– ಆಟೋ ದರ ಪರಿಷ್ಕರಣಾ ಸಭೆ ಇಂದು
ಬೆಂಗಳೂರು: ಮೆಟ್ರೋ, ಬಿಎಂಟಿಸಿ ಬಸ್ ದರ ಏರಿಕೆ ಬೆನ್ನಲ್ಲೆ ಈಗ ಬೆಂಗಳೂರಿಗೆ ಮಗದೊಂದು ದರ ಏರಿಕೆ ಶಾಕ್ ಎದುರಾಗಿದೆ. ಇಂದು ಆಟೋ ದರ ಪರಿಷ್ಕರಣೆಯ ಬಗ್ಗೆ ಸಭೆ ನಡೆಯಲಿದ್ದು, ಆಟೋ ದರ ಏರಿಕೆಯ ಬಿಸಿ ಶೀಘ್ರದಲ್ಲಿಯೇ ತಟ್ಟಲಿದೆ.
ಇಂದು ಆಟೋ ದರ ಏರಿಕೆ ಸಂಬಂಧ ಸಾರಿಗೆ ಇಲಾಖೆಯು ಆಟೋ ಚಾಲಕ ಸಂಘಟನೆ ಕರೆದಿದೆ. ಇಂದಿನ ಸಭೆಯಲ್ಲೇ ದರ ಪರಿಷ್ಕರಣೆ ಬಗ್ಗೆ ಬಹುತೇಕ ಫೈನಲ್ ಆಗುವ ಸಾಧ್ಯತೆ ಇದೆ.
ಈಗ 2 ಕಿಮೀಗೆ ಮಿನಿಮಮ್ ದರ 30 ರೂ. ಇದೆ. ಸದ್ಯ 30 ರೂ.ನಿಂದ 40 ರೂ.ಗೆ ಏರಿಕೆಯಾಗುವ ಸಾಧ್ಯತೆ ಇದೆ. ಬೆಳಗ್ಗೆ 11 ಗಂಟೆಗೆ ಇನ್ ಫೆಂಟ್ರಿ ರಸ್ತೆಯಲ್ಲಿರುವ ಸಂಚಾರ ಪೂರ್ವ ವಿಭಾಗದ ಡಿಸಿಪಿ ಕಚೇರಿಯಲ್ಲಿ ಸಭೆ ನಡೆಯಲಿದೆ.
ಸಾರಿಗೆ ಇಲಾಖೆ ಅಧಿಕಾರಿಗಳು ಆಟೋ ಚಾಲಕ ಸಂಘಟನೆ ಮುಖ್ಯಸ್ಥರ ಜೊತೆ ಸಭೆ ಮಾಡಲಿದ್ದಾರೆ. ಚಾಲಕ ಸಂಘಟನೆಯ ಒಟ್ಟು ಅಭಿಪ್ರಾಯ ಪಡೆದು ದರ ಏರಿಕೆಗೆ ನಿರ್ಧಾರ ಕೈಗೊಳ್ಳಲಿದ್ದಾರೆ.
ಸಭೆಯಲ್ಲಿ ದರ ಏರಿಕೆಯ ಪ್ರಸ್ತಾಪವನ್ನು ಸಿದ್ಧಮಾಡಿ ಜಿಲ್ಲಾಧಿಕಾರಿಗಳಿಗೆ ರವಾನೆ ಮಾಡಲಾಗುತ್ತದೆ. ಒಂದು ವಾರದಲ್ಲಿ ಬಹುತೇಕ ಪರಿಷ್ಕೃತ ದರ ಪ್ರಕಟವಾಗುವ ಸಾಧ್ಯತೆ ಇದೆ.
2021 ರಲ್ಲಿ ದರ ಪರಿಷ್ಕರಣೆ ಆಗಿತ್ತು. ಈಗ ಮತ್ತೆ ಆಟೋ ದರ ಏರಿಕೆಗೆ ಸಜ್ಜಾಗಿದೆ. ಒಟ್ಟಾರೆ ದರ ಏರಿಕೆಯ ಬಿಸಿ ಜನರ ಜೇಬುನ್ನು ನಿರಂತರವಾಗಿ ಸುಡಲಿದೆ.
ಇತ್ತ ಸಭೆಗೂ ಮುನ್ನ ಅನೇಕ ಸಂಘಟನೆಗಳು ದರ ಏರಿಕೆಗೆ ವಿರೋಧ ವ್ಯಕ್ತಪಡಿಸಿವೆ. ಫ್ರೀ ಬಸ್, ಮೆಟ್ರೋ ಪ್ರಯಾಣ ಹಿನ್ನೆಲೆ ದರ ಏರಿಕೆಯಾದರೆ ಆಟೋ ಬಳಕೆದಾರರ ಸಂಖ್ಯೆ ಇನ್ನಷ್ಟು ಇಳಿಕೆ ಆಗಬಹುದು. ಈ ಹಿನ್ನೆಲೆಯಲ್ಲಿ ಇಂದಿನ ಸಭೆಯಲ್ಲೂ ದರ ಏರಿಕೆ ಸಂಬಂಧ ವಿರೋಧ ವ್ಯಕ್ತವಾಗುವ ಸಾಧ್ಯತೆ ಇದೆ. ಸಂಘಟನೆಗಳ ಅಭಿಪ್ರಾಯ ಆಧಾರದ ಮೇಲೆ ಅಂತಿಮವಾಗಿ ಸಾರಿಗೆ ಇಲಾಖೆ ನಿರ್ಧರಿಸಬಹುದು.
