ಮುಂಬೈ: ವರ್ಷದ ಆರಂಭದಿಂದಲೂ ರಣ್‍ವೀರ್ ಸಿಂಗ್ ಮತ್ತು ದೀಪಿಕಾ ಪಡುಕೋಣೆ ಮದುವೆ ಸುದ್ದಿ ಕೇಳಿ ಬರುತ್ತಿದೆ. ಜನವರಿ 05ರಂದು ದೀಪಿಕಾ ಹುಟ್ಟುಹಬ್ಬದಂದು ಇಬ್ಬರ ನಿಶ್ಚಿತಾರ್ಥ ಕಾರ್ಯಕ್ರಮ ನಡೆಯಲಿದೆ ಎಂಬ ನ್ಯೂಸ್ ಸಹ ಕೇಳಿ ಬಂದಿತ್ತು. ಇದೂವರೆಗೂ ನಿಶ್ಚಿತಾರ್ಥ ನಡೆದಿಲ್ಲ ಅಂತಾ ಇಬ್ಬರೂ ಸ್ಟಾರ್‍ಗಳು ಉತ್ತರವನ್ನು ಸಹ ನೀಡಿದ್ದಾರೆ. ದೀಪಿಕಾ ಮತ್ತು ರಣ್‍ವೀರ್ ಮಧ್ಯೆ ಪ್ರೇಮವಿದೆ ಎಂಬುದಕ್ಕೆ ನಮ್ಮ ಮುಂದೆ ಸಾಕಷ್ಟು ಉದಾಹರಣೆಗಳಿವೆ.
ಒಂದು ಮೂಲಗಳ ಪ್ರಕಾರ ರಣ್‍ವೀರ್ ಮದುವೆಯಾಗಲು ತುದಿಗಾಲಲ್ಲಿ ನಿಂತಿದ್ದು, ದೀಪಿಕಾ ಮಾತ್ರ ಮದುವೆಯಿಂದ ಹಿಂದೆ ಸರಿಯುತ್ತಿದ್ದಾರೆ ಎಂದು ಹೇಳಲಾಗುತ್ತಿದೆ. ಇತ್ತೀಚೆಗೆ ದೀಪಿಕಾ ಹುಟ್ಟು ಹಬ್ಬದಂದು ರಣ್‍ವೀರ್ ಸಿಂಗ್ ಪೋಷಕರು ಬಾವಿ ಸೊಸೆ ದುಬಾರಿ ಬೆಲೆಯ ಹಾರದ ಜೊತೆಗೆ ಸುಂದರವಾದ ಸೀರೆಯನ್ನು ನೀಡಿದ್ದರು. ಇಷ್ಟಲ್ಲದೇ ರಣ್‍ವೀರ್ ತಮ್ಮ ಅಜ್ಜಿಯ ಬಳಿ ದೀಪಿಕಾರನ್ನು ಕರೆದುಕೊಂಡು ಹೋಗಿ ಪರಿಚಯ ಮಾಡಿಸಿದ್ದಾರೆ. ರಣ್‍ವೀರ್ ಕಡೆಯಿಂದ ಮದುವೆಗೆ ಗ್ರೀನ್ ಸಿಗ್ನಲ್ ಸಿಕ್ಕಿದ್ರೂ ದೀಪಿಕಾ ಮದುವೆಯನ್ನು ಮುಂದೂಡುತ್ತಿದ್ದಾರೆ ಅಂತಾ ಎನ್ನಲಾಗುತ್ತಿದೆ.
ರಣ್‍ಬೀರ್ ಹ್ಯಾಂಗ್‍ಓವರ್: ಈ ಹಿಂದೆ ರಣ್‍ಬೀರ್ ಕಪೂರ್ ಮತ್ತು ದೀಪಿಕಾ ನಡುವೆ ಪ್ರೇಮಾಂಕುರವಿತ್ತು. ಇಬ್ಬರ ಲವ್ ಬ್ರೇಕಪ್ ಬಳಿಕ ರಣ್‍ವೀರ್ ಸ್ಥಳಕ್ಕೆ ರಣ್‍ವೀರ್ ಎಂಟ್ರಿ ಕೊಟ್ಟಿದ್ದಾರೆ. ಬ್ರೇಕಪ್ ಆಗಿ ಇಷ್ಟು ವರ್ಷ ಕಳೆದ್ರೂ ದೀಪಿಕಾ ಮಾತ್ರ ತಮ್ಮ ಮಾಜಿ ಗೆಳೆಯನ ಹ್ಯಾಂಗ್‍ಓವರ್ ನಲ್ಲಿದ್ದಾರೆ ಅಂತಾ ಬಾಲಿವುಡ್ ಹೇಳುತ್ತಿದೆ. ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ದೀಪಿಕಾ ತಮ್ಮ ಮದುವೆಯನ್ನು ಮುಂದೂಡುತ್ತಿದ್ದಾರೆ ಎಂದು ಹೇಳಲಾಗುತ್ತಿದೆ.
