ಬೆಂಗಳೂರು: ಈ ಹಿಂದೆ ಜಿಗರ್ಥಂಡ ಚಿತ್ರವನ್ನು ನಿರ್ದೇಶನ ಮಾಡಿದ್ದ ಶಿವಗಣೇಶ್ ಅವರ ಹೊಸ ಚಿತ್ರ ತ್ರಾಟಕ. ಇದೇ ತಿಂಗಳ ಮೂವತ್ತೊಂದರಂದು ತೆರೆ ಕಾಣಲು ಸಜ್ಜಾಗಿರೋ ಈ ಚಿತ್ರದ ಮೂಲಕ ರಾಹುಲ್ ಐನಾಪುರ ಎಂಬ ಖಡಕ್ ಲುಕ್ಕಿನ ಹೀರೋ ಪ್ರತ್ಯಕ್ಷವಾಗಲಿದ್ದಾರೆ!
ಶೀರ್ಷಿಕೆಯ ಮೂಲಕವೇ ಕುತೂಹಲ ಹುಟ್ಟಿಸೋ ಟ್ರೆಂಡು, ಆ ಮೂಲಕವೇ ಕ್ರಿಯೇಟಿವ್ ಆಗಿ ಪ್ರೇಕ್ಷಕರನ್ನು ಸೆಳೆದುಕೊಳ್ಳೋ ಚಿತ್ರಗಳ ಸಾಲಿನಲ್ಲಿ ತ್ರಾಟಕ ಚಿತ್ರವೂ ಸೇರಿಕೊಂಡಿದೆ. ಈ ಚಿತ್ರವನ್ನು ನಿರ್ಮಾಣ ಮಾಡೋದರ ಜೊತೆಗೆ ನಾಯಕನಾಗಿಯೂ ರಾಹುಲ್ ಐನಾಪುರ ನಟಿಸಿದ್ದಾರೆ. ಬಿಜಾಪುರ ಮೂಲದ ರಾಹುಲ್ ಕಾಂಗ್ರೆಸ್ ನ ಮಾಜಿ ಶಾಸಕ ಮನೋಹರ ಐನಾಪುರ ಅವರ ಪುತ್ರ. ರಾಜಕೀಯ, ವ್ಯವಹಾರ, ಕಲಿತ ಇಂಜಿನಿಯರಿಂಗ್… ಹೀಗೆ ಕಣ್ಣ ಮುಂದೆ ಸಾಲು ಸಾಲು ಅವಕಾಶವಿದ್ದರೂ ನಟನೆಯನ್ನೇ ಆರಿಸಿಕೊಂಡಿರೋ ರಾಹುಲ್ ಈಗಾಗಲೇ ಪೋಸ್ಟರುಗಳಲ್ಲಿ ಡಿಫರೆಂಟ್ ಲುಕ್ಕಿನ ಮೂಲಕ ಎಲ್ಲರನ್ನು ಸೆಳೆದುಕೊಂಡಿದ್ದಾರೆ.
ಅಷ್ಟಕ್ಕೂ ಈ ತ್ರಾಟಕ ಅಂದರೆ ಏನರ್ಥ, ಈ ಚಿತ್ರದ ಕಥೆಯೇನು ಅಂತೆಲ್ಲ ಈಗಾಗಲೇ ಪ್ರೇಕ್ಷಕರು ತಲೆ ಕೆಡಿಸಿಕೊಂಡಿದ್ದಾರೆ. ತ್ರಾಟಕ ಎಂದರೆ ಯೋಗ ವಿದ್ಯೆಯಲ್ಲಿ ಏಕಾಗ್ರತೆ ಸಾಧಿಸೋ ಒಂದು ವಿಧಾನ. ಈ ಚಿತ್ರದ ಕಥೆ, ಪ್ರಧಾನ ಪಾತ್ರಕ್ಕದು ಸರಿ ಹೊಂದೋದರಿಂದ ತ್ರಾಟಕ ಎಂಬ ಹೆಸರಿಡಲಾಗಿದೆಯಂತೆ. ಇದು ಕ್ರೈಂ ಥ್ರಿಲ್ಲರ್ ಕಥಾನಕ, ಇನ್ವೆಸ್ಟಿಗೇಷನ್ನುಗಳನ್ನು ಪ್ರಧಾನವಾಗಿಸಿಕೊಂಡಿರೋ ಚಿತ್ರ. ಇದರಲ್ಲಿ ರಾಹುಲ್ ಎಸಿಪಿಯಾಗಿ ನಟಿಸಿದ್ದಾರೆ. ಇವರಿಗೆ ಈ ಹಿಂದೆ ಒರಟ ಐ ಲವ್ ಯೂ ಚಿತ್ರದಲ್ಲಿ ನಾಯಕಿಯಾಗಿದ್ದ ಹೃದಯಾ ಜೊತೆಯಾಗಿದ್ದಾರೆ.
ವಿನೋದ್ ಭಾರತಿ ಛಾಯಾಗ್ರಹಣ, ಅರುಣ್ ಸುರಗ ಸಂಗೀತ ಈ ಚಿತ್ರಕ್ಕಿದೆ. ಭವಾನಿ ಪ್ರಕಾಶ್, ಯಶ್ವಂತ್ ಶೆಟ್ಟಿ, ನಂದಗೋಪಾಲ್, ಅಕ್ಷರಾ, ಅಜಿತ್ ಜಯರಾಜ್, ಶ್ರೀಧರ್ ಶಾಸ್ತ್ರಿ, ಅಜಯ್ ಶಿವರಾಜ್, ದಿಶಾ ಪೂವಯ್ಯ ಮುಂತಾದವರು ನಟಿಸಿದ್ದಾರೆ.
ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv
