ತುಮಕೂರು: ನಿಶ್ಚಿತಾರ್ಥದ ಹಿಂದಿನ ದಿನವೇ ಯುವಕ ನಿಗೂಢ ಸಾವನಪ್ಪಿದ್ದ ಪ್ರಕರಣಕ್ಕೆ ಹೊಸ ತಿರುವು ದೊರೆತಿದೆ.
ಆರೋಪಿ ತಮ್ಮ ಬಸವೇಶ ಆಸ್ತಿ ವಿಚಾರವಾಗಿ ಸ್ವಂತ ಅಣ್ಣನನ್ನೇ ಬರ್ಬರವಾಗಿ ಹತ್ಯೆ ಮಾಡಿರುವುದು ಬೆಳಕಿಗೆ ಬಂದಿದೆ.
ಏನಿದು ಪ್ರಕರಣ?: ಸೆ.02 ರಂದು ತುರುವೇಕೆರೆಯ ಹಾಲುಗೊಂಡನಹಳ್ಳಿಯಲ್ಲಿ ಸಹೋದರ ಬಸವೇಶ, 35 ವರ್ಷದ ಹಂಸಕುಮಾರನನ್ನು ಕೊಲೆ ಮಾಡಿ ಕಾರು ಸಮೇತ ಸುಟ್ಟುಹಾಕಿದ್ದನು. ನಿಶ್ಚಿತಾರ್ಥದ ಹಿಂದಿನ ದಿನ ಕಾರು ಸಮೇತ ಸುಟ್ಟು ಕರಕಲಾಗಿ ಹಂಸಕುಮಾರ ಶವ ಪತ್ತೆಯಾಗಿತ್ತು. ಈ ಹಿನ್ನೆಲೆಯಲ್ಲಿ ದಂಡಿನ ಶಿವರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದು, ತಮ್ಮನೇ ಕೊಲೆಗೈದಿರುವ ಬಗ್ಗೆ ತಿಳಿದುಬಂದಿದೆ.
ಸೆ.5 ಕ್ಕೆ ಆಸ್ತಿ ಭಾಗವಾಗಬೇಕಿತ್ತು. ಅಣ್ಣನ ಹಂಸಕುಮಾರನ ಆಸ್ತಿ ಲಪಟಾಯಿಸಲು ತಮ್ಮ ಬಸವೇಶ ಸೆ.02 ರಂದು ಹಂಸಕುಮಾರ್ ನ ಕೊಲೆ ಮಾಡಿದ್ದಾನೆ. ಮನೆಯಲ್ಲೇ ಹಗ್ಗದಿಂದ ಕತ್ತು ಹಿಸುಕಿ ಕೊಲೆಗೈದು ಬಳಿಕ ಕಾರು ಸಮೇತ ಸುಟ್ಟುಹಾಕಿದ್ದಾನೆ.
ಸದ್ಯ ಆರೋಪಿ ಬಸವೇಶನನ್ನು ಪೊಲೀಸರು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.
