ರಿಯಲ್ ಸ್ಟಾರ್ ಉಪೇಂದ್ರ ಮತ್ತು ನಿರ್ದೇಶಕ ಶಶಾಂಕ್ ಕಾಂಬಿನೇಷನ್ನಿನಲ್ಲೊಂದು ಚಿತ್ರ ಬರಲಿದೆ ಎಂಬ ವಿಚಾರ ಕೆಲ ತಿಂಗಳಿಂದ ಹರಿದಾಡುತ್ತಿತ್ತು. ಅದಕ್ಕೀಗ ಅಧಿಕೃತ ಮುದ್ರೆ ಬಿದ್ದಿದೆ. ಸ್ವಾತಂತ್ರ್ಯೋತ್ಸವದ ಸಂಭ್ರಮದಲ್ಲಿಯೇ ಈ ಚಿತ್ರದ ಮುಹೂರ್ತ ಸಮಾರಂಭವೂ ನೆರವೇರಿದೆ. ಈ ಮೂಲಕ ಈ ಸಿನಿಮಾ ಬಗೆಗಿನ ಕೆಲವೇ ಕೆಲ ಮಾಹಿತಿಗಳೂ ಜಾಹೀರಾಗಿವೆ.
ರಿಯಲ್ ಸ್ಟಾರ್ ಉಪೇಂದ್ರ ಐ ಲವ್ ಯೂ ಚಿತ್ರದ ಯಶಸ್ಸಿನ ನಂತರದಲ್ಲಿ ಹೊಸದಾಗಿ ಒಪ್ಪಿಕೊಂಡಿರೋ ಮೊದಲ ಚಿತ್ರವಿದು. ಇದರ ಮುಹೂರ್ತ ಮತ್ತು ಸ್ಕ್ರಿಪ್ಟ್ ಪೂಜೆಯನ್ನು ಶಶಾಂಕ್ ನಡೆಸಿದ್ದಾರೆ. ಇದೇ ಹೊತ್ತಿನಲ್ಲಿ ಕೆಲವೇ ಕೆಲ ಅಂಶಗಳನ್ನು ಮಾತ್ರವೇ ಶಶಾಂಕ್ ಬಿಟ್ಟುಕೊಟ್ಟಿದ್ದಾರೆ. ಅದರನ್ವಯ ಈ ಸಿನಿಮಾದಲ್ಲಿ ಉಪ್ಪಿಗೆ ಇಬ್ಬರು ನಾಯಕಿಯರು ಇರಲಿದ್ದಾರೆಂಬುದು ಪಕ್ಕಾ ಆಗಿದೆ. ನಿಶ್ವಿಕಾ ನಾಯ್ಡು ಮತ್ತು ಬೀರ್ಬಲ್ ಖ್ಯಾತಿಯ ರುಕ್ಮಿಣಿ ನಾಯಕಿಯರಾಗಿ ನಿಕ್ಕಿಯಾಗಿದ್ದಾರೆ.
