ವಾಷಿಂಗ್ಟನ್: ಎರಡು ಮೇಕೆಗಳು 50 ಅಡಿ ಎತ್ತರದ ಸೇತುವೆಯ ಮೇಲೆ ಹೋಗಿ ಸಿಲುಕಿಕೊಂಡ ಘಟನೆ ಅಮೆರಿಕದ ಪೆನ್ಸಿಲ್ವೇನಿಯಾದಲ್ಲಿ ನಡೆದಿದೆ.
ಮೇಕೆಗಳು ಸೇತುವೆ ಮೇಲೆ ಹೇಗೆ ಹೋಗಿದ್ದು, ಎಂದು ಮಾತ್ರ ಯಾರಿಗೂ ಗೊತ್ತಿಲ್ಲ. ಹತ್ತಿರದ ಫಾರ್ಮ್ ವೊಂದರಿಂದ ತಪ್ಪಿಸಿಕೊಂಡಿದ್ದ ಈ ಮೇಕೆಗಳು, ಮಳೆ ಬರುತ್ತಿದ್ದ ಕಾರಣ ಸೇತುವೆಯ ಕೆಳಗಿನ ಗೋಡೆಯ ಪಕ್ಕದಲ್ಲಿ ಆಶ್ರಯ ಪಡೆಯಲು ಸೇತುವೆಯ ಎಂಟು ಇಂಚು ಅಗಲದ ಕಿರಿದಾದ ಜಾಗದಲ್ಲಿ ಹೋಗಿವೆ ಎನ್ನಲಾಗಿದೆ.
ಈ ಎರಡು ಮೇಕೆಗಳು ಮಹೋನಿಂಗ್ ನದಿಯ ಸೇತುವೆ ಮೇಲೆ ಸಿಲುಕಿಕೊಂಡಿದ್ದು, ಇದನ್ನು ಸ್ಥಳೀಯ ಪೊಲೀಸರು ಗಮನಿಸಿದ್ದಾರೆ. ನಂತರ ಅವರು ಸಾರಿಗೆ ಇಲಾಖೆ ಮತ್ತು ಹೆದ್ದಾರಿ ಟೋಲ್ ಅಧಿಕಾರಿಗಳಿಗೆ ಕರೆ ಮಾಡಿ ಮೇಕೆಗಳ ರಕ್ಷಣೆ ಮಾಡಿ ಎಂದು ಮನವಿ ಮಾಡಿದ್ದಾರೆ.
ಮಾಹಿತಿ ತಿಳಿದ ಸಾರಿಗೆ ಇಲಾಖೆಯ ದೊಡ್ಡ ಕ್ರೇನ್ ಮೂಲಕ ಸ್ಥಳಕ್ಕೆ ಬಂದು ಎರಡೂ ಮೇಕೆಗಳನ್ನ ಸುರಕ್ಷಿತವಾಗಿ ಕೆಳಗಿಳಿಸಿದ್ದಾರೆ. ನಂತರ ಅವರು ಮೇಕೆ ರಕ್ಷಣೆ ಮಾಡಿದ ಸಾಹಸದ ಫೋಟೋಗಳನ್ನ ಟೋಲ್ ಪ್ರಾಧಿಕಾರಿಗಳು ಪೆನ್ಸಿಲ್ವೇನಿಯಾ ಟರ್ನ್ ಪೈಕ್ ಫೇಸ್ ಬುಕ್ ನಲ್ಲಿ ಪೋಸ್ಟ್ ಮಾಡಿದ್ದಾರೆ.
ಒಂದು ಫೋಟೋದಲ್ಲಿ ಕಿರಿದಾದ ಸೇತುವೆ ಬಳಿ ಎರಡು ಮೇಕೆಗಳು ಸಿಲುಕಿಕೊಂಡಿರುವುದು ಕಾಣಬಹುದಾಗಿದೆ. ಇನ್ನೊಂದರಲ್ಲಿ ಅವುಗಳನ್ನು ರಕ್ಷಿಸಲು ಬಂದ ಕ್ರೇನ್ ಹಾಗೂ ಮೂರನೇ ಫೋಟೋದಲ್ಲಿ ಇಬ್ಬರು ರಕ್ಷಣಾ ಸಿಬ್ಬಂದಿ ಕ್ರೇನ್ ಮೂಲಕ ಮೇಕೆಗಳ ಬಳಿ ಹೋಗಿ ರಕ್ಷಿಸಿರುವುದನ್ನು ಕಾಣಬಹುದಾಗಿದೆ.
ಫೇಸ್ ಬುಕ್ ನಲ್ಲಿ ಮೇಕೆಗಳ ರಕ್ಷಣೆ ಮಾಡಿದ ಫೋಟೋಗಳನ್ನು ಪೋಸ್ಟ್ ಮಾಡಿದ ನಂತರ ಇವರೆಗೆ ಸುಮಾರು 21 ಸಾವಿರ ಲೈಕ್ಸ್ ಬಂದಿದ್ದು, 56 ಸಾವಿರ ಮಂದಿ ಇದನ್ನು ಶೇರ್ ಮಾಡಿದ್ದಾರೆ.
