– ಕೈ ಪಕ್ಷಕ್ಕೆ ಮೇಯರ್, ತೆನೆಗೆ ಉಪಮೇಯರ್ ಸ್ಥಾನ
ತುಮಕೂರು: ಮಹಾನಗರ ಪಾಲಿಕೆಯ ಎರಡನೇ ಅವಧಿಯ ಮೇಯರ್ ಉಪಮೇಯರ್ ಚುನಾವಣೆ ನಡೆದಿದ್ದು, ಕಾಂಗ್ರೆಸ್ಸಿನ ಫರೀದಾ ಬೇಗಂ ಮೇಯರ್ ಆಗಿ ಹಾಗೂ ಜೆಡಿಎಸ್ಸಿನ ಶಶಿಕಲಾ ಉಪಮೇಯರ್ ಆಗಿ ಅವಿರೋಧ ಆಯ್ಕೆಯಾಗಿದ್ದಾರೆ.
ಈ ಮೂಲಕ ಕಾಂಗ್ರೆಸ್ ಮತ್ತು ಜೆಡಿಎಸ್ ಮೈತ್ರಿ ಮುಂದುವರಿದಿದೆ. ಮೇಯರ್ ಸ್ಥಾನಕ್ಕೆ ಬಿಜೆಪಿಯ ವೀಣಾ ಮನೋಹರ ಗೌಡ ನಾಮಪತ್ರಸಲ್ಲಿದ್ದರು. ಆದರೆ ಕೊನೆ ಘಳಿಗೆಯಲ್ಲಿ ವಾಪಸ್ ಪಡೆದ ಪರಿಣಾಮ ಅವಿರೋಧ ಆಯ್ಕೆ ನಡೆದಿದೆ.
ಒಟ್ಟು 35 ಸ್ಥಾನಗಳ ಬಲಾಬಲ ಹೊಂದಿರುವ ಪಾಲಿಕೆಯಲ್ಲಿ ಬಿಜೆಪಿ ಒಂದು ಪಕ್ಷೇತರ ಅಭ್ಯರ್ಥಿಯ ಬೆಂಬಲ ಹಾಗೂ ಶಾಸಕರು ಹಾಗೂ ಸಂಸದರ ಮತ ಸೇರಿ 15 ಸ್ಥಾನಗಳ ಬಲ ಇತ್ತು. ಕಾಂಗ್ರೆಸ್ 11, ಜೆಡಿಎಸ್ 12 ಮತ ಇತ್ತು. ಕಾಂಗ್ರೆಸ್-ಜೆಡಿಎಸ್ ಮೈತ್ರಿ ಸೇರಿ 23 ಮತಗಳಿತ್ತು. ಸೋಲಿನ ಮುನ್ಸೂಚನೆ ಇದ್ದ ಬಿಜೆಪಿ ಅಖಾಡದಿಂದ ಹಿಂದೆ ಸರಿದ ಪರಿಣಾಮ ಮುಖಭಂಗಕ್ಕೆ ಒಳಗಾಗಿದೆ.
