ಜಾಗಮಾಡಿಕೊಡುವ ವಿಚಾರದಲ್ಲಿ ಮಾನವೀಯತೆ ಮರೆತು ಬಡಿದಾಡಿಕೊಂಡ್ರು!

ಬೆಂಗಳೂರು: ಅಂಬ್ಯುಲೆನ್ಸ್ ಗೆ ಜಾಗ ಮಾಡಿಕೊಡುವ ವಿಚಾರದಲ್ಲಿ ವಾಹನ ಸವಾರರು ಮಾನವೀಯತೆ ಮರೆತು, ಬಡಿದಾಡಿಕೊಂಡಿರುವ ಘಟನೆ ಕಳೆದ ರಾತ್ರಿ ನಡೆದಿದೆ.

ಬೆಂಗಳೂರು ಹೊರವಲಯ ನೆಲಮಂಗಲ ತಾಲೂಕಿನ ರಾಷ್ಟ್ರೀಯ ಹೆದ್ದಾರಿ ನಾಲ್ಕರ ನವಯುಗ ಟೋಲ್ ಬಳಿ ಈ ಘಟನೆ ನಡೆದಿದ್ದು, ಮತ್ತೊಮ್ಮೆ ಟೋಲ್ ಕಿರಿ ಕಿರಿ ಸುದ್ದಿಗೆ ಗ್ರಾಸವಾಗಿದೆ.

ವೀಕೆಂಡ್ ಸಂದರ್ಭದಲ್ಲಿ ಟೋಲ್ ನಲ್ಲಿ ಸಾಮಾನ್ಯವಾಗಿ ವಾಹನ ದಟ್ಟಣೆ ಅಧಿಕವಾಗಿರುತ್ತದೆ. ಈ ವೇಳೆಯಲ್ಲೇ ಅಂಬ್ಯುಲೆನ್ಸ್ ಗೆ ದಾರಿ ಬಿಡುವ ವಿಚಾರದಲ್ಲಿ, ವಾಹನ ಸವಾರರ ಎರಡು ಗುಂಪು ಬಡಿದಾಡಿಕೊಂಡಿದೆ. ತುಮಕೂರಿನಿಂದ ಬೆಂಗಳೂರಿಗೆ ಈ ಒಂದು ಅಂಬ್ಯುಲೆನ್ಸ್ ತೆರಳುತ್ತಿದ್ದ ವೇಳೆಯಲ್ಲಿ ಈ ಅವಘಡ ಸಂಭವಿಸಿದೆ.

ಕಳೆದ ಎರಡು ದಿನಗಳಿಂದ ಟೋಲ್ ನಲ್ಲಿ ಒಂದಲ್ಲಾ ಒಂದು ಅವಾಂತರ ನಡೆಯುತ್ತಿದ್ದು, ಮತ್ತೊಮ್ಮೆ ಈ ಘಟನೆಯಿಂದ ಟೋಲ್ ಸಿಬ್ಬಂದಿಗಳ ಅಸಡ್ಡೆತನ ಸಾಬೀತಾಗಿದೆ. ಈ ಘಟನೆ ನೆಲಮಂಗಲ ಸಂಚಾರಿ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲಿ ನಡೆದಿದೆ.