ವಿಡಿಯೋ: ಕಟ್ಟಡದಿಂದ ಬೀಳ್ತಿದ್ದ ಮಹಿಳೆಯನ್ನ ಕ್ಯಾಚ್ ಹಿಡಿದು ಜೀವ ಉಳಿಸಿದ ಹೀರೋ ಪೊಲೀಸ್

ಬೀಜಿಂಗ್: ಪೊಲೀಸ್ ಅಧಿಕಾರಿಯೊಬ್ಬರು ತನ್ನ ಪ್ರಾಣವನ್ನು ಲೆಕ್ಕಿಸದೆ ಕಟ್ಟಡದ ಮೇಲಿಂದ ಬೀಳ್ತಿದ್ದ ಮಹಿಳೆಯೊಬ್ಬರ ಜೀವ ಉಳಿಸಿದ ಘಟನೆ ಚೀನಾದಲ್ಲಿ ನಡೆದಿದ್ದು, ಅವರನ್ನು ಸಾರ್ವಜನಿಕರು “ರಿಯಲ್ ಸೂಪರ್ ಮ್ಯಾನ್” ಎಂದು ಕರೆದಿದ್ದಾರೆ.

ನಿಸ್ವಾರ್ಥ ಪೊಲೀಸ್ ಅಧಿಕಾರಿ ಕಟ್ಟಡದಿಂದ ಕೆಳಗೆ ಬೀಳ್ತಿದ್ದ ಮಹಿಳೆಯನ್ನು ಕ್ಯಾಚ್ ಹಿಡಿದು ಆಕೆಯ ಜೀವ ಉಳಿಸಿದ್ದಾರೆ. ಆದ್ರೆ ಇದರಿಂದ ಪೊಲೀಸ್ ಅಧಿಕಾರಿಯ ಬೆನ್ನಿನ ಕೆಳಭಾಗಕ್ಕೆ ಗಾಯವಾಗಿದೆ. ಘಟನೆಯ ರೋಚಕ ದೃಶ್ಯಗಳು ವಿಡಿಯೋದಲ್ಲಿ ಸೆರೆಯಾಗಿದ್ದು, ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡ್ತಿದೆ. ಪೊಲೀಸ್ ಅಧಿಕಾರಿಯನ್ನು ಸೂಪರ್ ಹೀರೋ ಎಂದು ಪ್ರಶಂಸಿಸಲಾಗುತ್ತಿದೆ.

ಚೀನಾದ ಅಕ್ಸು ಪ್ರಿಫೆಕ್ಚರ್ ನ ಫುಟ್ ಸ್ಪಾ ದ ಮೊದಲ ಮಹಡಿಯಿಂದ ಮಹಿಳೆ ಬಿದ್ದಿದ್ದಾರೆ. ಆ ಮಹಿಳೆ ಮಹಡಿಯಿಂದ ಕೆಳಗೆ ಬೀಳುತ್ತಿದ್ದಾಗ ಪೊಲೀಸ್ ಅಧಿಕಾರಿಯು ಆಕೆಯನ್ನು ಹಿಡಿದುಕೊಂಡ ದೃಶ್ಯಗಳನ್ನ ವಿಡಿಯೋದಲ್ಲಿ ಕಾಣಬಹುದು. ಸ್ಥಳೀಯ ಮಾಧ್ಯಮಗಳ ವರದಿಯ ಪ್ರಕಾರ, ಮಹಿಳೆ ತನ್ನ ಪತಿಯ ಜೊತೆ ಜಗಳವಾಡ್ತಿದ್ದಾಗ ಮಹಡಿಯಿಂದ ಕೆಳಗೆ ಬಿದ್ದಿದ್ದಾರೆ ಎನ್ನಲಾಗಿದೆ. ಆದ್ರೆ ಆಕೆ ಬೇಕೆಂತಲೇ ಕೆಳಗೆ ಬಿದ್ದರೋ ಅಥವಾ ಕಾಲು ಜಾರಿ ಬಿದ್ದರೋ ಎಂಬುದು ಸ್ಪಷ್ಟವಾಗಿಲ್ಲ.

ಖಾಸಗಿ ಮಾಧ್ಯಮವೊಂದು ಈ ಘಟನೆಯ ವಿಡಿಯೋವನ್ನು ಯೂಟ್ಯೂಬ್ ನಲ್ಲಿ ಹಂಚಿಕೊಂಡಿದ್ದು, ವಿಡಿಯೋ ನೋಡಿದವರೆಲ್ಲ ಈ ಪೊಲೀಸ್ ಅಧಿಕಾರಿಯನ್ನ ದೇವರು ಈ ನಿಜವಾದ ಹೀರೋವನ್ನು ಆಶೀರ್ವದಿಸುತ್ತಾನೆ. ರಿಯಲ್ ಸೂಪರ್ ಮ್ಯಾನ್. ಆ ಅಧಿಕಾರಿ ಗೌರವಕ್ಕೆ ಅರ್ಹರಾಗಿದ್ದಾರೆ ಎಂದು ಕಾಮೆಂಟ್ ಹಾಕಿದ್ದಾರೆ.