ಮದುವೆ ವಿಡಿಯೋ ಮಾರಿಕೊಂಡಿಲ್ಲ : ವರುಣ್ ತೇಜ್ ಸ್ಪಷ್ಟನೆ

ಮೆಗಾ ಫ್ಯಾಮಿಲಿಯ ಮದುವೆ ವಿಡಿಯೋವನ್ನು (Video) ಬರೋಬ್ಬರಿ 8 ಕೋಟಿ ರೂಪಾಯಿಗೆ ಒಟಿಟಿಗೆ ಮಾರಾಲಾಗಿದೆ ಎನ್ನುವ ಸುದ್ದಿ ಬುಸುಗುಟ್ಟಿತ್ತು. ವರುಣ್ ತೇಜ್ ಮತ್ತು ಲಾವಣ್ಯ ಮದುವೆ ವಿಡಿಯೋ ಭರ್ಜರಿ ಮೊತ್ತಕ್ಕೆ ಸೇಲ್ ಆಗಿದೆ ಎಂದು ವರದಿಯಾಗಿತ್ತು. ಆದರೆ, ಈ ಸುದ್ದಿಯನ್ನು ವರುಣ್ ತೇಜ್ ಅಲ್ಲಗಳೆದಿದ್ದಾರೆ. ತಾವು ಯಾರಿಗೂ ವಿಡಿಯೋವನ್ನು ಮಾರಿಕೊಂಡಿಲ್ಲವೆಂದು ಸ್ಪಷ್ಟನೆ ನೀಡಿದ್ದಾರೆ.

ನಮ್ಮ ಮದುವೆ ವಿಡಿಯೋವನ್ನು ಯಾವುದೇ ಸಂಸ್ಥೆಗೆ ನಾವು ಮಾರಿಕೊಂಡಿಲ್ಲ. ದಯವಿಟ್ಟು ಸುಳ್ಳು ಸುದ್ದಿಯನ್ನು ನಂಬಬೇಡಿ ಮತ್ತು ಹರಡಬೇಡಿ ಎಂದು ವರುಣ್ ತೇಜ್ ಹೇಳಿಕೊಂಡಿದ್ದಾರೆ. ಈ ಮೂಲಕ ಎದ್ದಿರುವ ಸುದ್ದಿಯನ್ನು ತಣ್ಣಗೆ ಮಾಡಿದ್ದಾರೆ. ಈ ಹಿಂದೆ ನಯನತಾರಾ ಮತ್ತು ದೀಪಿಕಾ ಪಡುಕೋಣೆ ತಮ್ಮ ಮದುವೆ ವಿಡಿಯೋಗಳನ್ನು ಒಟಿಟಿಗೆ ಮಾರಿಕೊಂಡಿದ್ದರು. ಹಾಗಾಗಿ ವರುಣ್ ಕೂಡ ಹಾಗೆಯೇ ಮಾಡಿದ್ದಾರೆ ಎಂದು ಹೇಳಲಾಗಿತ್ತು.

ವರುಣ್ ತೇಜ್- ಲಾವಣ್ಯ ತ್ರಿಪಾಠಿ (Lavanya Tripathi) ಜೋಡಿ ನವೆಂಬರ್ 1ರಂದು ದಾಂಪತ್ಯ (Wedding) ಜೀವನಕ್ಕೆ ಕಾಲಿಟ್ಟಿದ್ದಾರೆ. ಇಟಲಿಯಲ್ಲಿ ಅದ್ದೂರಿಯಾಗಿ ಪ್ರೇಮ ಪಕ್ಷಿಗಳು ಮದುವೆಯಾಗಿದ್ದರು. ಮದುವೆಯ ಸುಂದರ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದವು. ಆದರೆ, ವಿಡಿಯೋ ಮಾತ್ರ ಆಚೆ ಬಂದಿರಲಿಲ್ಲ. ಹಾಗಾಗಿ ವಿಡಿಯೋ ಮಾರಿಕೊಂಡಿದ್ದಾರೆ ಎಂದು ಹೇಳಲಾಗಿತ್ತು.

ಐದಾರು ವರ್ಷಗಳ ಪ್ರೀತಿಗೆ ಮದುವೆಯೆಂಬ ಮುದ್ರೆ ಒತ್ತಿದೆ ಈ ಜೋಡಿ. ಕೆಂಪು ಬಣ್ಣದ ಸೀರೆಯಲ್ಲಿ ಲಾವಣ್ಯ ಮಿಂಚಿದ್ರೆ, ಲೈಟ್ ಬಣ್ಣದ ಶೆರ್ವಾನಿಯಲ್ಲಿ ವರುಣ್ (Varun Tej) ಹೈಲೆಟ್ ಆಗಿದ್ದಾರೆ. ಅಲ್ಲದೇ, ಮೂರು ದಿನಗಳ ಕಾಲ ಮದುವೆಯ ಕಾರ್ಯಕ್ರಮಗಳನ್ನು ಇಟಲಿಯಲ್ಲೇ ನಡೆದಿದ್ದವು. ಎಲ್ಲವನ್ನೂ ಸುಂದರವಾಗಿ ವಿಡಿಯೋಗ್ರಫಿ ಮಾಡಲಾಗಿದೆ ಎನ್ನುವ ಮಾಹಿತಿ ಇದೆ.‌

ವರುಣ್ ಮದುವೆಯಲ್ಲಿ ಮೆಗಾಸ್ಟಾರ್ ಚಿರಂಜೀವಿ‌, ಅಲ್ಲು ಅರ್ಜುನ್, ರಾಮ್ ಚರಣ್, ಸಾಯಿ ಧರಂ ತೇಜ್, ಪವನ್ ಕಲ್ಯಾಣ್, ಅಲ್ಲು ಸಿರೀಶ್ ಸೇರಿದಂತೆ ಇಡೀ ಮೆಗಾ ಫ್ಯಾಮಿಲಿ ಭಾಗಿಯಾಗಿತ್ತು. ‘ಮಿಸ್ಟರ್’ ಸಿನಿಮಾ ಚಿತ್ರೀಕರಣಕ್ಕಾಗಿ ಇಟಲಿಯಲ್ಲಿ ಮೊದಲು ಭೇಟಿಯಾಗಿದ್ದ ಈ ಜೋಡಿ, ಇದೀಗ ಇಲ್ಲಿಯೇ ಗ್ರ್ಯಾಂಡ್ ಆಗಿ ಮದುವೆಯಾಗಿದ್ದಾರೆ. ಇಟಲಿಯಲ್ಲಿಯೇ ಹನಿಮೂನ್‌ಗೂ ಪ್ಲ್ಯಾನ್ ಮಾಡಿದ್ದಾರೆ.