ರಾಜಕುಮಾರ, ನಟ ಸಾರ್ವಭೌಮ, ಕನಕ-ಅಣ್ಣಾವ್ರ ಅಭಿಮಾನಿ…. ಹೀಗೆ ಡಾ. ರಾಜ್ ಕುಮಾರ್ ಅವರಿಗೆ ಸಂಬಂಧಿಸಿದ ಸಿನಿಮಾಗಳು ಬಿಡುಗಡೆಯಾಗೋದು, ಸೆಟ್ಟೇರೋದು ಮಾಮೂಲಾಗಿಬಿಟ್ಟಿದೆ. ಈಗ ಮತ್ತೊಂದು ಕುತೂಹಲಭರಿತ ಸಿನಿಮಾವೊಂದು ಆರಂಭವಾಗುತ್ತಿದೆ. ಈ ಚಿತ್ರದ ಹೆಸರೇ `ಡಾ. ರಾಜ್ ಕುಮಾರ್ ರಸ್ತೆ’!
ಪತ್ರಕರ್ತರಾಗಿ ನಂತರ ರಿಯಾಲಿಟಿ ಶೋಗಳ ಸ್ಕ್ರಿಪ್ಟ್ ರೈಟರ್ ಆಗಿ ಹೆಸರು ಮಾಡಿರುವ ವಿನಾಯಕ ರಾಮ್ ಕಲಗಾರು ನಿರ್ದೇಶನದ ಚೊಚ್ಚಲ ಸಿನಿಮಾ ಡಾ. ರಾಜ್ ಕುಮಾರ್ ರಸ್ತೆ! ರಾತ್ರಿ ಆರಂಭವಾಗಿ ಬೆಳಗ್ಗೆಯ ಹೊತ್ತಿಗೆ ಮುಗಿಯುವ ಕಥೆ ಈ ಸಿನಿಮಾದ್ದಂತೆ. ಅಂದಹಾಗೆ ಈ ಚಿತ್ರದ ಹೆಸರಲ್ಲಿ ರಾಜ್ ಕುಮಾರ್ ಅವರ ಹೆಸರು ಇರೋದರ ಜೊತೆಗೆ ಚಿತ್ರದ ನಾಯಕನಟ ಕೂಡಾ ಡಾ. ರಾಜ್ ಅವರ ಅಭಿಮಾನಿಯಾಗಿರುತ್ತಾನಂತೆ. ಕನ್ನಡದಲ್ಲಿ ಈಗಾಗಲೇ ಹೆಸರು ಮಾಡಿರುವ ಸ್ಟಾರ್ ನಟ ಈ ಸಿನಿಮಾದ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದು, ಅದು ಯಾರು ಅನ್ನೋದನ್ನು ನಿರ್ದೇಶಕ ಕಲಗಾರು ಇನ್ನೂ ಗುಟ್ಟಾಗಿಟ್ಟಿದ್ದಾರೆ. ಅಂದಹಾಗೆ ಈ ಸಿನಿಮಾದ ಶೀರ್ಷಿಕೆ ಅನಾವರಣಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ಆಗಮಿಸಲಿದ್ದಾರಂತೆ!
