ್ದೇವೆ. ಇದು ವಾಹನ ದಟ್ಟಣೆಗೆ ಕಾರಣವಾಗುತ್ತಿದೆ ಎಂದು ಸಾರಿಗೆ ಸಚಿವರು ತಿಳಿಸಿದ್ದಾರೆ.
Advertisement
ಪೀಕ್ ಅವರ್‌ಗಳಲ್ಲಿ ಟ್ರಾಫಿಕ್ ಜಾಮ್‌ಗಳಿಂದ ಜನ ಕಚೇರಿಗೆ ತಡವಾಗಿ ತೆರಳದಂತೆ ಖಚಿತಪಡಿಸಿಕೊಳ್ಳಲು, ನಾವು ಟ್ರಾಮ್ ಸೇವೆ ಹಿಂಪಡೆಯುವುದು ಸೇರಿದಂತೆ ಕೆಲವು ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳಬೇಕಾಗಿದೆ ಎಂದು ಚಕ್ರವರ್ತಿ ಸುದ್ದಿ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಟ್ರಾಮ್ ರೈಲಿನ ಇತಿಹಾಸ:
ಕೋಲ್ಕತ್ತಾದಲ್ಲಿ ಮೊದಲು ಟ್ರಾಮ್‌ಗಳನ್ನು ಕುದುರೆಗೆ ಕಟ್ಟಿ ಎಳೆಯಲಾಗುತ್ತಿತ್ತು. ಇದನ್ನು 1873ರಲ್ಲಿ ಕುದುರೆ ಗಾಡಿಗಳಾಗಿ ಪರಿಚಯಿಸಲಾಯಿತು. ಕುದುರೆ ಎಳೆಯುವ ಟ್ರಾಮ್‌ಗಳನ್ನು ಇಂಗ್ಲೆಂಡ್‌ನಿಂದ ಆಮದು ಮಾಡಿಕೊಳ್ಳಲಾಯಿತು. 1905 ರಲ್ಲಿ ಬಂಗಾಳದ ವಿಭಜನೆಗೆ (ಆಗ ಅವಿಭಜಿತ) ಹೆಸರುವಾಸಿಯಾದ ಲಾರ್ಡ್ ಕರ್ಜನ್, 1902 ರಲ್ಲಿ ಕೋಲ್ಕತ್ತಾದ ಎಲೆಕ್ಟ್ರಿಕ್ ಟ್ರಾಮ್ ಸೇವೆಯನ್ನು ಪ್ರಾರಂಭಿಸಿದರು.
1920 ರವರೆಗೆ ಎಲೆಕ್ಟ್ರಿಕ್ ಟ್ರಾಮ್‌ಲೈನ್ ಕೋಲ್ಕತ್ತಾದ ಸಾರಿಗೆ ಜೀವನಾಡಿಯಾಗಿತ್ತು. ಬೀದಿಗಳಲ್ಲಿ ಸಾರ್ವಜನಿಕ ಬಸ್ ಅನ್ನು ಪರಿಚಯಿಸಿದ ನಂತರವೂ, ಟ್ರಾಮ್ ಅತ್ಯಂತ ವಿಶ್ವಾಸಾರ್ಹ ಸಾರ್ವಜನಿಕ ಸಾರಿಗೆಯಾಗಿತ್ತು. ಆ ಸಮಯದಲ್ಲಿ ಹೆಚ್ಚಿನ ಟ್ರ್ಯಾಮ್‌ಲೈನ್‌ಗಳನ್ನು ಹಾಕಲಾಯಿತು ಮತ್ತು ವಿಸ್ತರಿಸಲಾಯಿತು. ಕೊಲ್ಕತ್ತಾದ ಟ್ರಾಮ್ ಸೇವೆಯು ಸ್ವಾತಂತ್ರ್ಯ ಪೂರ್ವದಲ್ಲಿ 1960 ರ ದಶಕದವರೆಗೆ ಸುಗಮವಾಗಿತ್ತು. 1950 ರವರೆಗೆ ಕೋಲ್ಕತ್ತಾ ಮತ್ತು ಹೌರಾ ನಡುವೆ ಸುಮಾರು 300 ಟ್ರಾಮ್‌ಗಳು ಓಡುತ್ತಿದ್ದವು.
