ಹುಂಡಿ ಒಡೆದ್ರೂ ಹಣ ತೆಗೆದುಕೊಳ್ಳದೆ ಕಳ್ಳ ವಾಪಸ್!

ಮೈಸೂರು: ದೇವಾಲಯಕ್ಕೆ ಕನ್ನ ಹಾಕಲು ಬಂದ ಕಳ್ಳ ಹುಂಡಿ ಒಡೆದು ಅದರಲ್ಲಿದ್ದ ಹಣವನ್ನು ತೆಗೆದುಕೊಳ್ಳದೇ ವಾಪಸ್ ಆಗಿರುವ ಘಟನೆ ನಗರದ ದೇವಾಲಯದಲ್ಲಿ ನಡೆದಿದೆ.

ಮೈಸೂರಿನ ನಾರಾಯಣ ಶಾಸ್ತ್ರಿ ರಸ್ತೆಯಲ್ಲಿರುವ ಕೊಲ್ಲಪುರದಮ್ಮ ದೇಗುಲದಲ್ಲಿ ಈ ಘಟನೆ ನಡೆದಿದೆ. ಕಳ್ಳ ದೇವಾಲಯದ ಗೇಟ್ ಬೀಗ ಒಡೆದು ಒಳಗಡೆ ನುಗ್ಗಿದ್ದಾನೆ. ನಂತರ ಹುಂಡಿ ಒಡೆದಿದ್ದಾನೆ. ಹುಂಡಿಯಲ್ಲಿ ಹಣ ಇದ್ದರೂ ಆ ಹಣವನ್ನು ಕಳ್ಳ ತೆಗೆದುಕೊಂಡು ಹೋಗಿಲ್ಲ.

ಅಷ್ಟೇ ಅಲ್ಲದೇ ದೇಗುಲದಲ್ಲಿ ಯಾವ ಆಭರಣವನ್ನು ಮುಟ್ಟದೆ ಹಾಗೆ ವಾಪಸ್ ಹೋಗಿದ್ದಾನೆ. ಇಂದು ಬೆಳಗ್ಗೆ 4 ಗಂಟೆಗೆ ಪುರೋಹಿತರು ದೇವಾಲಯಕ್ಕೆ ಬಂದ ವೇಳೆ ಈ ಕೃತ್ಯ ಬೆಳಕಿಗೆ ಬಂದಿದೆ. ಘಟನೆ ನಡೆದ ಸ್ಥಳಕ್ಕೆ ಕೆ.ಆರ್. ಠಾಣೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.