ಜನವರಿ 12ರಂದು ಶಾರೂಖ್ ಖಾನ್ ಮನೆಯಲ್ಲಿ ಏರ್ಪಡಿಸಿದ್ದ ಪಾರ್ಟಿಯಲ್ಲಿ ದೀಪಿಕಾ, ರಣ್‍ವೀರ್ ಸಿಂಗ್ ಮತ್ತು ರಣ್‍ಬೀರ್ ಕಪೂರ್ ಮೂವರು ಭಾಗಿಯಾಗಿದ್ದರು. ಪಾರ್ಟಿಯಲ್ಲಿ ದೀಪಿಕಾ ಮಾಜಿ ಗೆಳೆಯ ರಣ್‍ಬೀರ್ ಜೊತೆಯಲ್ಲಿಯೇ ಹೆಚ್ಚು ಸಮಯವನ್ನು ಕಳೆದಿದ್ದು, ಸಹಜವಾಗಿಯೇ ರಣ್‍ವೀರ್‍ಗೆ ಕಸಿವಿಸಿಯಾಗಿದೆ ಎಂಬ ಮಾತುಗಳು ಕೇಳಿ ಬರತೊಡಗಿವೆ. ದೀಪಿಕಾ ಈ ಹಿಂದೆ ತಮ್ಮ ಕುತ್ತಿಗೆ ಮೇಲೆ ರಣ್‍ಬೀರ್ ಕಪೂರ್ (RK) ಹೆಸರಿನ ಟ್ಯಾಟೋ ಹಾಕಿಸಿಕೊಂಡಿದ್ದರು.
ಬಾಲಿವುಡ್ ಗೆ ಒಂದೇ ದಿನ ಕಾಲಿರಿಸಿದ ರಣ್‍ಬೀರ್ ಮತ್ತು ದೀಪಿಕಾ ಇಬ್ಬರೂ ಸಿನಿಮಾಗಳಲ್ಲಿ ಜೊತೆಯಾಗಿ ನಟಿಸಿದ್ದಾರೆ. 2008ರಲ್ಲಿ ತೆರೆಕಂಡ ‘ಬಚನಾ ಏ ಹಸೀನೋ’ ಸಿನಿಮಾದ ಮೂಲಕ ಇಬ್ಬರ ಪ್ರೇಮಾಂಕುರ ಆರಂಭವಾಗಿತ್ತು. ಇಬ್ಬರ ಮೊದಲ ಪ್ರೇಮ ಕೆಲವೇ ವರ್ಷಗಳಲ್ಲಿ ಮುರಿದು ಬಿತ್ತು. ಬೇಕಪ್ ಬಳಿಕ ಇದೇ ಜೋಡಿ 2013ರಲ್ಲಿ ತೆರೆಕಂಡ ‘ಯೇ ಜವಾನಿ ಹೈ ದಿವಾನಿ’ ಚಿತ್ರದಲ್ಲಿ ಒಂದಾಯಿತು. ಬ್ರೇಕಪ್ ಬಳಿಕ ನಟಿಸಿದ ಚಿತ್ರ ಬಾಕ್ಸ್ ಆಫೀಸ್‍ನಲ್ಲಿ ಕೊಳ್ಳೆ ಹೊಡೆದಿತ್ತು. 2015ರಲ್ಲಿ ‘ತಮಾಶಾ’ ಫಿಲ್ಮ ದೀಪಿಕಾ ಮತ್ತು ರಣ್‍ಬೀರ್ ನಟನೆಯ ಕೊನೆಯ ಚಿತ್ರವಾಗಿದೆ.
2013ರಲ್ಲಿ ತೆರೆಕಂಡ ಸಂಜಯ್ ಲೀಲಾ ಬನ್ಸಾಲಿ ನಿರ್ದೇಶನದ `ಗೋಲಿಯೋಂ ಕೀ ರಾಸಲೀಲಾ: ರಾಮ್‍ಲೀಲಾ’ ಸಿನಿಮಾದಿಂದ ಡಿಪ್‍ವೀರ್ ಜೊತೆಯಾಗಿ ನಟಿಸಿದ್ದರು. ನಂತರ `ಬಾಜೀರಾವ್ ಮಸ್ತಾನಿ’ ಸಿನಿಮಾದಲ್ಲಿ ಒಂದಾದ ಈ ಜೋಡಿ ಬೆಳ್ಳಿ ಪರದೆಯ ಮೇಲೆ ಮೋಡಿ ಮಾಡಿತ್ತು. ಇನ್ನೂ ದೀಪಿಕಾ ನಟನೆಯ `ಫೈಂಡಿಂಗ್ ಫ್ಯಾನಿ’ ಚಿತ್ರದ ಒಂದು ಚಿಕ್ಕ ದೃಶ್ಯವೊಂದರಲ್ಲಿ ದೀಪಿಕಾಳ ಪತಿಯಾಗಿ ರಣ್‍ವೀರ್ ಬಣ್ಣ ಹಚ್ಚಿದ್ದರು. ರಣ್‍ವೀರ್ ಮತ್ತು ದೀಪಿಕಾ ನಟಿಸಿರುವ ‘ಪದ್ಮಾವತ್’ ಇದೇ ತಿಂಗಳು 25ರಂದು ಬಿಡುಗಡೆಯಾಗಲಿದೆ.
