ಲಕ್ನೋ: ತಮ್ಮನನ್ನು ಕೊಲೆ ಮಾಡಿದರು ಅಂತಾ 7ನೇ ತರಗತಿ ಬಾಲಕಿಯೊಬ್ಬಳು ಬಿಸಿಯೂಟದಲ್ಲಿ ವಿಷ ಬೆರೆಸಿ ಎಲ್ಲ ವಿದ್ಯಾರ್ಥಿಗಳನ್ನು ಕೊಲೆ ಮಾಡಲು ಹೋಗಿ ಸಿಕ್ಕಿಬಿದ್ದ ಘಟನೆ ಉತ್ತರಪ್ರದೇಶದಲ್ಲಿ ನಡೆದಿದೆ.
ಉತ್ತರ ಪ್ರದೇಶದ ಬಂಕಟ್ ಪೊಲೀಸ್ ಠಾಣೆ ವ್ಯಾಪ್ತಿಯ ಶಾಲೆಯಲ್ಲಿ ಪ್ರಕರಣ ನಡೆದಿದ್ದು, ಬಾಲಕಿ ಹಾಗೂ ಆಕೆಯ ತಾಯಿಯನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ನಡೆದದ್ದು ಏನು?
ಇದೇ ಶಾಲೆಯಲ್ಲಿ ಬಾಲಕಿ 7ನೇ ತರಗತಿ ಹಾಗೂ ಆಕೆಯ ತಮ್ಮ 3ನೇ ತರಗತಿ ಓದುತ್ತಿದ್ದರು. 2018ರ ಏಪ್ರಿಲ್‍ನಲ್ಲಿ ಬಾಲಕಿಯ ತಮ್ಮನನ್ನು 5ನೇ ತರಗತಿ ವಿದ್ಯಾರ್ಥಿಯೊಬ್ಬ ಕೊಲೆ ಮಾಡಿದ್ದ. ಕೊಲೆ ಮಾಡಿದ್ದ ಆರೋಪಿ ಬಾಲಾಪರಾಧಿ ಕಾರಾಗೃಹದಲ್ಲಿ ಇದ್ದಾನೆ. ಆದರೆ ತಮ್ಮನ ಕೊಲೆಯಿಂದ ಮನನೊಂದ ಬಾಲಕಿ ಶಾಲೆಯ ಎಲ್ಲ ಮಕ್ಕಳ ಮೇಲೆ ದ್ವೇಷ ಸಾಧಿಸಲು ಕೊಲೆಗೆ ಯತ್ನಿಸಿದ್ದಾಳೆ ಎಂದು ವರದಿಯಾಗಿದೆ.
ಮಂಗಳವಾರ ಶಾಲೆಯ ಬಿಸಿಯೂಟದ ಮನೆಯಿಂದ ಬಾಲಕಿ ಹೊರಬಂದಿದ್ದಳು. ಬಾಲಕಿಯ ಕೈಗಳಿಂದ ವಿಷದ ವಾಸನೆ ಬರುತ್ತಿದ್ದು, ಬೇಳೆ ಸಾರಿನ ಪಾತ್ರೆ ತೆರೆದಿದ್ದರಿಂದ ಶಂಕೆ ವ್ಯಕ್ತಪಡಿಸಿದ ಅಡುಗೆ ಸಹಾಯಕಿ ಶಾಲೆಯ ಪ್ರಾಚಾರ್ಯ ಭ್ರಿಗುನಾಥ್ ಪ್ರಸಾದ್ ಅವರಿಗೆ ದೂರು ನೀಡಿದ್ದರು. ಅದೃಷ್ಟವಶಾತ್ ಯಾವುದೇ ಮಕ್ಕಳು ಊಟ ಮಾಡದಿರಲಿಲ್ಲ. ಹೀಗಾಗಿ ಭಾರೀ ಅನಾಹುತ ತಪ್ಪಿದೆ.
ವಿಷಯ ತಿಳಿಯುತ್ತಿದ್ದಂತೆ ಶಾಲೆಗೆ ಬಂದು ವಿದ್ಯಾರ್ಥಿಗಳ ಪೋಷಕರು ಹಾಗೂ ಸಾರ್ವಜನಿಕರು ಬಾಲಕಿ ಹಾಗೂ ಆಕೆಯ ತಾಯಿಯನ್ನು ಸುತ್ತುವರೆದು ಥಳಿಸಿ, ಕೂಡಿ ಹಾಕಿದ್ದರು. ಸ್ಥಳಕ್ಕೆ ಬಂದ ಪೊಲೀಸರು ತಾಯಿ ಹಾಗೂ ಬಾಲಕಿಯನ್ನು ವಶಕ್ಕೆ ಪಡೆದಿದ್ದಾರೆ. ಆಹಾರವನ್ನು ವಿಷ ಪರೀಕ್ಷೆಗೆ ಕಳುಹಿಸಲಾಗಿದ್ದು, ಮೂರು ದಿನಗಳ ನಂತರ ವರದಿ ಬರಲಿದ್ದು, ಅಲ್ಲಿಯವರೆಗೆ ಯಾವುದೇ ಕ್ರಮ ಕೈಗೊಳ್ಳಲು ಬರುವುದಿಲ್ಲವೆಂದು ಪೊಲೀಸರು ತಿಳಿಸಿದ್ದಾರೆ.