ಟ್ರಾಮ್ ರೈಲು ಇಂದು ಕೋಲ್ಕತ್ತಾದ ವಿಶಿಷ್ಟ ಐಕಾನ್‌ಗಳಲ್ಲಿ ಒಂದೆಂದು ಗುರುತಿಸಲಾಗಿದ್ದರೂ , ವಸಾಹತುಶಾಹಿ ಕಾಲದ ಕ್ರಾಂತಿಕಾರಿಗಳಿಂದ ಇದನ್ನು ಬ್ರಿಟಿಷ್ ಆಮದು ಎಂದು ಕಡೆಗಣಿಸಲಾಯಿತು. ಬಂಗಾಳದಲ್ಲಿ ಬ್ರಿಟಿಷ್ ಆಳ್ವಿಕೆಯ ವಿರುದ್ಧ ಪ್ರತಿಭಟನೆಯ ಸಂಕೇತವಾಗಿ ಅನೇಕ ಟ್ರಾಮ್ ಕಾರುಗಳನ್ನು ಸುಟ್ಟು ಹಾಕಲಾಯಿತು. ಸ್ವಾತಂತ್ರ್ಯ ಪೂರ್ವದಲ್ಲಿ ನಗರದಲ್ಲಿ ನಡೆದ ಹಿಂದೂ-ಮುಸ್ಲಿಂ ಗಲಭೆಗಳ ಸ್ಥಳಗಳಿಗೆ ತ್ವರಿತ ರವಾನೆಗಾಗಿ ಅಂದಿನ ಕಲ್ಕತ್ತಾ ಪೊಲೀಸರು ಟ್ರಾಮ್ ಸೇವೆಯನ್ನು ಬಳಸುತ್ತಿದ್ದರು.
ಕೋಲ್ಕತ್ತಾ ಟ್ರಾಮ್‌ನ ಪ್ರಾಬಲ್ಯವು 1950 ರ ದಶಕದ ಮಧ್ಯಭಾಗದಲ್ಲಿ ಕ್ಷೀಣಿಸಲು ಪ್ರಾರಂಭಿಸಿತು. ಕಾನ್ಪುರ್ 1933 ರಲ್ಲಿ ಟ್ರಾಮ್ ಸೇವೆಯನ್ನು ಮುಚ್ಚಿದ ಮೊದಲ ಭಾರತೀಯ ನಗರವಾಗಿದೆ. ಚೆನ್ನೈ (ಆಗ ಮದ್ರಾಸ್), ದೆಹಲಿ ಮತ್ತು ಮುಂಬೈ (ಆಗ ಬಾಂಬೆ) ಕ್ರಮವಾಗಿ 1955, 1962 ಮತ್ತು 1964 ರಲ್ಲಿ ಟ್ರಾಮ್ ಸೇವೆಗೆ ವಿದಾಯ ಹೇಳಿತು.
ಹೌರಾ ಸೇತುವೆ, ನಗರಗಳ ನಡುವಿನ ಪ್ರಾಥಮಿಕ ಸಂಪರ್ಕ – ಕೋಲ್ಕತ್ತಾ ಮತ್ತು ಹೌರಾ – ಹೂಗ್ಲಿ ನದಿಯ ಮೇಲೆ (ಗಂಗಾನದ ಇನ್ನೊಂದು ಹೆಸರು), ಟ್ರ್ಯಾಮ್‌ಲೈನ್‌ಗಳನ್ನು ಹೊಂದಿತ್ತು. 22 ವರ್ಷಗಳ ಹಿಂದೆ, 1993 ರಲ್ಲಿ ಹೌರಾ ಸೇತುವೆಯ ಮೇಲೆ ಬಸ್ಸುಗಳು, ಕಾರುಗಳು ಮತ್ತು ಟ್ರಕ್‌ಗಳಿಗೆ ರಸ್ತೆಯನ್ನು ಸುಗಮಗೊಳಿಸಲು ಟ್ರಾಮ್ ಟ್ರ್ಯಾಕ್‌ಗಳನ್ನು ತೆಗೆದುಹಾಕಲಾಯಿತು. ಪ್ರಸ್ತುತ 125 ಟ್ರಾಮ್‌ಗಳು ದೈನಂದಿನ ಸೇವೆಗಾಗಿ ಕಾರ್ಯನಿರ್ವಹಿಸುತ್ತಿವೆ. ʼಡಿಟೆಕ್ಟಿವ್ ಬ್ಯೋಮಕೇಶ್ ಬಕ್ಷಿʼ ಚಿತ್ರವು 2015 ರಲ್ಲಿ ಕೋಲ್ಕತ್ತಾ ಟ್ರಾಮ್‌ನ ಖ್ಯಾತಿಯನ್ನು ಇನ್ನಷ್ಟು ಹೆಚ್ಚಿಸಿತು.
