ಉತ್ತರಾಖಂಡ್: ನಾಯಿ ಅಟ್ಟಿಸಿಕೊಂಡು ಬಂದರೆ ನಾವು ಭಯಭೀತರಾಗುತ್ತೇವೆ. ಇನ್ನು ಆನೆಯೊಂದು ಜೀಪನ್ನೇ ಅಟ್ಟಿಸಿಕೊಂಡು ಬಂದರೆ ಪರಿಸ್ಥಿತಿ ಹೇಗಾಗಿರಬೇಡ. ಹೌದು. ಆನೆಯೊಂದು ಪ್ರವಾಸಿಗರ ಜೀಪನ್ನು ಅಟ್ಟಿಸಿಕೊಂಡು ಬಂದ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಉತ್ತರಾಖಂಡದ ಜಿಮ್ ಕಾರ್ಬೆಟ್ ರಾಷ್ಟ್ರೀಯ ಉದ್ಯಾನವನದಲ್ಲಿ ಈ ಘಟನೆ ನಡೆದಿದೆ. ಪ್ರವಾಸಿಗರ ಜೀಪೊಂದು ಸಫಾರಿ ಮಾಡುತ್ತಿದ್ದಾಗ ಸುಮಾರು 500-800ಮೀ ಹತ್ತಿರದಿಂದ ಆನೆಯೊಂದು ಓಡಿಸಿಕೊಂಡು ಬಂದಿದೆ. ಇದರಿಂದ ಭಯಭೀತರಾದ ಜೀಪ್ ಡ್ರೈವರ್ ಇನ್ನಷ್ಟು ಸ್ಪೀಡಾಗಿ ವಾಹನವನ್ನು ಓಡಿಸಿದ್ದಾನೆ. ಒಂದಷ್ಟು ದೂರ ವಾಹನವನ್ನು ಓಡಿಸಿಕೊಂಡ ಆನೆಯು ಮತ್ತೆ ಅದೇ ದಾರಿಯಿಂದ ಹಿಂತಿರುಗಿದೆ.
ವಿಡಿಯೋದಲ್ಲಿ ಆನೆಗಳ ಗುಂಪೊಂದು ರಸ್ತೆ ದಾಟುತ್ತಿರುವುದನ್ನು ಕಾಣಬಹುದು. ಜೀಪಿನ ಶಬ್ದ ಕೇಳಿಸಿದಾಗ ಆನೆಯೊಂದು ಘೀಳಿಟ್ಟು ಓಡಿಸುತ್ತಾ ಬಂದಿದೆ. ಒಟ್ಟಿನಲ್ಲಿ ಆನೆಯಿಂದ ಪಾರಾದ ಪ್ರವಾಸಿಗರು ಘಟನೆ ಬಳಿಕ ದೇವರಿಗೆ ಧನ್ಯವಾದ ಹೇಳುತ್ತಿದ್ದಾರೆ.
ಉತ್ತರಾಖಂಡದ ಜಿಮ್ ಕಾರ್ಬೆಟ್ ಉದ್ಯಾನವು ರಾಜ್ಯದ ನೈನಿತಾನ್ ಜಿಲ್ಲೆಯಲ್ಲಿದೆ ಮತ್ತು ಅದು ಬಂಗಾಳ ಹುಲಿಗಳಿಗೆ ಹೆಸರಾಗಿದೆ.