ಇದರ ಕಥೆ ಕೂಡಾ ವಾಸ್ತವಿಕ ನೆಲೆಗಟ್ಟಿನಲ್ಲಿಯೇ ರೂಪುಗೊಂಡಿದೆಯಂತೆ. ಪ್ರಸ್ತುತ ರಾಜಕೀಯ ಸ್ಥಿತಿಗತಿಗಳನ್ನು ಆಧಾರವಾಗಿಟ್ಟುಕೊಂಡು ಈ ಕಥೆಯನ್ನು ಶಶಾಂಕ್ ಬರೆದಿದ್ದಾರಂತೆ. ಈ ವಿಚಾರವೇ ಸದರಿ ಚಿತ್ರದತ್ತ ಜನ ಕುತೂಹಲದಿಂದ ನೋಡುವಂತಾಗಿದೆ. ಯಾಕೆಂದರೆ ಉಪ್ಪಿ ರಾಜಕೀಯದ ಬಗ್ಗೆ ತಮ್ಮದೇ ಆದ ಸ್ಪಷ್ಟವಾದ ನಿಲುವುಗಳನ್ನು, ವಿಚಾರಧಾರೆಗಳನ್ನು ಹೊಂದಿರುವವರು. ಪ್ರಸ್ತುತ ರಾಜಕೀಯ ವ್ಯವಸ್ಥೆಯನ್ನು ಸರಿಮಾಡಬೇಕೆಂಬ ಕನಸು ಮತ್ತು ಅದಕ್ಕೆ ಬೇಕಾದ ರೂಪುರೇಷೆಗಳನ್ನೂ ಹೊಂದಿರುವವರು. ಅವರು ಈ ಕಥೆಯನ್ನು ಒಪ್ಪಿಕೊಂಡಿದ್ದಾರೆಂದ ಮೇಲೆ ಅದರಲ್ಲಿ ವಿಶೇಷವಾದುದೇನೋ ಇದೆ ಎಂದೇ ಅರ್ಥ.
"ಶಶಾಂಕ್ ಸಿನಿಮಾಸ್" ನಿರ್ಮಾಣದ "ಸೂಪರ್ ಸ್ಟಾರ್ ಉಪೇಂದ್ರ" ಅಭಿನಯದ "ಪ್ರೊಡಕ್ಷನ್ ನಂಬರ್ -2" ಚಿತ್ರದ ಮುಹೂರ್ತ ಇಂದು ಬೆಳಗ್ಗೆ ನೆರವೇರಿತು. ನಿಶ್ವಿಕಾ ನಾಯ್ಡು ಮತ್ತು ರುಕ್ಮಿಣಿ (ಬೀರಬಲ್) ನಾಯಕಿಯರಾಗಿ ನಟಿಸಲಿದ್ದಾರೆ@nimmaupendra ಹುಟ್ಟು ಹಬ್ಬದ ದಿನ ಶೀರ್ಷಿಕೆ ಮತ್ತು ಫಸ್ಟ್ ಲುಕ್ ಬಿಡುಗಡೆ
ನಿಮ್ಮೆಲ್ಲರ ಆಶೀರ್ವಾದವಿರಲಿ.. pic.twitter.com/YFvyr120FI
— Shashank (@Shashank_dir) August 15, 2019
ಇಂಥಾ ಅಪರೂಪದ ರಾಜಕೀಯ ಕಥೆಯಾಧಾರಿತವಾದ ಈ ಚಿತ್ರದ ತಾರಾಗಣ ಮತ್ತು ತಾಂತ್ರಿಕ ವರ್ಗದ ಆಯ್ಕೆ ಕಾರ್ಯ ಸದ್ಯ ಚಾಲ್ತಿಯಲ್ಲಿದೆ. ಉಪೇಂದ್ರ ಅವರ ಹುಟ್ಟುಹಬ್ಬದ ಸಂದರ್ಭದಲ್ಲಿ ಇದರ ಫಸ್ಟ್ ಲುಕ್ ಪೋಸ್ಟರ್ ಮತ್ತು ಟೈಟಲ್ ಲಾಂಚ್ ಮಾಡಲು ಶಶಾಂಕ್ ಯೋಜನೆ ಹಾಕಿಕೊಂಡಿದ್ದಾರೆ. ಆದ್ದರಿಂದ ಸೆಪ್ಟೆಂಬರ್ 18ರತ್ತ ಉಪ್ಪಿ ಅಭಿಮಾನಿಗಳೆಲ್ಲ ಕಣ್ಣಾಗುತ್ತಾ ಈ ಸಿನಿಮಾ ಬಗ್ಗೆ ಮತ್ತಷ್ಟು ವಿವರಗಳನ್ನು ತಿಳಿದುಕೊಳ್ಳುವ ಉತ್ಸಾಹದಿಂದಿದ್ದಾರೆ.
